१. विभङ्गवारो

हेतुपच्चयो

८७. परामट्ठो चेव नो च परामासो धम्मो परामट्ठस्स चेव नो च परामासस्स धम्मस्स हेतुपच्चयेन पच्चयो – परामट्ठा चेव नो च परामासा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

परामट्ठो चेव नो च परामासो धम्मो परामासस्स चेव परामट्ठस्स च धम्मस्स हेतुपच्चयेन पच्चयो – परामट्ठा चेव नो च परामासा हेतू परामासस्स हेतुपच्चयेन पच्चयो. (२)

परामट्ठो चेव नो च परामासो धम्मो परामासस्स चेव परामट्ठस्स च परामट्ठस्स चेव नो च परामासस्स च धम्मस्स हेतुपच्चयेन पच्चयो – परामट्ठा चेव नो च परामासा हेतू सम्पयुत्तकानं खन्धानं परामासस्स च चित्तसमुट्ठानानञ्च रूपानं हेतुपच्चयेन पच्चयो. (३)

आरम्मणपच्चयो

८८. परामासो चेव परामट्ठो च धम्मो परामासस्स चेव परामट्ठस्स च धम्मस्स आरम्मणपच्चयेन पच्चयो… तीणि (आरब्भ कातब्बानि परामासदुकसदिसं).

८९. परामट्ठो चेव नो च परामासो धम्मो परामट्ठस्स चेव नो च परामासस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, अस्सादेति अभिनन्दति, तं आरब्भ रागो…पे… विचिकिच्छा, उद्धच्चं, दोमनस्सं उप्पज्जति, पुब्बे…पे… झाना…पे… अरिया गोत्रभुं पच्चवेक्खन्ति, वोदानं पच्चवेक्खन्ति, पहीने किलेसे…पे… विक्खम्भिते किलेसे…पे… पुब्बे…पे… चक्खुं…पे… वत्थुं परामट्ठे चेव नो च परामासे खन्धे अनिच्चतो…पे… दोमनस्सं उप्पज्जति. दिब्बेन चक्खुना रूपं पस्सति (याव आवज्जना सब्बं कातब्बं). (१)

परामट्ठो चेव नो च परामासो धम्मो परामासस्स चेव परामट्ठस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं…पे… वत्थुं परामट्ठे चेव नो च परामासे खन्धे अस्सादेति अभिनन्दति, तं आरब्भ दिट्ठि उप्पज्जति. (२)

परामट्ठो चेव नो च परामासो धम्मो परामासस्स चेव परामट्ठस्स च परामट्ठस्स चेव नो च परामासस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं…पे… वत्थुं परामट्ठे चेव नो च परामासे खन्धे अस्सादेति अभिनन्दति, तं आरब्भ परामासो च सम्पयुत्तका च खन्धा उप्पज्जन्ति. (३)

(एवं इतरेपि तीणि आरब्भ कातब्बानि. इमं दुकं परामासदुकसदिसं. लोकुत्तरं यहिं न लब्भति तहिं न कातब्बं.)

परामासपरामट्ठदुकं निट्ठितं.