१. विभङ्गवारो

हेतुपच्चयो

८६. परामासञ्चेव परामट्ठञ्च धम्मं पटिच्च परामट्ठो चेव नो च परामासो धम्मो उप्पज्जति हेतुपच्चया – परामासं पटिच्च सम्पयुत्तका खन्धा चित्तसमुट्ठानञ्च रूपं. (१)

परामट्ठञ्चेव नो च परामासं धम्मं पटिच्च परामट्ठो चेव नो च परामासो धम्मो उप्पज्जति हेतुपच्चया – परामट्ठञ्चेव नो च परामासं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता). (१)

परामट्ठञ्चेव नो च परामासं धम्मं पटिच्च परामासो चेव परामट्ठो च धम्मो उप्पज्जति हेतुपच्चया – परामट्ठे चेव नो च परामासे खन्धे पटिच्च परामासो. (२)

परामट्ठञ्चेव नो च परामासं धम्मं पटिच्च परामासो चेव परामट्ठो च परामट्ठो चेव नो च परामासो च धम्मा उप्पज्जन्ति हेतुपच्चया – परामट्ठञ्चेव नो च परामासं एकं खन्धं पटिच्च तयो खन्धा परामासो च चित्तसमुट्ठानञ्च रूपं…पे… द्वे खन्धे…पे…. (३)

परामासञ्चेव परामट्ठञ्च परामट्ठञ्चेव नो च परामासञ्च धम्मं पटिच्च परामट्ठो चेव नो च परामासो धम्मो उप्पज्जति हेतुपच्चया – परामट्ठञ्चेव नो च परामासं एकं खन्धञ्च परामासञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… (संखित्तं).