१. विभङ्गवारो

नहेतुपच्चयो

५. नोपरामासं धम्मं पटिच्च नोपरामासो धम्मो उप्पज्जति नहेतुपच्चया – अहेतुकं नोपरामासं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयो

६. परामासं धम्मं पटिच्च नोपरामासो धम्मो उप्पज्जति नआरम्मणपच्चया – परामासं पटिच्च चित्तसमुट्ठानं रूपं. (१)

नोपरामासं धम्मं पटिच्च नोपरामासो धम्मो उप्पज्जति नआरम्मणपच्चया – नोपरामासे खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

परामासञ्च नोपरामासञ्च धम्मं पटिच्च नोपरामासो धम्मो उप्पज्जति नआरम्मणपच्चया – परामासञ्च सम्पयुत्तके च खन्धे पटिच्च चित्तसमुट्ठानं रूपं. (१)