१. विभङ्गवारो

हेतुपच्चयो

५४. परामाससम्पयुत्तं धम्मं पच्चया परामाससम्पयुत्तो धम्मो उप्पज्जति हेतुपच्चया… तीणि (पटिच्चवारसदिसो).

परामासविप्पयुत्तं धम्मं पच्चया परामासविप्पयुत्तो धम्मो उप्पज्जति हेतुपच्चया – परामासविप्पयुत्तं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता) वत्थुं पच्चया परामासविप्पयुत्ता खन्धा. (१)

परामासविप्पयुत्तं धम्मं पच्चया परामाससम्पयुत्तो धम्मो उप्पज्जति हेतुपच्चया – वत्थुं पच्चया परामाससम्पयुत्तका खन्धा. (२)

परामासविप्पयुत्तं धम्मं पच्चया परामाससम्पयुत्तो च परामासविप्पयुत्तो च धम्मा उप्पज्जन्ति हेतुपच्चया – वत्थुं पच्चया परामाससम्पयुत्तका खन्धा, महाभूते पच्चया चित्तसमुट्ठानं रूपं. (३)

५५. परामाससम्पयुत्तञ्च परामासविप्पयुत्तञ्च धम्मं पच्चया परामाससम्पयुत्तो धम्मो उप्पज्जति हेतुपच्चया – परामाससम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

परामाससम्पयुत्तञ्च परामासविप्पयुत्तञ्च धम्मं पच्चया परामासविप्पयुत्तो धम्मो उप्पज्जति हेतुपच्चया – परामाससम्पयुत्ते खन्धे च महाभूते च पच्चया चित्तसमुट्ठानं रूपं. (२)

परामाससम्पयुत्तञ्च परामासविप्पयुत्तञ्च धम्मं पच्चया परामाससम्पयुत्तो च परामासविप्पयुत्तो च धम्मा उप्पज्जन्ति हेतुपच्चया – परामाससम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… परामाससम्पयुत्ते खन्धे च महाभूते च पच्चया चित्तसमुट्ठानं रूपं (संखित्तं). (३)