१. विभङ्गवारो

नहेतुपच्चयो

४९. परामासविप्पयुत्तं धम्मं पटिच्च परामासविप्पयुत्तो धम्मो उप्पज्जति नहेतुपच्चया – अहेतुकं परामासविप्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं …पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयो

५०. परामाससम्पयुत्तं धम्मं पटिच्च परामासविप्पयुत्तो धम्मो उप्पज्जति नआरम्मणपच्चया – परामाससम्पयुत्ते खन्धे पटिच्च चित्तसमुट्ठानं रूपं (संखित्तं). (१)

परामासविप्पयुत्तं धम्मं पटिच्च परामासविप्पयुत्तो धम्मो उप्पज्जति नआरम्मणपच्चया – परामासविप्पयुत्ते खन्धे पटिच्च चित्तसमुट्ठानं रूपं (याव असञ्ञसत्ता). (१)

परामाससम्पयुत्तञ्च परामासविप्पयुत्तञ्च धम्मं पटिच्च परामासविप्पयुत्तो धम्मो उप्पज्जति नआरम्मणपच्चया – परामाससम्पयुत्ते खन्धे च महाभूते च पटिच्च चित्तसमुट्ठानं रूपं (संखित्तं). (१)