१. विभङ्गवारो

हेतुपच्चयो

१००. नीवरणो चेव नीवरणसम्पयुत्तो च धम्मो नीवरणस्स चेव नीवरणसम्पयुत्तस्स च धम्मस्स हेतुपच्चयेन पच्चयो – नीवरणा चेव नीवरणसम्पयुत्ता च हेतू सम्पयुत्तकानं नीवरणानं हेतुपच्चयेन पच्चयो. (१)

नीवरणो चेव नीवरणसम्पयुत्तो च धम्मो नीवरणसम्पयुत्तस्स चेव नो च नीवरणस्स धम्मस्स हेतुपच्चयेन पच्चयो – नीवरणा चेव नीवरणसम्पयुत्ता च हेतू सम्पयुत्तकानं खन्धानं हेतुपच्चयेन पच्चयो. (२)

नीवरणो चेव नीवरणसम्पयुत्तो च धम्मो नीवरणस्स चेव नीवरणसम्पयुत्तस्स च नीवरणसम्पयुत्तस्स चेव नो च नीवरणस्स च धम्मस्स हेतुपच्चयेन पच्चयो – नीवरणा चेव नीवरणसम्पयुत्ता च हेतू सम्पयुत्तकानं खन्धानं नीवरणानञ्च हेतुपच्चयेन पच्चयो. (३)

आरम्मणपच्चयो

१०१. नीवरणो चेव नीवरणसम्पयुत्तो च धम्मो नीवरणस्स चेव नीवरणसम्पयुत्तस्स च धम्मस्स आरम्मणपच्चयेन पच्चयो – नीवरणे आरब्भ नीवरणा उप्पज्जन्ति. (मूलं कातब्बं) नीवरणे आरब्भ नीवरणसम्पयुत्ता चेव नो च नीवरणा खन्धा उप्पज्जन्ति. (मूलं कातब्बं) नीवरणे आरब्भ नीवरणा च सम्पयुत्तका च खन्धा उप्पज्जन्ति. (३)

नीवरणसम्पयुत्तो चेव नो च नीवरणो धम्मो नीवरणसम्पयुत्तस्स चेव नो च नीवरणस्स धम्मस्स आरम्मणपच्चयेन पच्चयो – नीवरणसम्पयुत्ते चेव नो च नीवरणे खन्धे आरब्भ नीवरणसम्पयुत्ता चेव नो च नीवरणा खन्धा उप्पज्जन्ति. (मूलं पुच्छितब्बं) नीवरणसम्पयुत्ते चेव नो च नीवरणे खन्धे आरब्भ नीवरणा उप्पज्जन्ति. (मूलं पुच्छितब्बं) नीवरणसम्पयुत्ते चेव नो च नीवरणे खन्धे आरब्भ नीवरणा च सम्पयुत्तका च खन्धा उप्पज्जन्ति. (३)

नीवरणो चेव नीवरणसम्पयुत्तो च नीवरणसम्पयुत्तो चेव नो च नीवरणो च धम्मा नीवरणस्स चेव नीवरणसम्पयुत्तस्स च धम्मस्स आरम्मणपच्चयेन पच्चयो… तीणि. (३)

अधिपतिपच्चयादि

१०२. नीवरणो चेव नीवरणसम्पयुत्तो च धम्मो नीवरणस्स चेव नीवरणसम्पयुत्तस्स च धम्मस्स अधिपतिपच्चयेन पच्चयो – आरम्मणाधिपति… तीणि (गरुकारम्मणायेव).

नीवरणसम्पयुत्तो चेव नो च नीवरणो धम्मो नीवरणसम्पयुत्तस्स चेव नो च नीवरणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति नीवरणसम्पयुत्ते चेव नो च नीवरणे खन्धे गरुं कत्वा नीवरणसम्पयुत्ता चेव नो च नीवरणा खन्धा उप्पज्जन्ति. सहजाताधिपति – नीवरणसम्पयुत्ता चेव नो च नीवरणाधिपति सम्पयुत्तकानं खन्धानं अधिपतिपच्चयेन पच्चयो. (मूलं कातब्बं) आरम्मणाधिपति – नीवरणसम्पयुत्ते चेव नो च नीवरणे खन्धे गरुं कत्वा नीवरणा उप्पज्जन्ति. सहजाताधिपति – नीवरणसम्पयुत्ता चेव नो च नीवरणाधिपति सम्पयुत्तकानं नीवरणानं अधिपतिपच्चयेन पच्चयो. (मूलं कातब्बं) आरम्मणाधिपति – नीवरणसम्पयुत्ते चेव नो च नीवरणे खन्धे गरुं कत्वा नीवरणा च सम्पयुत्तका च खन्धा उप्पज्जन्ति. सहजाताधिपति – नीवरणसम्पयुत्ता चेव नो च नीवरणाधिपति सम्पयुत्तकानं खन्धानं नीवरणानञ्च अधिपतिपच्चयेन पच्चयो. (३)

१०३. नीवरणो चेव नीवरणसम्पयुत्तो च नीवरणसम्पयुत्तो चेव नो च नीवरणो च धम्मा नीवरणस्स चेव नीवरणसम्पयुत्तस्स च धम्मस्स अधिपतिपच्चयेन पच्चयो – आरम्मणाधिपति… तीणि. (३)

अनन्तरपच्चयेन पच्चयो (आवज्जनापि वुट्ठानम्पि नत्थि, सब्बत्थ पुरिमा पुरिमा कातब्बा)… समनन्तरपच्चयेन पच्चयो… नव… सहजातपच्चयेन पच्चयो… नव… अञ्ञमञ्ञपच्चयेन पच्चयो… नव… निस्सयपच्चयेन पच्चयो… नव… उपनिस्सयपच्चयेन पच्चयो… नव (आरम्मणसदिसं, विपाको नत्थि)… आसेवनपच्चयेन पच्चयो… पञ्च.

कम्मपच्चयो

१०४. नीवरणसम्पयुत्तो चेव नो च नीवरणो धम्मो नीवरणसम्पयुत्तस्स चेव नो च नीवरणस्स धम्मस्स कम्मपच्चयेन पच्चयो – नीवरणसम्पयुत्ता चेव नो च नीवरणा चेतना सम्पयुत्तकानं खन्धानं कम्मपच्चयेन पच्चयो. (मूलं कातब्बं) नीवरणसम्पयुत्ता चेव नो च नीवरणा चेतना सम्पयुत्तकानं नीवरणानं कम्मपच्चयेन पच्चयो. (मूलं कातब्बं) नीवरणसम्पयुत्ता चेव नो च नीवरणा चेतना सम्पयुत्तकानं खन्धानं नीवरणानञ्च कम्मपच्चयेन पच्चयो. (३)

आहारपच्चयादि

१०५. नीवरणसम्पयुत्तो चेव नो च नीवरणो धम्मो नीवरणसम्पयुत्तस्स चेव नो च नीवरणस्स धम्मस्स आहारपच्चयेन पच्चयो… तीणि… इन्द्रियपच्चयेन पच्चयो… तीणि… झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… नव… अत्थिपच्चयेन पच्चयो… नव… नत्थिपच्चयेन पच्चयो… नव… विगतपच्चयेन पच्चयो… नव… अविगतपच्चयेन पच्चयो … नव.