१. विभङ्गवारो

नहेतुपच्चयो

५. नीवरणं धम्मं पटिच्च नीवरणो धम्मो उप्पज्जति नहेतुपच्चया – विचिकिच्छानीवरणं पटिच्च अविज्जानीवरणं, उद्धच्चनीवरणं पटिच्च अविज्जानीवरणं. (१)

नोनीवरणं धम्मं पटिच्च नोनीवरणो धम्मो उप्पज्जति नहेतुपच्चया – अहेतुकं नोनीवरणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे…पे… अहेतुकपटिसन्धिक्खणे…पे… (याव असञ्ञसत्ता). (१)

नोनीवरणं धम्मं पटिच्च नीवरणो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च अविज्जानीवरणं. (२)

६. नीवरणञ्च नोनीवरणञ्च धम्मं पटिच्च नीवरणो धम्मो उप्पज्जति नहेतुपच्चया – विचिकिच्छानीवरणञ्च सम्पयुत्तके च खन्धे पटिच्च अविज्जानीवरणं, उद्धच्चनीवरणञ्च सम्पयुत्तके च खन्धे पटिच्च अविज्जानीवरणं. (१)

नआरम्मणपच्चयादि

७. नीवरणं धम्मं पटिच्च नोनीवरणो धम्मो उप्पज्जति नआरम्मणपच्चया – नीवरणे पटिच्च चित्तसमुट्ठानं रूपं. (१)

नोनीवरणं धम्मं पटिच्च नोनीवरणो धम्मो उप्पज्जति नआरम्मणपच्चया – नोनीवरणे खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

नीवरणञ्च नोनीवरणञ्च धम्मं पटिच्च नोनीवरणो धम्मो उप्पज्जति नआरम्मणपच्चया – नीवरणे च सम्पयुत्तके च खन्धे पटिच्च चित्तसमुट्ठानं रूपं (संखित्तं)… नअधिपतिपच्चया… नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया.

नपुरेजातपच्चयो

८. नीवरणं धम्मं पटिच्च नीवरणो धम्मो उप्पज्जति नपुरेजातपच्चया – अरूपे कामच्छन्दनीवरणं पटिच्च थिनमिद्धनीवरणं उद्धच्चनीवरणं अविज्जानीवरणं, अरूपे कामच्छन्दनीवरणं पटिच्च उद्धच्चनीवरणं अविज्जानीवरणं, अरूपे विचिकिच्छानीवरणं पटिच्च उद्धच्चनीवरणं अविज्जानीवरणं, अरूपे उद्धच्चनीवरणं पटिच्च अविज्जानीवरणं. (१)

नीवरणं धम्मं पटिच्च नोनीवरणो धम्मो उप्पज्जति नपुरेजातपच्चया – अरूपे नीवरणे पटिच्च सम्पयुत्तका खन्धा, नीवरणे पटिच्च चित्तसमुट्ठानं रूपं. (अवसेसा पञ्हा सब्बे वित्थारेतब्बा. अरूपं पठमं कातब्बं, रूपं पच्छा यथा लभति.)

९. नीवरणञ्च नोनीवरणञ्च धम्मं पटिच्च नीवरणो धम्मो उप्पज्जति नपुरेजातपच्चया – अरूपे नोनीवरणे खन्धे च कामच्छन्दनीवरणञ्च पटिच्च थिनमिद्धनीवरणं उद्धच्चनीवरणं (चक्कं). (१)

नीवरणञ्च नोनीवरणञ्च धम्मं पटिच्च नोनीवरणो धम्मो उप्पज्जति नपुरेजातपच्चया – अरूपे नोनीवरणं एकं खन्धञ्च नीवरणे च पटिच्च तयो खन्धा…पे… द्वे खन्धे च…पे… नीवरणे च सम्पयुत्तके च खन्धे पटिच्च चित्तसमुट्ठानं रूपं, नीवरणे च महाभूते च पटिच्च चित्तसमुट्ठानं रूपं. (२)

नीवरणञ्च नोनीवरणञ्च धम्मं पटिच्च नीवरणो च नोनीवरणो च धम्मा उप्पज्जन्ति नपुरेजातपच्चया – अरूपे नोनीवरणं एकं खन्धञ्च कामच्छन्दनीवरणञ्च पटिच्च तयो खन्धा थिनमिद्धनीवरणं उद्धच्चनीवरणं अविज्जानीवरणं (चक्कं. संखित्तं). (३)