१. विभङ्गवारो

हेतुपच्चयो

९२. नीवरणञ्चेव नीवरणसम्पयुत्तञ्च धम्मं पटिच्च नीवरणो चेव नीवरणसम्पयुत्तो च धम्मो उप्पज्जति हेतुपच्चया – कामच्छन्दनीवरणं पटिच्च थिनमिद्धनीवरणं उद्धच्चनीवरणं अविज्जानीवरणं (चक्कं. सब्बेपि नीवरणा कातब्बा). (१)

नीवरणञ्चेव नीवरणसम्पयुत्तञ्च धम्मं पटिच्च नीवरणसम्पयुत्तो चेव नो च नीवरणो धम्मो उप्पज्जति हेतुपच्चया – नीवरणे पटिच्च सम्पयुत्तका खन्धा. (२)

नीवरणञ्चेव नीवरणसम्पयुत्तञ्च धम्मं पटिच्च नीवरणो चेव नीवरणसम्पयुत्तो च नीवरणसम्पयुत्तो चेव नो च नीवरणो च धम्मा उप्पज्जन्ति हेतुपच्चया – कामच्छन्दनीवरणं पटिच्च थिनमिद्धनीवरणं उद्धच्चनीवरणं अविज्जानीवरणं सम्पयुत्तका च खन्धा (चक्कं). (३)

९३. नीवरणसम्पयुत्तञ्चेव नो च नीवरणं धम्मं पटिच्च नीवरणसम्पयुत्तो चेव नो च नीवरणो धम्मो उप्पज्जति हेतुपच्चया – नीवरणसम्पयुत्तञ्चेव नो च नीवरणं एकं खन्धं पटिच्च तयो खन्धा…पे… द्वे खन्धे…पे…. (१)

नीवरणसम्पयुत्तञ्चेव नो च नीवरणं धम्मं पटिच्च नीवरणो चेव नीवरणसम्पयुत्तो च धम्मो उप्पज्जति हेतुपच्चया – नीवरणसम्पयुत्ते चेव नो च नीवरणे खन्धे पटिच्च नीवरणा. (२)

नीवरणसम्पयुत्तञ्चेव नो च नीवरणं धम्मं पटिच्च नीवरणो चेव नीवरणसम्पयुत्तो च नीवरणसम्पयुत्तो चेव नो च नीवरणो च धम्मा उप्पज्जन्ति हेतुपच्चया – नीवरणसम्पयुत्तञ्चेव नो च नीवरणं एकं खन्धं पटिच्च तयो खन्धा नीवरणा च…पे… द्वे खन्धे…पे…. (३)

९४. नीवरणञ्चेव नीवरणसम्पयुत्तञ्च नीवरणसम्पयुत्तञ्चेव नो च नीवरणञ्च धम्मं पटिच्च नीवरणो चेव नीवरणसम्पयुत्तो च धम्मो उप्पज्जति हेतुपच्चया – कामच्छन्दनीवरणञ्च सम्पयुत्तके च खन्धे पटिच्च थिनमिद्धनीवरणं उद्धच्चनीवरणं अविज्जानीवरणं (चक्कं). (१)

नीवरणञ्चेव नीवरणसम्पयुत्तञ्च नीवरणसम्पयुत्तञ्चेव नो च नीवरणञ्च धम्मं पटिच्च नीवरणसम्पयुत्तो चेव नो च नीवरणो धम्मो उप्पज्जति हेतुपच्चया – नीवरणसम्पयुत्तञ्चेव नो च नीवरणं एकं खन्धञ्च नीवरणञ्च पटिच्च तयो खन्धा…पे… द्वे खन्धे च…पे…. (२)

नीवरणञ्चेव नीवरणसम्पयुत्तञ्च नीवरणसम्पयुत्तञ्चेव नो च नीवरणञ्च धम्मं पटिच्च नीवरणो चेव नीवरणसम्पयुत्तो च नीवरणसम्पयुत्तो चेव नो च नीवरणो च धम्मा उप्पज्जन्ति हेतुपच्चया – नीवरणसम्पयुत्तञ्चेव नो च नीवरणं एकं खन्धञ्च कामच्छन्दनीवरणञ्च पटिच्च तयो खन्धा थिनमिद्धनीवरणं उद्धच्चनीवरणं अविज्जानीवरणं…पे… द्वे खन्धे च…पे… (चक्कं. संखित्तं.). (३)