१. विभङ्गवारो

हेतुपच्चयो

९०. नीवरणो चेव नीवरणियो च धम्मो नीवरणस्स चेव नीवरणियस्स च धम्मस्स हेतुपच्चयेन पच्चयो – नीवरणा चेव नीवरणिया च हेतू सम्पयुत्तकानं नीवरणानं हेतुपच्चयेन पच्चयो. (१)

नीवरणो चेव नीवरणियो च धम्मो नीवरणियस्स चेव नो च नीवरणस्स धम्मस्स हेतुपच्चयेन पच्चयो – नीवरणा चेव नीवरणिया च हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (२)

नीवरणो चेव नीवरणियो च धम्मो नीवरणस्स चेव नीवरणियस्स च नीवरणियस्स चेव नो च नीवरणस्स च धम्मस्स हेतुपच्चयेन पच्चयो – नीवरणा चेव नीवरणिया च हेतू सम्पयुत्तकानं खन्धानं नीवरणानञ्च चित्तसमुट्ठानानञ्च रूपानं हेतुपच्चयेन पच्चयो. (३)

नीवरणियो चेव नो च नीवरणो धम्मो नीवरणियस्स चेव नो च नीवरणस्स धम्मस्स हेतुपच्चयेन पच्चयो – नीवरणिया चेव नो च नीवरणा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

९१. नीवरणो चेव नीवरणियो च धम्मो नीवरणस्स चेव नीवरणियस्स च धम्मस्स आरम्मणपच्चयेन पच्चयो – नीवरणे आरब्भ नीवरणा उप्पज्जन्ति. (मूलं पुच्छितब्बं) नीवरणे आरब्भ नीवरणिया चेव नो च नीवरणा खन्धा उप्पज्जन्ति. (मूलं पुच्छितब्बं) नीवरणे आरब्भ नीवरणा च सम्पयुत्तका च खन्धा उप्पज्जन्ति. (३)

नीवरणियो चेव नो च नीवरणो धम्मो नीवरणियस्स चेव नो च नीवरणस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, अस्सादेति अभिनन्दति, तं आरब्भ रागो उप्पज्जति, दिट्ठि… विचिकिच्छा… उद्धच्चं… दोमनस्सं उप्पज्जति; पुब्बे सुचिण्णानि…पे… झाना…पे… अरिया गोत्रभुं पच्चवेक्खन्ति, वोदानं…पे… पहीने किलेसे …पे… विक्खम्भिते किलेसे…पे… पुब्बे समुदाचिण्णे…पे… चक्खुं…पे… वत्थुं नीवरणिये चेव नो च नीवरणे खन्धे अनिच्चतो…पे… विपस्सति, अस्सादेति अभिनन्दति…पे… दोमनस्सं उप्पज्जति; दिब्बेन चक्खुना रूपं पस्सति…पे… (याव आवज्जना ताव कातब्बा). (१)

नीवरणियो चेव नो च नीवरणो धम्मो नीवरणस्स चेव नीवरणियस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना…पे… चक्खुं…पे… वत्थुं नीवरणिये चेव नो च नीवरणे खन्धे अस्सादेति अभिनन्दति, तं आरब्भ रागो…पे… दिट्ठि… विचिकिच्छा… उद्धच्चं… दोमनस्सं उप्पज्जति. (२)

नीवरणियो चेव नो च नीवरणो धम्मो नीवरणस्स चेव नीवरणियस्स च नीवरणियस्स चेव नो च नीवरणस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना …पे… चक्खुं…पे… वत्थुं नीवरणिये चेव नो च नीवरणे खन्धे अस्सादेति अभिनन्दति, तं आरब्भ नीवरणा च सम्पयुत्तका च खन्धा उप्पज्जन्ति (एवं इतरेपि तीणि कातब्बा). (३)

(आरम्मणसदिसा अधिपतिपच्चया, पुरेजातम्पि आरम्मणसदिसं. उपनिस्सयेपि लोकुत्तरं न कातब्बं. संखित्तं, एवं वित्थारेतब्बं यथा नीवरणदुकं, एवं पच्चवेक्खित्वा कातब्बं.)

नीवरणनीवरणियदुकं निट्ठितं.