१. विभङ्गवारो

हेतुपच्चयो

६६. नीवरणसम्पयुत्तो धम्मो नीवरणसम्पयुत्तस्स धम्मस्स हेतुपच्चयेन पच्चयो – नीवरणसम्पयुत्ता हेतू सम्पयुत्तकानं खन्धानं हेतुपच्चयेन पच्चयो. (मूलं पुच्छितब्बं) नीवरणसम्पयुत्ता हेतू चित्तसमुट्ठानानं रूपानं हेतुपच्चयेन पच्चयो. (मूलं पुच्छितब्बं) नीवरणसम्पयुत्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

नीवरणविप्पयुत्तो धम्मो नीवरणविप्पयुत्तस्स धम्मस्स हेतुपच्चयेन पच्चयो – नीवरणविप्पयुत्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

६७. नीवरणसम्पयुत्तो धम्मो नीवरणसम्पयुत्तस्स धम्मस्स आरम्मणपच्चयेन पच्चयो – रागं अस्सादेति अभिनन्दति, तं आरब्भ रागो उप्पज्जति, दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति; दिट्ठिं अस्सादेति अभिनन्दति, तं आरब्भ रागो उप्पज्जति, दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति; विचिकिच्छं आरब्भ विचिकिच्छा…पे… दिट्ठि…पे… उद्धच्चं…पे… दोमनस्सं उप्पज्जति; उद्धच्चं आरब्भ उद्धच्चं उप्पज्जति, दिट्ठि…पे… विचिकिच्छा, दोमनस्सं उप्पज्जति; दोमनस्सं आरब्भ दोमनस्सं उप्पज्जति; दिट्ठि …पे… विचिकिच्छा…पे… उद्धच्चं उप्पज्जति. (१)

नीवरणसम्पयुत्तो धम्मो नीवरणविप्पयुत्तस्स धम्मस्स आरम्मणपच्चयेन पच्चयो – अरिया नीवरणसम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति; नीवरणसम्पयुत्ते खन्धे अनिच्चतो दुक्खतो अनत्ततो विपस्सति, चेतोपरियञाणेन नीवरणसम्पयुत्तचित्तसमङ्गिस्स चित्तं जानाति; नीवरणसम्पयुत्ता खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

६८. नीवरणविप्पयुत्तो धम्मो नीवरणविप्पयुत्तस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं…पे… फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; चक्खुं…पे… वत्थुं नीवरणविप्पयुत्ते खन्धे अनिच्चतो दुक्खतो अनत्ततो विपस्सति, दिब्बेन चक्खुना रूपं पस्सति (याव आवज्जनाय). (१)

नीवरणविप्पयुत्तो धम्मो नीवरणसम्पयुत्तस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं…पे… वत्थुं नीवरणविप्पयुत्ते खन्धे अस्सादेति अभिनन्दति, तं आरब्भ रागो उप्पज्जति, दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति. (२)

अधिपतिपच्चयो

६९. नीवरणसम्पयुत्तो धम्मो नीवरणसम्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – रागं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति; दिट्ठिं गरुं कत्वा अस्सादेति…पे…. सहजाताधिपति – नीवरणसम्पयुत्ताधिपति नीवरणसम्पयुत्तकानं खन्धानं अधिपतिपच्चयेन पच्चयो. (१)

नीवरणसम्पयुत्तो धम्मो नीवरणविप्पयुत्तस्स धम्मस्स अधिपतिपच्चयेन पच्चयो. सहजाताधिपति – नीवरणसम्पयुत्ताधिपति चित्तसमुट्ठानानं रूपानं अधिपतिपच्चयेन पच्चयो. (मूलं पुच्छितब्बं) नीवरणसम्पयुत्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

७०. नीवरणविप्पयुत्तो धम्मो नीवरणविप्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं गरुं कत्वा…पे… फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो. सहजाताधिपति – नीवरणविप्पयुत्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नीवरणविप्पयुत्तो धम्मो नीवरणसम्पयुत्तस्स धम्मस्स अधिपतिपच्चयेन पच्चयो. आरम्मणाधिपति – दानं…पे… सीलं…पे… पुब्बे…पे… झानं…पे… चक्खुं…पे… वत्थुं नीवरणविप्पयुत्ते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (२)

अनन्तरपच्चयो

७१. नीवरणसम्पयुत्तो धम्मो नीवरणसम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा नीवरणसम्पयुत्ता खन्धा पच्छिमानं पच्छिमानं नीवरणसम्पयुत्तकानं खन्धानं अनन्तरपच्चयेन पच्चयो. (मूलं पुच्छितब्बं) नीवरणसम्पयुत्ता खन्धा वुट्ठानस्स अनन्तरपच्चयेन पच्चयो (इध पुरिमा पुरिमाति नत्थि). (२)

(मूलं पुच्छितब्बं) पुरिमा पुरिमा नीवरणविप्पयुत्ता खन्धा पच्छिमानं पच्छिमानं नीवरणविप्पयुत्तानं खन्धानं अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

नीवरणविप्पयुत्तो धम्मो नीवरणसम्पयुत्तस्स धम्मस्स अनन्तरपच्चयेन पच्चयो – आवज्जना नीवरणसम्पयुत्तकानं खन्धानं अनन्तरपच्चयेन पच्चयो. (२)

समनन्तरपच्चयादि

७२. नीवरणसम्पयुत्तो धम्मो नीवरणसम्पयुत्तस्स धम्मस्स समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

उपनिस्सयपच्चयो

७३. नीवरणसम्पयुत्तो धम्मो नीवरणसम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय पाणं हनति…पे… सङ्घं भिन्दति; दोसं… मोहं… मानं… दिट्ठिं… पत्थनं उपनिस्साय पाणं हनति…पे… सङ्घं भिन्दति; रागो…पे… पत्थना रागस्स…पे… पत्थनाय उपनिस्सयपच्चयेन पच्चयो. (१)

नीवरणसम्पयुत्तो धम्मो नीवरणविप्पयुत्तस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय दानं देति…पे… सीलं…पे… उपोसथकम्मं…पे… झानं…पे… विपस्सनं… मग्गं… अभिञ्ञं… समापत्तिं उप्पादेति; दोसं…पे… पत्थनं उपनिस्साय दानं देति…पे… समापत्तिं उप्पादेति; रागो…पे… पत्थना सद्धाय …पे… पञ्ञाय… कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (२)

७४. नीवरणविप्पयुत्तो धम्मो नीवरणविप्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति, सीलं…पे… मग्गं…पे… अभिञ्ञं…पे… समापत्तिं उप्पादेति, सीलं…पे… पञ्ञं…पे… सेनासनं उपनिस्साय दानं देति…पे… समापत्तिं उप्पादेति; सद्धा…पे… सेनासनं सद्धाय…पे… पञ्ञाय…पे… मग्गस्स फलसमापत्तिया उपनिस्सयपच्चयेन पच्चयो. (१)

नीवरणविप्पयुत्तो धम्मो नीवरणसम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… पञ्ञं, कायिकं सुखं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स… दोसस्स… मोहस्स… मानस्स… दिट्ठिया… पत्थनाय उपनिस्सयपच्चयेन पच्चयो. (२)

पुरेजातपच्चयो

७५. नीवरणविप्पयुत्तो धम्मो नीवरणविप्पयुत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो दुक्खतो अनत्ततो विपस्सति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नीवरणविप्पयुत्तानं खन्धानं पुरेजातपच्चयेन पच्चयो. (१)

नीवरणविप्पयुत्तो धम्मो नीवरणसम्पयुत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो… दोसो… मोहो…. वत्थुपुरेजातं – वत्थु नीवरणसम्पयुत्तानं खन्धानं पुरेजातपच्चयेन पच्चयो. (२)

पच्छाजातासेवनपच्चया

७६. नीवरणसम्पयुत्तो धम्मो नीवरणविप्पयुत्तस्स धम्मस्स पच्छाजातपच्चयेन पच्चयो… द्वे, आसेवनपच्चयेन पच्चयो… द्वे.

कम्मपच्चयादि

७७. नीवरणसम्पयुत्तो धम्मो नीवरणसम्पयुत्तस्स धम्मस्स कम्मपच्चयेन पच्चयो – नीवरणसम्पयुत्ता चेतना सम्पयुत्तकानं खन्धानं कम्मपच्चयेन पच्चयो. (मूलं कातब्बं) सहजाता, नानाक्खणिका. सहजाता – नीवरणसम्पयुत्ता चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – नीवरणसम्पयुत्ता चेतना विपाकानं खन्धानं कटत्ता च रूपानं कम्मपच्चयेन पच्चयो. (मूलं कातब्बं) नीवरणसम्पयुत्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

नीवरणविप्पयुत्तो धम्मो नीवरणविप्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका (संखित्तं). विपाकपच्चया… एकं.

आहारपच्चयादि

७८. नीवरणसम्पयुत्तो धम्मो नीवरणसम्पयुत्तस्स धम्मस्स आहारपच्चयेन पच्चयो… इन्द्रियपच्चयेन पच्चयो… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो… द्वे.

विप्पयुत्तपच्चयो

७९. नीवरणसम्पयुत्तो धम्मो नीवरणविप्पयुत्तस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नीवरणविप्पयुत्तो धम्मो नीवरणविप्पयुत्तस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

नीवरणविप्पयुत्तो धम्मो नीवरणसम्पयुत्तस्स धम्मस्स विप्पयुत्तपच्चयेन पच्चयो. पुरेजातं – वत्थु नीवरणसम्पयुत्तकानं खन्धानं विप्पयुत्तपच्चयेन पच्चयो. (२)

अत्थिपच्चयो

८०. नीवरणसम्पयुत्तो धम्मो नीवरणसम्पयुत्तस्स धम्मस्स अत्थिपच्चयेन पच्चयो – नीवरणसम्पयुत्तो एको खन्धो तिण्णन्नं खन्धानं अत्थिपच्चयेन पच्चयो…पे…. (१)

नीवरणसम्पयुत्तो धम्मो नीवरणविप्पयुत्तस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – नीवरणसम्पयुत्ता खन्धा चित्तसमुट्ठानानञ्च रूपानं अत्थिपच्चयेन पच्चयो. पच्छाजाता – नीवरणसम्पयुत्ता खन्धा पुरेजातस्स इमस्स कायस्स अत्थिपच्चयेन पच्चयो. (२)

नीवरणसम्पयुत्तो धम्मो नीवरणसम्पयुत्तस्स च नीवरणविप्पयुत्तस्स च धम्मस्स अत्थिपच्चयेन पच्चयो – नीवरणसम्पयुत्तो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो. (३)

८१. नीवरणविप्पयुत्तो धम्मो नीवरणविप्पयुत्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नीवरणविप्पयुत्तो धम्मो नीवरणसम्पयुत्तस्स धम्मस्स अत्थिपच्चयेन पच्चयो. पुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो…पे… दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति; वत्थु नीवरणसम्पयुत्तकानं खन्धानं अत्थिपच्चयेन पच्चयो. (२)

८२. नीवरणसम्पयुत्तो च नीवरणविप्पयुत्तो च धम्मा नीवरणसम्पयुत्तस्स धम्मस्स अत्थिपच्चयेन पच्चयो – सहजातं, पुरेजातं. सहजातो – नीवरणसम्पयुत्तो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च वत्थु च द्विन्नं खन्धानं अत्थिपच्चयेन पच्चयो. (१)

नीवरणसम्पयुत्तो च नीवरणविप्पयुत्तो च धम्मा नीवरणविप्पयुत्तस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – नीवरणसम्पयुत्ता खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – नीवरणसम्पयुत्ता खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – नीवरणसम्पयुत्ता खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)