१-४. पच्चयचतुक्कं

६४. नीवरणसम्पयुत्तं धम्मं संसट्ठो नीवरणसम्पयुत्तो धम्मो उप्पज्जति हेतुपच्चया…पे….

हेतुया द्वे, आरम्मणे द्वे (सब्बत्थ द्वे), विपाके एकं…पे… अविगते द्वे.

अनुलोमं.

६५. नीवरणसम्पयुत्तं धम्मं संसट्ठो नीवरणसम्पयुत्तो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे संसट्ठो विचिकिच्छासहगतो उद्धच्चसहगतो मोहो.

नीवरणविप्पयुत्तं धम्मं संसट्ठो… (संखित्तं).

नहेतुया द्वे, नअधिपतिया द्वे, नपुरेजाते द्वे, नकम्मे द्वे, नविपाके द्वे, नझाने एकं, नमग्गे एकं, नविप्पयुत्ते द्वे.

पच्चनीयं.