१. विभङ्गवारो

हेतुपच्चयो

१. नीवरणं धम्मं पटिच्च नीवरणो धम्मो उप्पज्जति हेतुपच्चया – कामच्छन्दनीवरणं पटिच्च थिनमिद्धनीवरणं [थीनमिद्धनीवरणं (स्या.)] उद्धच्चनीवरणं अविज्जानीवरणं, कामच्छन्दनीवरणं पटिच्च उद्धच्चनीवरणं अविज्जानीवरणं, ब्यापादनीवरणं पटिच्च थिनमिद्धनीवरणं उद्धच्चनीवरणं अविज्जानीवरणं, ब्यापादनीवरणं पटिच्च उद्धच्चनीवरणं अविज्जानीवरणं, ब्यापादनीवरणं पटिच्च थिनमिद्धनीवरणं उद्धच्चनीवरणं कुक्कुच्चनीवरणं अविज्जानीवरणं, ब्यापादनीवरणं पटिच्च उद्धच्चनीवरणं कुक्कुच्चनीवरणं अविज्जानीवरणं, विचिकिच्छानीवरणं पटिच्च उद्धच्चनीवरणं, उद्धच्चनीवरणं पटिच्च अविज्जानीवरणं. (१)

नीवरणं धम्मं पटिच्च नोनीवरणो धम्मो उप्पज्जति हेतुपच्चया – नीवरणे पटिच्च सम्पयुत्तका खन्धा चित्तसमुट्ठानञ्च रूपं. (२)

नीवरणं धम्मं पटिच्च नीवरणो च नोनीवरणो च धम्मा उप्पज्जन्ति हेतुपच्चया – कामच्छन्दनीवरणं पटिच्च थिनमिद्धनीवरणं उद्धच्चनीवरणं अविज्जानीवरणं सम्पयुत्तका च खन्धा चित्तसमुट्ठानञ्च रूपं (चक्कं). (३)

२. नोनीवरणं धम्मं पटिच्च नोनीवरणो धम्मो उप्पज्जति हेतुपच्चया – नोनीवरणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (१)

नोनीवरणं धम्मं पटिच्च नीवरणो धम्मो उप्पज्जति हेतुपच्चया – नोनीवरणे खन्धे पटिच्च नीवरणा. (२)

नोनीवरणं धम्मं पटिच्च नीवरणो च नोनीवरणो च धम्मा उप्पज्जन्ति हेतुपच्चया – नोनीवरणं एकं खन्धं पटिच्च तयो खन्धा नीवरणा च चित्तसमुट्ठानञ्च रूपं…पे… द्वे खन्धे…पे…. (३)

३. नीवरणञ्च नोनीवरणञ्च धम्मं पटिच्च नीवरणो धम्मो उप्पज्जति हेतुपच्चया – कामच्छन्दनीवरणञ्च सम्पयुत्तके च खन्धे पटिच्च थिनमिद्धनीवरणं उद्धच्चनीवरणं अविज्जानीवरणं (चक्कं). (१)

नीवरणञ्च नोनीवरणञ्च धम्मं पटिच्च नोनीवरणो धम्मो उप्पज्जति हेतुपच्चया – नोनीवरणं एकं खन्धञ्च नीवरणञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… नीवरणे च महाभूते च पटिच्च चित्तसमुट्ठानं रूपं. (२)

नीवरणञ्च नोनीवरणञ्च धम्मं पटिच्च नीवरणो च नोनीवरणो च धम्मा उप्पज्जन्ति हेतुपच्चया – नोनीवरणं एकं खन्धञ्च कामच्छन्दनीवरणञ्च पटिच्च तयो खन्धा थिनमिद्धनीवरणं उद्धच्चनीवरणं अविज्जानीवरणं…पे… द्वे खन्धे च…पे… (चक्कं. संखित्तं). (३)