१. विभङ्गवारो

हेतुपच्चयो

५२. नीवरणसम्पयुत्तं धम्मं पटिच्च नीवरणसम्पयुत्तो धम्मो उप्पज्जति हेतुपच्चया – नीवरणसम्पयुत्तं एकं खन्धं पटिच्च तयो खन्धा…पे… द्वे खन्धे…पे…. (१)

नीवरणसम्पयुत्तं धम्मं पटिच्च नीवरणविप्पयुत्तो धम्मो उप्पज्जति हेतुपच्चया – नीवरणसम्पयुत्ते खन्धे पटिच्च चित्तसमुट्ठानं रूपं. (२)

नीवरणसम्पयुत्तं धम्मं पटिच्च नीवरणसम्पयुत्तो च नीवरणविप्पयुत्तो च धम्मा उप्पज्जन्ति हेतुपच्चया – नीवरणसम्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

५३. नीवरणविप्पयुत्तं धम्मं पटिच्च नीवरणविप्पयुत्तो धम्मो उप्पज्जति हेतुपच्चया – नीवरणविप्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता). (१)

नीवरणसम्पयुत्तञ्च नीवरणविप्पयुत्तञ्च धम्मं पटिच्च नीवरणविप्पयुत्तो धम्मो उप्पज्जति हेतुपच्चया – नीवरणसम्पयुत्ते खन्धे च महाभूते च पटिच्च चित्तसमुट्ठानं रूपं (संखित्तं).