१. विभङ्गवारो

हेतुपच्चयो

२५. नीवरणो धम्मो नीवरणस्स धम्मस्स हेतुपच्चयेन पच्चयो – नीवरणा हेतू सम्पयुत्तकानं नीवरणानं हेतुपच्चयेन पच्चयो. (१)

नीवरणो धम्मो नोनीवरणस्स धम्मस्स हेतुपच्चयेन पच्चयो – नीवरणा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (२)

नीवरणो धम्मो नीवरणस्स च नोनीवरणस्स च धम्मस्स हेतुपच्चयेन पच्चयो – नीवरणा हेतू सम्पयुत्तकानं खन्धानं नीवरणानञ्च चित्तसमुट्ठानानञ्च रूपानं हेतुपच्चयेन पच्चयो. (३)

नोनीवरणो धम्मो नोनीवरणस्स धम्मस्स हेतुपच्चयेन पच्चयो – नोनीवरणा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

२६. नीवरणो धम्मो नीवरणस्स धम्मस्स आरम्मणपच्चयेन पच्चयो – नीवरणे आरब्भ नीवरणा उप्पज्जन्ति. (मूलं पुच्छितब्बं) नीवरणे आरब्भ नोनीवरणा खन्धा उप्पज्जन्ति. (मूलं कातब्बं) नीवरणे आरब्भ नीवरणा च सम्पयुत्तका च खन्धा उप्पज्जन्ति. (३)

२७. नोनीवरणो धम्मो नोनीवरणस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं…पे… फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया नोनीवरणे पहीने किलेसे पच्चवेक्खन्ति, विक्खम्भिते किलेसे…पे… पुब्बे समुदाचिण्णे…पे… चक्खुं…पे… वत्थुं नोनीवरणे खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नोनीवरणचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नोनीवरणा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोनीवरणो धम्मो नीवरणस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना…पे… चक्खुं…पे… वत्थुं नोनीवरणे खन्धे अस्सादेति अभिनन्दति, तं आरब्भ रागो उप्पज्जति, दिट्ठि …पे… विचिकिच्छा…पे… उद्धच्चं…पे… दोमनस्सं उप्पज्जति. (२)

नोनीवरणो धम्मो नीवरणस्स च नोनीवरणस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना…पे… चक्खुं…पे… वत्थुं नोनीवरणे खन्धे अस्सादेति अभिनन्दति, तं आरब्भ नीवरणा च सम्पयुत्तका च खन्धा उप्पज्जन्ति. (३)

नीवरणो च नोनीवरणो च धम्मा नीवरणस्स धम्मस्स आरम्मणपच्चयेन पच्चयो… तीणि (आरब्भ कातब्बा).

अधिपतिपच्चयो

२८. नीवरणो धम्मो नीवरणस्स धम्मस्स अधिपतिपच्चयेन पच्चयो. आरम्मणाधिपति – नीवरणे गरुं कत्वा नीवरणा उप्पज्जन्ति… तीणि (आरम्मणसदिसं). (३)

२९. नोनीवरणो धम्मो नोनीवरणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं…पे… फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं नोनीवरणे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोनीवरणाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नोनीवरणो धम्मो नीवरणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं…पे… वत्थुं नोनीवरणे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोनीवरणाधिपति सम्पयुत्तकानं नीवरणानं अधिपतिपच्चयेन पच्चयो. (२)

नोनीवरणो धम्मो नीवरणस्स च नोनीवरणस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं…पे… वत्थुं नोनीवरणे खन्धे गरुं कत्वा अस्सादेति अभिनन्दति, तं गरुं कत्वा नीवरणा च सम्पयुत्तका च खन्धा उप्पज्जन्ति. सहजाताधिपति – नोनीवरणाधिपति सम्पयुत्तकानं खन्धानं नीवरणानञ्च चित्तसमुट्ठानानञ्च रूपानं अधिपतिपच्चयेन पच्चयो. (३)

नीवरणो च नोनीवरणो च धम्मा नीवरणस्स धम्मस्स अधिपतिपच्चयेन पच्चयो – आरम्मणाधिपति… तीणि (आरम्मणाधिपतियेव).

अनन्तरपच्चयो

३०. नीवरणो धम्मो नीवरणस्स धम्मस्स अनन्तरपच्चयेन पच्चयो – पुरिमा पुरिमा नीवरणा पच्छिमानं पच्छिमानं नीवरणानं अनन्तरपच्चयेन पच्चयो. (मूलं पुच्छितब्बं) पुरिमा पुरिमा नीवरणा पच्छिमानं पच्छिमानं नोनीवरणानं खन्धानं अनन्तरपच्चयेन पच्चयो; नीवरणा वुट्ठानस्स अनन्तरपच्चयेन पच्चयो. (मूलं पुच्छितब्बं) पुरिमा पुरिमा नीवरणा पच्छिमानं पच्छिमानं नीवरणानं सम्पयुत्तकानञ्च खन्धानं अनन्तरपच्चयेन पच्चयो. (३)

३१. नोनीवरणो धम्मो नोनीवरणस्स धम्मस्स अनन्तरपच्चयेन पच्चयो – पुरिमा पुरिमा नोनीवरणा खन्धा पच्छिमानं पच्छिमानं नोनीवरणानं खन्धानं अनन्तरपच्चयेन पच्चयो…पे… निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (मूलं पुच्छितब्बं ) पुरिमा पुरिमा नोनीवरणा खन्धा पच्छिमानं पच्छिमानं नीवरणानं अनन्तरपच्चयेन पच्चयो; आवज्जना नीवरणानं अनन्तरपच्चयेन पच्चयो. (मूलं पुच्छितब्बं) पुरिमा पुरिमा नोनीवरणा खन्धा पच्छिमानं पच्छिमानं नीवरणानं सम्पयुत्तकानञ्च खन्धानं अनन्तरपच्चयेन पच्चयो; आवज्जना नीवरणानं सम्पयुत्तकानञ्च खन्धानं अनन्तरपच्चयेन पच्चयो. (३)

३२. नीवरणो च नोनीवरणो च धम्मा नीवरणस्स धम्मस्स अनन्तरपच्चयेन पच्चयो – पुरिमा पुरिमा नीवरणा च सम्पयुत्तका च खन्धा पच्छिमानं पच्छिमानं नीवरणानं अनन्तरपच्चयेन पच्चयो. (मूलं पुच्छितब्बं) पुरिमा पुरिमा नीवरणा च सम्पयुत्तका च खन्धा पच्छिमानं पच्छिमानं नोनीवरणानं खन्धानं अनन्तरपच्चयेन पच्चयो; नीवरणा च सम्पयुत्तका च खन्धा वुट्ठानस्स अनन्तरपच्चयेन पच्चयो. (मूलं पुच्छितब्बं) पुरिमा पुरिमा नीवरणा च सम्पयुत्तका च खन्धा पच्छिमानं पच्छिमानं नीवरणानञ्च सम्पयुत्तकानञ्च खन्धानं अनन्तरपच्चयेन पच्चयो. (३)

समनन्तरपच्चयादि

३३. नीवरणो धम्मो नीवरणस्स धम्मस्स समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

उपनिस्सयपच्चयो

३४. नीवरणो धम्मो नीवरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नीवरणानि नीवरणानं उपनिस्सयपच्चयेन पच्चयो… तीणि.

३५. नोनीवरणो धम्मो नोनीवरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… सीलं…पे… उपोसथकम्मं…पे… झानं उप्पादेति, विपस्सनं…पे… मग्गं…पे… अभिञ्ञं…पे… समापत्तिं उप्पादेति, मानं जप्पेति, दिट्ठिं गण्हाति; सीलं…पे… पञ्ञं…पे… मानं… दिट्ठिं… पत्थनं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… सङ्घं भिन्दति; सद्धा …पे… सेनासनं सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

नोनीवरणो धम्मो नीवरणस्स धम्मस्स उपनिस्सयपच्चयेन पच्चयो (तीणि उपनिस्सया). पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स…पे… पत्थनाय उपनिस्सयपच्चयेन पच्चयो. (२)

नोनीवरणो धम्मो नीवरणस्स च नोनीवरणस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं नीवरणानं सम्पयुत्तकानञ्च खन्धानं उपनिस्सयपच्चयेन पच्चयो. (३)

नीवरणो च नोनीवरणो च धम्मा नीवरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नीवरणा च सम्पयुत्तका च खन्धा नीवरणानं उपनिस्सयपच्चयेन पच्चयो… तीणि.

पुरेजातपच्चयो

३६. नोनीवरणो धम्मो नोनीवरणस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति…पे… तीणि (पुरेजातं आरम्मणसदिसं कुसलाकुसलस्स विभजितब्बं).

पच्छाजात-आसेवनपच्चया

३७. नीवरणो धम्मो नोनीवरणस्स धम्मस्स पच्छाजातपच्चयेन पच्चयो… तीणि… आसेवनपच्चयेन पच्चयो… नव.

कम्मपच्चयो

३८. नोनीवरणो धम्मो नोनीवरणस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नोनीवरणा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोनीवरणा चेतना विपाकानं खन्धानं कटत्ता च रूपानं कम्मपच्चयेन पच्चयो. (मूलं पुच्छितब्बं) नोनीवरणा चेतना सम्पयुत्तकानं नीवरणानं कम्मपच्चयेन पच्चयो. (मूलं पुच्छितब्बं) नोनीवरणा चेतना सम्पयुत्तकानं खन्धानं नीवरणानञ्च चित्तसमुट्ठानानञ्च रूपानं कम्मपच्चयेन पच्चयो. (३)

विपाकपच्चयादि

३९. नोनीवरणो धम्मो नोनीवरणस्स धम्मस्स विपाकपच्चयेन पच्चयो… एकं… आहारपच्चयेन पच्चयो… इन्द्रियपच्चयेन पच्चयो… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो.

विप्पयुत्तपच्चयो

४०. नीवरणो धम्मो नोनीवरणस्स धम्मस्स विप्पयुत्तपच्चयेन पच्चयो – सहजातं, पच्छाजातं (एवं अवसेसा चत्तारि पञ्हा कातब्बा).

अत्थिपच्चयो

४१. नीवरणो धम्मो नीवरणस्स धम्मस्स अत्थिपच्चयेन पच्चयो – कामच्छन्दनीवरणं थिनमिद्धनीवरणस्स उद्धच्चनीवरणस्स अविज्जानीवरणस्स अत्थिपच्चयेन पच्चयो (चक्कं). (१)

नीवरणो धम्मो नोनीवरणस्स धम्मस्स अत्थिपच्चयेन पच्चयो – सहजातं, पच्छाजातं (एवं नीवरणमूले तीणि ). (३)

४२. नोनीवरणो धम्मो नोनीवरणस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नोनीवरणो धम्मो नीवरणस्स धम्मस्स अत्थिपच्चयेन पच्चयो – सहजातं, पुरेजातं (संखित्तं). (२)

नोनीवरणो धम्मो नीवरणस्स च नोनीवरणस्स च धम्मस्स अत्थिपच्चयेन पच्चयो – सहजातं, पुरेजातं (संखित्तं) (३)

४३. नीवरणो च नोनीवरणो च धम्मा नीवरणस्स धम्मस्स अत्थिपच्चयेन पच्चयो – सहजातं, पुरेजातं. सहजातं – कामच्छन्दनीवरणञ्च सम्पयुत्तका च खन्धा थिनमिद्धनीवरणस्स उद्धच्चनीवरणस्स अविज्जानीवरणस्स अत्थिपच्चयेन पच्चयो; कामच्छन्दनीवरणञ्च वत्थु च थिनमिद्धनीवरणस्स उद्धच्चनीवरणस्स अविज्जानीवरणस्स अत्थिपच्चयेन पच्चयो. (१)

नीवरणो च नोनीवरणो च धम्मा नोनीवरणस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नोनीवरणो एको खन्धो च नीवरणा च तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे… नीवरणा च वत्थु च नोनीवरणानं खन्धानं अत्थिपच्चयेन पच्चयो; नीवरणा च सम्पयुत्तका च खन्धा चित्तसमुट्ठानानं रूपानं अत्थिपच्चयेन पच्चयो; नीवरणा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – नीवरणा च सम्पयुत्तका च खन्धा पुरेजातस्स इमस्स कायस्स अत्थिपच्चयेन पच्चयो. पच्छाजाता – नीवरणा च सम्पयुत्तका खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – नीवरणा च सम्पयुत्तका खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

नीवरणो च नोनीवरणो च धम्मा नीवरणस्स च नोनीवरणस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – नोनीवरणो एको खन्धो च कामच्छन्दनीवरणञ्च तिण्णन्नं खन्धानं थिनमिद्धनीवरणस्स उद्धच्चनीवरणस्स अविज्जानीवरणस्स च चित्तसमुट्ठानानञ्च रूपानं अत्थिपच्चयेन पच्चयो; द्वे खन्धा च…पे… कामच्छन्दनीवरणञ्च वत्थु च थिनमिद्धनीवरणस्स उद्धच्चनीवरणस्स अविज्जानीवरणस्स च सम्पयुत्तकानञ्च खन्धानं अत्थिपच्चयेन पच्चयो (चक्कं). (३)