१. विभङ्गवारो

नहेतुपच्चयो

१६. नीवरणं धम्मं पच्चया नीवरणो धम्मो उप्पज्जति नहेतुपच्चया – विचिकिच्छानीवरणं पच्चया अविज्जानीवरणं, उद्धच्चनीवरणं पच्चया अविज्जानीवरणं. (१)

नोनीवरणं धम्मं पच्चया नोनीवरणो धम्मो उप्पज्जति नहेतुपच्चया – अहेतुकं नोनीवरणं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नोनीवरणा खन्धा. (१)

नोनीवरणं धम्मं पच्चया नीवरणो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पच्चया अविज्जानीवरणं, वत्थुं पच्चया अविज्जानीवरणं. (२)

१७. नीवरणञ्च नोनीवरणञ्च धम्मं पच्चया नीवरणो धम्मो उप्पज्जति नहेतुपच्चया – विचिकिच्छानीवरणञ्च सम्पयुत्तके च खन्धे पच्चया अविज्जानीवरणं, उद्धच्चनीवरणञ्च सम्पयुत्तके च खन्धे पच्चया अविज्जानीवरणं, विचिकिच्छानीवरणञ्च वत्थुञ्च पच्चया अविज्जानीवरणं, उद्धच्चनीवरणञ्च वत्थुञ्च पच्चया अविज्जानीवरणं (संखित्तं). (१)