१-४. पच्चयचतुक्कं

हेतुपच्चयो

१०७. गन्थञ्चेव गन्थसम्पयुत्तञ्च धम्मं पटिच्च गन्थो चेव गन्थसम्पयुत्तो च धम्मो उप्पज्जति हेतुपच्चया – सीलब्बतपरामासं कायगन्थं पटिच्च अभिज्झाकायगन्थो, अभिज्झाकायगन्थं पटिच्च सीलब्बतपरामासो कायगन्थो, इदंसच्चाभिनिवेसकायगन्थं पटिच्च अभिज्झाकायगन्थो, अभिज्झाकायगन्थं पटिच्च इदंसच्चाभिनिवेसो कायगन्थो. (१)

गन्थञ्चेव गन्थसम्पयुत्तञ्च धम्मं पटिच्च गन्थसम्पयुत्तो चेव नो च गन्थो धम्मो उप्पज्जति हेतुपच्चया – गन्थे पटिच्च सम्पयुत्तका खन्धा. (२)

गन्थञ्चेव गन्थसम्पयुत्तञ्च धम्मं पटिच्च गन्थो चेव गन्थसम्पयुत्तो च गन्थसम्पयुत्तो चेव नो च गन्थो च धम्मा उप्पज्जन्ति हेतुपच्चया – सीलब्बतपरामासं कायगन्थं पटिच्च अभिज्झाकायगन्थो सम्पयुत्तका च खन्धा (चक्कं). (३)

१०८. गन्थसम्पयुत्तञ्चेव नो च गन्थं धम्मं पटिच्च गन्थसम्पयुत्तो चेव नो च गन्थो धम्मो उप्पज्जति हेतुपच्चया – गन्थसम्पयुत्तञ्चेव नो च गन्थं एकं खन्धं पटिच्च तयो खन्धा…पे… द्वे खन्धे…पे…. (१)

गन्थसम्पयुत्तञ्चेव नो च गन्थं धम्मं पटिच्च गन्थो चेव गन्थसम्पयुत्तो च धम्मो उप्पज्जति हेतुपच्चया – गन्थसम्पयुत्ते चेव नो च गन्थे खन्धे पटिच्च गन्था. (२)

गन्थसम्पयुत्तञ्चेव नो च गन्थं धम्मं पटिच्च गन्थो चेव गन्थसम्पयुत्तो च गन्थसम्पयुत्तो चेव नो च गन्थो च धम्मा उप्पज्जन्ति हेतुपच्चया – गन्थसम्पयुत्तञ्चेव नो च गन्थं एकं खन्धं पटिच्च तयो खन्धा गन्था च…पे… द्वे खन्धे…पे…. (३)

१०९. गन्थञ्चेव गन्थसम्पयुत्तञ्च गन्थसम्पयुत्तञ्चेव नो च गन्थञ्च धम्मं पटिच्च गन्थो चेव गन्थसम्पयुत्तो च धम्मो उप्पज्जति हेतुपच्चया – गन्थे च सम्पयुत्तके च खन्धे पटिच्च गन्था. (१)

गन्थञ्चेव गन्थसम्पयुत्तञ्च गन्थसम्पयुत्तञ्चेव नो च गन्थञ्च धम्मं पटिच्च गन्थसम्पयुत्तो चेव नो च गन्थो धम्मो उप्पज्जति हेतुपच्चया – गन्थसम्पयुत्तञ्चेव नो च गन्थं एकं खन्धञ्च गन्थे च पटिच्च तयो खन्धा…पे… द्वे खन्धे च…पे…. (२)

गन्थञ्चेव गन्थसम्पयुत्तञ्च गन्थसम्पयुत्तञ्चेव नो च गन्थञ्च धम्मं पटिच्च गन्थो चेव गन्थसम्पयुत्तो च गन्थसम्पयुत्तो चेव नो च गन्थो च धम्मा उप्पज्जन्ति हेतुपच्चया – गन्थसम्पयुत्तञ्चेव नो च गन्थं एकं खन्धञ्च सीलब्बतपरामासं कायगन्थञ्च पटिच्च तयो खन्धा अभिज्झाकायगन्थो च…पे… द्वे खन्धे च…पे… (चक्कं बन्धितब्बं. संखित्तं). (३)

११०. हेतुया नव, आरम्मणे नव (सब्बत्थ नव), कम्मे नव, आहारे नव…पे… अविगते नव.

अनुलोमं.