१. विभङ्गवारो

नहेतुपच्चयो

५. नोगन्थं धम्मं पटिच्च नोगन्थो धम्मो उप्पज्जति नहेतुपच्चया – अहेतुकं नोगन्थं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे (याव असञ्ञसत्ता), विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयादि

६. गन्थं धम्मं पटिच्च नोगन्थो धम्मो उप्पज्जति नआरम्मणपच्चया – गन्थे पटिच्च चित्तसमुट्ठानं रूपं. (१)

नोगन्थं धम्मं पटिच्च नोगन्थो धम्मो उप्पज्जति नआरम्मणपच्चया – नोगन्थे खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

गन्थञ्च नोगन्थञ्च धम्मं पटिच्च नोगन्थो धम्मो उप्पज्जति नआरम्मणपच्चया – गन्थे च सम्पयुत्तके च खन्धे पटिच्च चित्तसमुट्ठानं रूपं (संखित्तं).

नअधिपतिपच्चया… नव, नअनन्तरपच्चया… तीणि, नसमनन्तरपच्चया… तीणि, नअञ्ञमञ्ञपच्चया… तीणि, नउपनिस्सयपच्चया… तीणि.

नपुरेजातपच्चयादि

७. गन्थं धम्मं पटिच्च गन्थो धम्मो उप्पज्जति नपुरेजातपच्चया – अरूपे इदंसच्चाभिनिवेसं कायगन्थं पटिच्च अभिज्झाकायगन्थो, अभिज्झाकायगन्थं पटिच्च इदंसच्चाभिनिवेसो कायगन्थो (अरूपे सीलब्बतपरामासो नत्थि, एवं नव पञ्हा कातब्बा), नपच्छाजाते नव, नआसेवने नव, नकम्मे तीणि, नविपाके नव, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते तीणि, नविप्पयुत्ते नव, नोनत्थिया तीणि, नोविगते तीणि.