१. पटिच्चवारो

हेतुपच्चयो

१०३. गन्थञ्चेव गन्थनियञ्च धम्मं पटिच्च गन्थो चेव गन्थनियो च धम्मो उप्पज्जति हेतुपच्चया – सीलब्बतपरामासं कायगन्थं पटिच्च अभिज्झाकायगन्थो, अभिज्झाकायगन्थं पटिच्च सीलब्बतपरामासो कायगन्थो, इदंसच्चाभिनिवेसकायगन्थं पटिच्च अभिज्झाकायगन्थो, अभिज्झाकायगन्थं पटिच्च इदंसच्चाभिनिवेसकायगन्थो. (१)

गन्थञ्चेव गन्थनियञ्च धम्मं पटिच्च गन्थनियो चेव नो च गन्थो धम्मो उप्पज्जति हेतुपच्चया – गन्थे पटिच्च सम्पयुत्तका खन्धा चित्तसमुट्ठानञ्च रूपं. (२)

गन्थञ्चेव गन्थनियञ्च धम्मं पटिच्च गन्थो चेव गन्थनियो च गन्थनियो चेव नो च गन्थो च धम्मा उप्पज्जन्ति हेतुपच्चया. (१)