१. विभङ्गवारो

हेतुपच्चयो

६९. गन्थसम्पयुत्तो धम्मो गन्थसम्पयुत्तस्स धम्मस्स हेतुपच्चयेन पच्चयो – गन्थसम्पयुत्ता हेतू सम्पयुत्तकानं खन्धानं हेतुपच्चयेन पच्चयो. (१)

गन्थसम्पयुत्तो धम्मो गन्थविप्पयुत्तस्स धम्मस्स हेतुपच्चयेन पच्चयो – गन्थसम्पयुत्ता हेतू चित्तसमुट्ठानानं रूपानं हेतुपच्चयेन पच्चयो; दिट्ठिगतविप्पयुत्तलोभसहगतो हेतु लोभस्स चित्तसमुट्ठानानञ्च रूपानं हेतुपच्चयेन पच्चयो; दोमनस्ससहगतो हेतु पटिघस्स चित्तसमुट्ठानानञ्च रूपानं हेतुपच्चयेन पच्चयो. (२)

गन्थसम्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स हेतुपच्चयेन पच्चयो – गन्थसम्पयुत्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; दिट्ठिगतविप्पयुत्तलोभसहगतो हेतु सम्पयुत्तकानं खन्धानं लोभस्स च चित्तसमुट्ठानानञ्च रूपानं हेतुपच्चयेन पच्चयो; दोमनस्ससहगतो हेतु सम्पयुत्तकानं खन्धानं पटिघस्स च चित्तसमुट्ठानानञ्च रूपानं हेतुपच्चयेन पच्चयो. (३)

७०. गन्थविप्पयुत्तो धम्मो गन्थविप्पयुत्तस्स धम्मस्स हेतुपच्चयेन पच्चयो – गन्थविप्पयुत्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; दिट्ठिगतविप्पयुत्तो लोभो चित्तसमुट्ठानानं रूपानं हेतुपच्चयेन पच्चयो; पटिघं चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (१)

गन्थविप्पयुत्तो धम्मो गन्थसम्पयुत्तस्स धम्मस्स हेतुपच्चयेन पच्चयो – दिट्ठिगतविप्पयुत्तो लोभो सम्पयुत्तकानं खन्धानं हेतुपच्चयेन पच्चयो; पटिघं सम्पयुत्तकानं खन्धानं हेतुपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स हेतुपच्चयेन पच्चयो – दिट्ठिगतविप्पयुत्तो लोभो सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिघं सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

७१. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स हेतुपच्चयेन पच्चयो – दिट्ठिगतविप्पयुत्तलोभसहगतो हेतु च लोभो च सम्पयुत्तकानं खन्धानं हेतुपच्चयेन पच्चयो; दोमनस्ससहगतो हेतु च पटिघञ्च सम्पयुत्तकानं खन्धानं हेतुपच्चयेन पच्चयो. (१)

गन्थसम्पयुत्तो च गन्थविप्पयुत्तो च धम्मा गन्थविप्पयुत्तस्स धम्मस्स हेतुपच्चयेन पच्चयो – दिट्ठिगतविप्पयुत्तलोभसहगतो हेतु च लोभो च चित्तसमुट्ठानानं रूपानं हेतुपच्चयेन पच्चयो; दोमनस्ससहगतो हेतु च पटिघञ्च चित्तसमुट्ठानानं रूपानं हेतुपच्चयेन पच्चयो. (२)

गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स च गन्थविप्पयुत्तस्स च धम्मस्स हेतुपच्चयेन पच्चयो – दिट्ठिगतविप्पयुत्तलोभसहगतो हेतु च लोभो च सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; दोमनस्ससहगतो हेतु च पटिघञ्च सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

आरम्मणपच्चयो

७२. गन्थसम्पयुत्तो धम्मो गन्थसम्पयुत्तस्स धम्मस्स आरम्मणपच्चयेन पच्चयो – गन्थसम्पयुत्ते खन्धे आरब्भ गन्थसम्पयुत्तका खन्धा उप्पज्जन्ति. (तीसुपि मूला पुच्छितब्बा) गन्थसम्पयुत्ते खन्धे आरब्भ गन्थविप्पयुत्ता खन्धा उप्पज्जन्ति, गन्थसम्पयुत्ते खन्धे आरब्भ दिट्ठिगतविप्पयुत्तलोभसहगता खन्धा च लोभो च उप्पज्जन्ति, दोमनस्ससहगता खन्धा च पटिघञ्च उप्पज्जन्ति. (३)

७३. गन्थविप्पयुत्तो धम्मो गन्थविप्पयुत्तस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना वुट्ठहित्वा झानं पच्चवेक्खति, अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया गन्थविप्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति, चक्खुं…पे… वत्थुं गन्थविप्पयुत्ते खन्धे च लोभञ्च पटिघञ्च अनिच्चतो…पे… विपस्सति, अस्सादेति अभिनन्दति, तं आरब्भ गन्थविप्पयुत्तो रागो उप्पज्जति, विचिकिच्छा…पे… उद्धच्चं…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन गन्थविप्पयुत्तचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… गन्थविप्पयुत्ता खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

गन्थविप्पयुत्तो धम्मो गन्थसम्पयुत्तस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं…पे… पुब्बे…पे… झाना…पे… तं अस्सादेति अभिनन्दति, तं आरब्भ गन्थसम्पयुत्तो रागो उप्पज्जति… दिट्ठि उप्पज्जति… दोमनस्सं उप्पज्जति (संखित्तं). (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स आरम्मणपच्चयेन पच्चयो – चक्खुं…पे… वत्थुं गन्थविप्पयुत्ते खन्धे च लोभञ्च पटिघञ्च आरब्भ दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च उप्पज्जन्ति. (३)

७४. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स आरम्मणपच्चयेन पच्चयो – दिट्ठिगतविप्पयुत्तलोभसहगते खन्धे च लोभञ्च दोमनस्ससहगते खन्धे च पटिघञ्च आरब्भ गन्थसम्पयुत्तका खन्धा उप्पज्जन्ति. (मूलं पुच्छितब्बं) दिट्ठिगतविप्पयुत्तलोभसहगते खन्धे च लोभञ्च दोमनस्ससहगते खन्धे च पटिघञ्च आरब्भ गन्थविप्पयुत्ता खन्धा उप्पज्जन्ति, दिट्ठिगतविप्पयुत्तलोभसहगते खन्धे च लोभञ्च दोमनस्ससहगते खन्धे च पटिघञ्च आरब्भ दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च उप्पज्जन्ति. (३)

अधिपतिपच्चयो

७५. गन्थसम्पयुत्तो धम्मो गन्थसम्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – गन्थसम्पयुत्ते खन्धे गरुं कत्वा गन्थसम्पयुत्तका खन्धा उप्पज्जन्ति. सहजाताधिपति – गन्थसम्पयुत्ताधिपति सम्पयुत्तकानं खन्धानं अधिपतिपच्चयेन पच्चयो. (१)

गन्थसम्पयुत्तो धम्मो गन्थविप्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – गन्थसम्पयुत्ते खन्धे गरुं कत्वा दिट्ठिगतविप्पयुत्तो लोभो उप्पज्जति. सहजाताधिपति – गन्थसम्पयुत्ताधिपति चित्तसमुट्ठानानं रूपानं अधिपतिपच्चयेन पच्चयो; दिट्ठिगतविप्पयुत्तलोभसहगताधिपति लोभस्स च चित्तसमुट्ठानानञ्च रूपानं अधिपतिपच्चयेन पच्चयो; दोमनस्ससहगताधिपति पटिघस्स च चित्तसमुट्ठानानञ्च रूपानं अधिपतिपच्चयेन पच्चयो. (२)

गन्थसम्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – गन्थसम्पयुत्ते खन्धे गरुं कत्वा दिट्ठिगतविप्पयुत्तलोभसहगता खन्धा च लोभो च उप्पज्जन्ति. सहजाताधिपति – दिट्ठिगतविप्पयुत्तलोभसहगताधिपति सम्पयुत्तकानं खन्धानं लोभस्स च चित्तसमुट्ठानानञ्च रूपानं अधिपतिपच्चयेन पच्चयो; दोमनस्ससहगताधिपति सम्पयुत्तकानं खन्धानं पटिघस्स च चित्तसमुट्ठानानञ्च रूपानं अधिपतिपच्चयेन पच्चयो.(३)

७६. गन्थविप्पयुत्तो धम्मो गन्थविप्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि गरुं कत्वा पच्चवेक्खति, झाना वुट्ठहित्वा झानं गरुं कत्वा पच्चवेक्खति, अरिया मग्गा वुट्ठहित्वा मग्गं गरुं कत्वा पच्चवेक्खन्ति, फला वुट्ठहित्वा फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं गन्थविप्पयुत्ते खन्धे च लोभञ्च गरुं कत्वा अस्सादेति अभिनन्दति, तं गरुं कत्वा गन्थविप्पयुत्तो रागो उप्पज्जति. सहजाताधिपति – गन्थविप्पयुत्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

गन्थविप्पयुत्तो धम्मो गन्थसम्पयुत्तस्स धम्मस्स अधिपतिपच्चयेन पच्चयो. आरम्मणाधिपति – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना वुट्ठहित्वा झानं…पे… चक्खुं…पे… वत्थुं गन्थविप्पयुत्ते खन्धे च लोभञ्च गरुं कत्वा अस्सादेति अभिनन्दति, तं गरुं कत्वा गन्थसम्पयुत्तो रागो उप्पज्जति… दिट्ठि उप्पज्जति. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स अधिपतिपच्चयेन पच्चयो. आरम्मणाधिपति – चक्खुं…पे… वत्थुं गन्थविप्पयुत्ते खन्धे च लोभञ्च गरुं कत्वा दिट्ठिगतविप्पयुत्तलोभसहगता खन्धा च लोभो च उप्पज्जन्ति. (३)

७७. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स अधिपतिपच्चयेन पच्चयो. आरम्मणाधिपति – दिट्ठिगतविप्पयुत्तलोभसहगते खन्धे च लोभञ्च गरुं कत्वा गन्थसम्पयुत्तका खन्धा उप्पज्जन्ति. (मूला पुच्छितब्बा) दिट्ठिगतविप्पयुत्तलोभसहगते खन्धे च लोभञ्च गरुं कत्वा दिट्ठिगतविप्पयुत्तो लोभो उप्पज्जति. (मूला पुच्छितब्बा) दिट्ठिगतविप्पयुत्तलोभसहगते खन्धे च लोभञ्च गरुं कत्वा दिट्ठिगतविप्पयुत्तलोभसहगता खन्धा च लोभो च उप्पज्जन्ति. (३)

अनन्तरपच्चयो

७८. गन्थसम्पयुत्तो धम्मो गन्थसम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा गन्थसम्पयुत्ता खन्धा पच्छिमानं पच्छिमानं गन्थसम्पयुत्तकानं खन्धानं अनन्तरपच्चयेन पच्चयो. (मूला पुच्छितब्बा) पुरिमा पुरिमा दिट्ठिगतविप्पयुत्तलोभसहगता खन्धा पच्छिमस्स पच्छिमस्स दिट्ठिगतविप्पयुत्तस्स लोभस्स अनन्तरपच्चयेन पच्चयो; पुरिमा पुरिमा दोमनस्ससहगता खन्धा पच्छिमस्स पच्छिमस्स पटिघस्स अनन्तरपच्चयेन पच्चयो; गन्थसम्पयुत्ता खन्धा वुट्ठानस्स अनन्तरपच्चयेन पच्चयो. (मूला पुच्छितब्बा) पुरिमा पुरिमा दिट्ठिगतविप्पयुत्तलोभसहगता खन्धा पच्छिमानं पच्छिमानं दिट्ठिगतविप्पयुत्तलोभसहगतानं खन्धानं लोभस्स च अनन्तरपच्चयेन पच्चयो; पुरिमा पुरिमा दोमनस्ससहगता खन्धा पच्छिमानं पच्छिमानं दोमनस्ससहगतानं खन्धानं पटिघस्स च अनन्तरपच्चयेन पच्चयो. (३)

७९. गन्थविप्पयुत्तो धम्मो गन्थविप्पयुत्तस्स धम्मस्स अनन्तरपच्चयेन पच्चयो – पुरिमो पुरिमो दिट्ठिगतविप्पयुत्तो लोभो पच्छिमस्स पच्छिमस्स दिट्ठिगतविप्पयुत्तस्स लोभस्स अनन्तरपच्चयेन पच्चयो; पुरिमं पुरिमं पटिघं पच्छिमस्स पच्छिमस्स पटिघस्स अनन्तरपच्चयेन पच्चयो; पुरिमा पुरिमा गन्थविप्पयुत्ता खन्धा पच्छिमानं पच्छिमानं गन्थविप्पयुत्तानं खन्धानं अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

गन्थविप्पयुत्तो धम्मो गन्थसम्पयुत्तस्स धम्मस्स अनन्तरपच्चयेन पच्चयो – पुरिमो पुरिमो दिट्ठिगतविप्पयुत्तो लोभो पच्छिमानं पच्छिमानं दिट्ठिगतविप्पयुत्तलोभसहगतानं खन्धानं अनन्तरपच्चयेन पच्चयो; पुरिमं पुरिमं पटिघं पच्छिमानं पच्छिमानं दोमनस्ससहगतानं खन्धानं अनन्तरपच्चयेन पच्चयो; आवज्जना गन्थसम्पयुत्तकानं खन्धानं अनन्तरपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स अनन्तरपच्चयेन पच्चयो – पुरिमो पुरिमो दिट्ठिगतविप्पयुत्तो लोभो पच्छिमानं पच्छिमानं दिट्ठिगतविप्पयुत्तलोभसहगतानं खन्धानं लोभस्स च अनन्तरपच्चयेन पच्चयो; पुरिमं पुरिमं पटिघं पच्छिमानं पच्छिमानं दोमनस्ससहगतानं खन्धानं पटिघस्स च अनन्तरपच्चयेन पच्चयो; आवज्जना दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च अनन्तरपच्चयेन पच्चयो. (३)

८०. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा दिट्ठिगतविप्पयुत्तलोभसहगता खन्धा च लोभो च पच्छिमानं पच्छिमानं दिट्ठिगतविप्पयुत्तलोभसहगतानं खन्धानं अनन्तरपच्चयेन पच्चयो; पुरिमा पुरिमा दोमनस्ससहगता खन्धा च पटिघञ्च पच्छिमानं पच्छिमानं दोमनस्ससहगतानं खन्धानं अनन्तरपच्चयेन पच्चयो. (मूला पुच्छितब्बा) पुरिमा पुरिमा दिट्ठिगतविप्पयुत्तलोभसहगता खन्धा च लोभो च पच्छिमस्स पच्छिमस्स दिट्ठिगतविप्पयुत्तस्स लोभस्स अनन्तरपच्चयेन पच्चयो; पुरिमा पुरिमा दोमनस्ससहगता खन्धा च पटिघञ्च पच्छिमस्स पच्छिमस्स पटिघस्स अनन्तरपच्चयेन पच्चयो; दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च वुट्ठानस्स अनन्तरपच्चयेन पच्चयो. (मूला पुच्छितब्बा) पुरिमा पुरिमा दिट्ठिगतविप्पयुत्तलोभसहगता खन्धा च लोभो च पच्छिमानं पच्छिमानं दिट्ठिगतविप्पयुत्तलोभसहगतानं खन्धानं लोभस्स च अनन्तरपच्चयेन पच्चयो; पुरिमा पुरिमा दोमनस्ससहगता खन्धा च पटिघञ्च पच्छिमानं पच्छिमानं दोमनस्ससहगतानं खन्धानं पटिघस्स च अनन्तरपच्चयेन पच्चयो. (३)

समनन्तरपच्चयादि

८१. गन्थसम्पयुत्तो धम्मो गन्थसम्पयुत्तस्स धम्मस्स समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

उपनिस्सयपच्चयो

८२. गन्थसम्पयुत्तो धम्मो गन्थसम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – गन्थसम्पयुत्ता खन्धा गन्थसम्पयुत्तकानं खन्धानं उपनिस्सयपच्चयेन पच्चयो. (मूलं पुच्छितब्बं, तीणिपि उपनिस्सया) गन्थसम्पयुत्ता खन्धा गन्थविप्पयुत्तानं खन्धानं उपनिस्सयपच्चयेन पच्चयो. (मूलं, तीणिपि उपनिस्सया) गन्थसम्पयुत्ता खन्धा दिट्ठिगतविप्पयुत्तलोभसहगतानं खन्धानं लोभस्स च उपनिस्सयपच्चयेन पच्चयो; दोमनस्ससहगतानं खन्धानं पटिघस्स च उपनिस्सयपच्चयेन पच्चयो. (३)

८३. गन्थविप्पयुत्तो धम्मो गन्थविप्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति… मानं जप्पेति… सीलं…पे… पञ्ञं … रागं… दोसं… मोहं… मानं… पत्थनं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति… पाणं हनति…पे… सङ्घं भिन्दति; सद्धा…पे… पञ्ञा, रागो…पे… पत्थना…पे… सेनासनं सद्धाय…पे… पञ्ञाय… रागस्स… दोसस्स… मोहस्स… मानस्स… पत्थनाय…पे… फलसमापत्तिया उपनिस्सयपच्चयेन पच्चयो. (१)

गन्थविप्पयुत्तो धम्मो गन्थसम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… पञ्ञं… रागं…पे… मानं… पत्थनं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स… दोसस्स … मोहस्स… मानस्स… दिट्ठिया… पत्थनाय उपनिस्सयपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स उपनिस्सयपच्चयेन पच्चयो (तीणि उपनिस्सया); सद्धं उपनिस्साय मानं जप्पेति; सीलं…पे… पञ्ञं… रागं… दोसं… मोहं… मानं… पत्थनं… कायिकं सुखं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… पञ्ञा… रागो… दोसो… मोहो… मानो… पत्थना…पे… सेनासनं दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च उपनिस्सयपच्चयेन पच्चयो. (३)

८४. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो …पे…. पकतूपनिस्सयो – दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च गन्थसम्पयुत्तकानं खन्धानं उपनिस्सयपच्चयेन पच्चयो. (मूलं कातब्बं) दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च गन्थविप्पयुत्तानं खन्धानं दिट्ठिगतविप्पयुत्तलोभस्स च पटिघस्स च उपनिस्सयपच्चयेन पच्चयो. (मूलं पुच्छितब्बं) दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च उपनिस्सयपच्चयेन पच्चयो. (३)

पुरेजातपच्चयो

८५. गन्थविप्पयुत्तो धम्मो गन्थविप्पयुत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो विपस्सति, अस्सादेति अभिनन्दति, तं आरब्भ गन्थविप्पयुत्तो रागो उप्पज्जति, विचिकिच्छा…पे… उद्धच्चं…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु गन्थविप्पयुत्तानं खन्धानं दिट्ठिगतविप्पयुत्तस्स लोभस्स च पटिघस्स च पुरेजातपच्चयेन पच्चयो. (१)

गन्थविप्पयुत्तो धम्मो गन्थसम्पयुत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ गन्थसम्पयुत्तो रागो उप्पज्जति, दिट्ठि…पे… दोमनस्सं उप्पज्जति. वत्थुपुरेजातं – वत्थु गन्थसम्पयुत्तकानं खन्धानं पुरेजातपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं आरब्भ दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च उप्पज्जन्ति. वत्थुपुरेजातं – वत्थु दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च पुरेजातपच्चयेन पच्चयो. (३)

पच्छाजातपच्चयो

८६. गन्थसम्पयुत्तो धम्मो गन्थविप्पयुत्तस्स धम्मस्स पच्छाजातपच्चयेन पच्चयो… एकं.

गन्थविप्पयुत्तो धम्मो गन्थविप्पयुत्तस्स धम्मस्स पच्छाजातपच्चयेन पच्चयो… एकं.

गन्थसम्पयुत्तो च गन्थविप्पयुत्तो च धम्मा गन्थविप्पयुत्तस्स धम्मस्स पच्छाजातपच्चयेन पच्चयो – पच्छाजाता दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

८७. गन्थसम्पयुत्तो धम्मो गन्थसम्पयुत्तस्स धम्मस्स आसेवनपच्चयेन पच्चयो (अनन्तरसदिसं, आवज्जनापि वुट्ठानम्पि नत्थि).

कम्मपच्चयो

८८. गन्थसम्पयुत्तो धम्मो गन्थसम्पयुत्तस्स धम्मस्स कम्मपच्चयेन पच्चयो – गन्थसम्पयुत्ता चेतना सम्पयुत्तकानं खन्धानं कम्मपच्चयेन पच्चयो. (१)

गन्थसम्पयुत्तो धम्मो गन्थविप्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – गन्थसम्पयुत्ता चेतना चित्तसमुट्ठानानं रूपानं कम्मपच्चयेन पच्चयो; दिट्ठिगतविप्पयुत्तलोभसहगता चेतना लोभस्स च चित्तसमुट्ठानानञ्च रूपानं कम्मपच्चयेन पच्चयो; दोमनस्ससहगता चेतना पटिघस्स च चित्तसमुट्ठानानञ्च रूपानं कम्मपच्चयेन पच्चयो. नानाक्खणिका – गन्थसम्पयुत्ता चेतना विपाकानं खन्धानं कटत्ता च रूपानं कम्मपच्चयेन पच्चयो. (२)

गन्थसम्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स कम्मपच्चयेन पच्चयो – गन्थसम्पयुत्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; दिट्ठिगतविप्पयुत्तलोभसहगता चेतना सम्पयुत्तकानं खन्धानं लोभस्स च चित्तसमुट्ठानानञ्च रूपानं कम्मपच्चयेन पच्चयो; दोमनस्ससहगता चेतना सम्पयुत्तकानं खन्धानं पटिघस्स च चित्तसमुट्ठानानञ्च रूपानं कम्मपच्चयेन पच्चयो. (३)

८९. गन्थविप्पयुत्तो धम्मो गन्थविप्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – गन्थविप्पयुत्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – गन्थविप्पयुत्ता चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

विपाकपच्चयादि

९०. गन्थविप्पयुत्तो धम्मो गन्थविप्पयुत्तस्स धम्मस्स विपाकपच्चयेन पच्चयो… एकं.

गन्थसम्पयुत्तो धम्मो गन्थसम्पयुत्तस्स धम्मस्स आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो … चत्तारि… सम्पयुत्तपच्चयेन पच्चयो… छ.

विप्पयुत्तपच्चयो

९१. गन्थसम्पयुत्तो धम्मो गन्थविप्पयुत्तस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं, विभजितब्बं). (१)

गन्थविप्पयुत्तो धम्मो गन्थविप्पयुत्तस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

गन्थविप्पयुत्तो धम्मो गन्थसम्पयुत्तस्स धम्मस्स विप्पयुत्तपच्चयेन पच्चयो. पुरेजातं – वत्थु गन्थसम्पयुत्तकानं खन्धानं विप्पयुत्तपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स विप्पयुत्तपच्चयेन पच्चयो. पुरेजातं – वत्थु दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च विप्पयुत्तपच्चयेन पच्चयो. (३)

९२. गन्थसम्पयुत्तो च गन्थविप्पयुत्तो च धम्मा गन्थविप्पयुत्तस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – दिट्ठिगतविप्पयुत्तलोभसहगता खन्धा च लोभो च चित्तसमुट्ठानानं रूपानं विप्पयुत्तपच्चयेन पच्चयो; दोमनस्ससहगता खन्धा च पटिघञ्च चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयो

९३. गन्थसम्पयुत्तो धम्मो गन्थसम्पयुत्तस्स धम्मस्स अत्थिपच्चयेन पच्चयो… एकं (पटिच्चसदिसं). (१)

गन्थसम्पयुत्तो धम्मो गन्थविप्पयुत्तस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं, विभजितब्बं). (२)

गन्थसम्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स अत्थिपच्चयेन पच्चयो… एकं (पटिच्चसदिसं). (३)

९४. गन्थविप्पयुत्तो धम्मो गन्थविप्पयुत्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं, विभजितब्बं). (१)

गन्थविप्पयुत्तो धम्मो गन्थसम्पयुत्तस्स धम्मस्स अत्थिपच्चयेन पच्चयो – सहजातं, पुरेजातं. सहजातो – दिट्ठिगतविप्पयुत्तो लोभो सम्पयुत्तकानं खन्धानं अत्थिपच्चयेन पच्चयो; दोमनस्ससहगतं पटिघं सम्पयुत्तकानं खन्धानं अत्थिपच्चयेन पच्चयो. पुरेजातं – चक्खुं…पे… वत्थुं अस्सादेति अभिनन्दति, तं आरब्भ गन्थसम्पयुत्तो रागो…पे… दिट्ठि…पे… दोमनस्सं उप्पज्जति, वत्थु गन्थसम्पयुत्तकानं खन्धानं अत्थिपच्चयेन पच्चयो. (२)

गन्थविप्पयुत्तो धम्मो गन्थसम्पयुत्तस्स च गन्थविप्पयुत्तस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – दिट्ठिगतविप्पयुत्तो लोभो सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो; पटिघं सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो. पुरेजातं – चक्खुं…पे… वत्थुं आरब्भ दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च उप्पज्जन्ति, वत्थु दिट्ठिगतविप्पयुत्तलोभसहगतानं खन्धानं लोभस्स च दोमनस्ससहगतानं खन्धानं पटिघस्स च अत्थिपच्चयेन पच्चयो. (३)

९५. गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स धम्मस्स अत्थिपच्चयेन पच्चयो – सहजातं, पुरेजातं. सहजातो – गन्थसम्पयुत्तो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. सहजातो – दिट्ठिगतविप्पयुत्तलोभसहगतो एको खन्धो च लोभो च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… दोमनस्ससहगतो एको खन्धो च पटिघञ्च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. (१)

गन्थसम्पयुत्तो च गन्थविप्पयुत्तो च धम्मा गन्थविप्पयुत्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजाता – गन्थसम्पयुत्ता खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. सहजाता – दिट्ठिगतविप्पयुत्तलोभसहगता खन्धा च लोभो च चित्तसमुट्ठानानं रूपानं अत्थिपच्चयेन पच्चयो. सहजाता – दोमनस्ससहगता खन्धा च पटिघञ्च चित्तसमुट्ठानानं रूपानं अत्थिपच्चयेन पच्चयो; दिट्ठिगतविप्पयुत्तलोभसहगता खन्धा च वत्थु च लोभस्स अत्थिपच्चयेन पच्चयो; दोमनस्ससहगता खन्धा च वत्थु च पटिघस्स अत्थिपच्चयेन पच्चयो. पच्छाजाता – दिट्ठिगतविप्पयुत्तलोभसहगता खन्धा च लोभो च दोमनस्ससहगता खन्धा च पटिघञ्च पुरेजातस्स इमस्स कायस्स अत्थिपच्चयेन पच्चयो. पच्छाजाता – गन्थसम्पयुत्ता खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – गन्थसम्पयुत्ता खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

गन्थसम्पयुत्तो च गन्थविप्पयुत्तो च धम्मा गन्थसम्पयुत्तस्स च गन्थविप्पयुत्तस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – दिट्ठिगतविप्पयुत्तलोभसहगतो एको खन्धो च लोभो च तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा च…पे…. सहजातो – दोमनस्ससहगतो एको खन्धो च पटिघञ्च तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा च…पे…. सहजातो – दिट्ठिगतविप्पयुत्तलोभसहगतो एको खन्धो च वत्थु च तिण्णन्नं खन्धानं लोभस्स च अत्थिपच्चयेन पच्चयो…पे… द्वे खन्धा च…पे…. सहजातो – दोमनस्ससहगतो एको खन्धो च वत्थु च तिण्णन्नं खन्धानं पटिघस्स च अत्थिपच्चयेन पच्चयो…पे… द्वे खन्धा च…पे…. (३)