१. विभङ्गवारो

हेतुपच्चयो

६२. गन्थसम्पयुत्तं धम्मं संसट्ठो गन्थसम्पयुत्तो धम्मो उप्पज्जति हेतुपच्चया – गन्थसम्पयुत्तं एकं खन्धं संसट्ठा तयो खन्धा…पे… द्वे खन्धे…पे…. (१)

गन्थसम्पयुत्तं धम्मं संसट्ठो गन्थविप्पयुत्तो धम्मो उप्पज्जति हेतुपच्चया – दिट्ठिगतविप्पयुत्तलोभसहगते खन्धे संसट्ठो लोभो, दोमनस्ससहगते खन्धे संसट्ठं पटिघं. (२)

गन्थसम्पयुत्तं धम्मं संसट्ठो गन्थसम्पयुत्तो च गन्थविप्पयुत्तो च धम्मा उप्पज्जन्ति हेतुपच्चया – दिट्ठिगतविप्पयुत्तलोभसहगतं एकं खन्धं संसट्ठा तयो खन्धा लोभो च…पे… द्वे खन्धे…पे… दोमनस्ससहगतं एकं खन्धं संसट्ठा तयो खन्धा पटिघञ्च…पे… द्वे खन्धे…पे…. (३)

६३. गन्थविप्पयुत्तं धम्मं संसट्ठो गन्थविप्पयुत्तो धम्मो उप्पज्जति हेतुपच्चया – गन्थविप्पयुत्तं एकं खन्धं संसट्ठा तयो खन्धा…पे… द्वे खन्धे…पे… पटिसन्धिक्खणे…पे…. (१)

गन्थविप्पयुत्तं धम्मं संसट्ठो गन्थसम्पयुत्तो धम्मो उप्पज्जति हेतुपच्चया – दिट्ठिगतविप्पयुत्तं लोभं संसट्ठा सम्पयुत्तका खन्धा, पटिघं संसट्ठा सम्पयुत्तका खन्धा. (२)

गन्थसम्पयुत्तञ्च गन्थविप्पयुत्तञ्च धम्मं संसट्ठो गन्थसम्पयुत्तो धम्मो उप्पज्जति हेतुपच्चया – दिट्ठिगतविप्पयुत्तं लोभसहगतं एकं खन्धञ्च लोभञ्च संसट्ठा तयो खन्धा…पे… द्वे खन्धे…पे… दोमनस्ससहगतं एकं खन्धञ्च पटिघञ्च संसट्ठा तयो खन्धा…पे… द्वे खन्धे…पे… (संखित्तं).