१. विभङ्गवारो

हेतुपच्चयो

१. गन्थं धम्मं पटिच्च गन्थो धम्मो उप्पज्जति हेतुपच्चया – सीलब्बतपरामासं कायगन्थं पटिच्च अभिज्झाकायगन्थो, अभिज्झाकायगन्थं पटिच्च सीलब्बतपरामासो कायगन्थो, इदंसच्चाभिनिवेसं कायगन्थं पटिच्च अभिज्झाकायगन्थो, अभिज्झाकायगन्थं पटिच्च इदंसच्चाभिनिवेसो कायगन्थो. (१)

गन्थं धम्मं पटिच्च नोगन्थो धम्मो उप्पज्जति हेतुपच्चया – गन्थे पटिच्च सम्पयुत्तका खन्धा चित्तसमुट्ठानञ्च रूपं. (२)

गन्थं धम्मं पटिच्च गन्थो च नोगन्थो च धम्मा उप्पज्जन्ति हेतुपच्चया – सीलब्बतपरामासं कायगन्थं पटिच्च अभिज्झाकायगन्थो सम्पयुत्तका च खन्धा चित्तसमुट्ठानञ्च रूपं (चक्कं). (३)

२. नोगन्थं धम्मं पटिच्च नोगन्थो धम्मो उप्पज्जति हेतुपच्चया – नोगन्थं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे…. (१)

नोगन्थं धम्मं पटिच्च गन्थो धम्मो उप्पज्जति हेतुपच्चया – नोगन्थे खन्धे पटिच्च गन्था. (२)

नोगन्थं धम्मं पटिच्च गन्थो च नोगन्थो च धम्मा उप्पज्जन्ति हेतुपच्चया – नोगन्थं एकं खन्धं पटिच्च तयो खन्धा गन्था च चित्तसमुट्ठानञ्च रूपं…पे… द्वे खन्धे…पे…. (३)

३. गन्थञ्च नोगन्थञ्च धम्मं पटिच्च गन्थो धम्मो उप्पज्जति हेतुपच्चया – सीलब्बतपरामासं कायगन्थञ्च सम्पयुत्तके च खन्धे पटिच्च अभिज्झाकायगन्थो (चक्कं). (१)

गन्थञ्च नोगन्थञ्च धम्मं पटिच्च नोगन्थो धम्मो उप्पज्जति हेतुपच्चया – नोगन्थं एकं खन्धञ्च गन्थे च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… गन्थे च सम्पयुत्तके खन्धे च पटिच्च चित्तसमुट्ठानं रूपं. (२)

गन्थञ्च नोगन्थञ्च धम्मं पटिच्च गन्थो च नोगन्थो च धम्मा उप्पज्जन्ति हेतुपच्चया – नोगन्थं एकं खन्धञ्च सीलब्बतपरामासकायगन्थञ्च पटिच्च तयो खन्धा अभिज्झाकायगन्थो चित्तसमुट्ठानञ्च रूपं…पे… द्वे खन्धे च…पे…. (चक्कं. संखित्तं.) (३)

आरम्मणपच्चया…पे… अविगतपच्चया.