१. विभङ्गवारो

हेतुपच्चयो

१८. गन्थो धम्मो गन्थस्स धम्मस्स हेतुपच्चयेन पच्चयो – गन्था हेतू सम्पयुत्तकानं गन्थानं हेतुपच्चयेन पच्चयो. (१)

गन्थो धम्मो नोगन्थस्स धम्मस्स हेतुपच्चयेन पच्चयो – गन्था हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (२)

गन्थो धम्मो गन्थस्स च नोगन्थस्स च धम्मस्स हेतुपच्चयेन पच्चयो – गन्था हेतू सम्पयुत्तकानं खन्धानं गन्थानञ्च चित्तसमुट्ठानानञ्च रूपानं हेतुपच्चयेन पच्चयो. (३)

१९. नोगन्थो धम्मो नोगन्थस्स धम्मस्स हेतुपच्चयेन पच्चयो – नोगन्था हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

नोगन्थो धम्मो गन्थस्स धम्मस्स हेतुपच्चयेन पच्चयो – नोगन्था हेतू सम्पयुत्तकानं गन्थानं हेतुपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स हेतुपच्चयेन पच्चयो – नोगन्था हेतू सम्पयुत्तकानं खन्धानं गन्थानञ्च चित्तसमुट्ठानानञ्च रूपानं हेतुपच्चयेन पच्चयो. (३)

२०. गन्थो च नोगन्थो च धम्मा गन्थस्स धम्मस्स हेतुपच्चयेन पच्चयो – गन्था च नोगन्था च हेतू सम्पयुत्तकानं गन्थानं हेतुपच्चयेन पच्चयो. (१)

गन्थो च नोगन्थो च धम्मा नोगन्थस्स धम्मस्स हेतुपच्चयेन पच्चयो – गन्था च नोगन्था च हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (२)

गन्थो च नोगन्थो च धम्मा गन्थस्स च नोगन्थस्स च धम्मस्स हेतुपच्चयेन पच्चयो – गन्था च नोगन्था च हेतू सम्पयुत्तकानं खन्धानं गन्थानञ्च चित्तसमुट्ठानानञ्च रूपानं हेतुपच्चयेन पच्चयो. (३)

आरम्मणपच्चयो

२१. गन्थो धम्मो गन्थस्स धम्मस्स आरम्मणपच्चयेन पच्चयो – गन्थे आरब्भ गन्था उप्पज्जन्ति. (मूलं कातब्बं) गन्थे आरब्भ नोगन्था खन्धा उप्पज्जन्ति. (मूलं कातब्बं) गन्थे आरब्भ गन्था च सम्पयुत्तका च खन्धा उप्पज्जन्ति. (३)

२२. नोगन्थो धम्मो नोगन्थस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया नोगन्थे पहीने किलेसे…पे… विक्खम्भिते किलेसे पच्चवेक्खन्ति, पुब्बे…पे… चक्खुं…पे… वत्थुं नोगन्थे खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नोगन्थचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नोगन्था खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोगन्थो धम्मो गन्थस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति, दोमनस्सं उप्पज्जति; पुब्बे सुचिण्णानि…पे… झाना…पे… चक्खुं…पे… वत्थुं नोगन्थे खन्धे अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. (२)

नोगन्थो धम्मो गन्थस्स च नोगन्थस्स च धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं अस्सादेति अभिनन्दति, तं आरब्भ गन्था च सम्पयुत्तका च खन्धा उप्पज्जन्ति, पुब्बे सुचिण्णानि…पे… झाना…पे… चक्खुं…पे… वत्थुं नोगन्थे खन्धे अस्सादेति अभिनन्दति, तं आरब्भ गन्था च सम्पयुत्तका च खन्धा उप्पज्जन्ति. (३)

गन्थो च नोगन्थो च धम्मा गन्थस्स धम्मस्स आरम्मणपच्चयेन पच्चयो… तीणि (आरब्भ कातब्बा).

अधिपतिपच्चयो

२३. गन्थो धम्मो गन्थस्स धम्मस्स अधिपतिपच्चयेन पच्चयो… तीणि (आरम्मणसदिसा, गरुकारम्मणा कातब्बा).

नोगन्थो धम्मो नोगन्थस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना…पे… अरिया मग्गा…पे… फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं नोगन्थे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोगन्थाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नोगन्थो धम्मो गन्थस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे सुचिण्णानि …पे… झाना…पे… चक्खुं…पे… वत्थुं नोगन्थे खन्धे गरुं कत्वा तं अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोगन्थाधिपति गन्थानं अधिपतिपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… नोगन्थे खन्धे गरुं कत्वा अस्सादेति अभिनन्दति, तं गरुं कत्वा गन्था च सम्पयुत्तका च खन्धा उप्पज्जन्ति. सहजाताधिपति – नोगन्थाधिपति सम्पयुत्तकानं खन्धानं गन्थानञ्च चित्तसमुट्ठानानञ्च रूपानं अधिपतिपच्चयेन पच्चयो. (३)

२४. गन्थो च नोगन्थो च धम्मा गन्थस्स धम्मस्स अधिपतिपच्चयेन पच्चयो – आरम्मणाधिपति… तीणि.

अनन्तरपच्चयो

२५. गन्थो धम्मो गन्थस्स धम्मस्स अनन्तरपच्चयेन पच्चयो – पुरिमा पुरिमा गन्था पच्छिमानं पच्छिमानं गन्थानं अनन्तरपच्चयेन पच्चयो. (१)

गन्थो धम्मो नोगन्थस्स धम्मस्स अनन्तरपच्चयेन पच्चयो – पुरिमा पुरिमा गन्था पच्छिमानं पच्छिमानं नोगन्थानं खन्धानं अनन्तरपच्चयेन पच्चयो; गन्था वुट्ठानस्स अनन्तरपच्चयेन पच्चयो. (२)

गन्थो धम्मो गन्थस्स च नोगन्थस्स च धम्मस्स अनन्तरपच्चयेन पच्चयो – पुरिमा पुरिमा गन्था पच्छिमानं पच्छिमानं गन्थानं सम्पयुत्तकानञ्च खन्धानं अनन्तरपच्चयेन पच्चयो. (३)

२६. नोगन्थो धम्मो नोगन्थस्स धम्मस्स अनन्तरपच्चयेन पच्चयो… तीणि (द्वे आवज्जना कातब्बा, पठमो नत्थि).

गन्थो च नोगन्थो च धम्मा गन्थस्स धम्मस्स अनन्तरपच्चयेन पच्चयो… तीणि (एकम्पि वुट्ठानं कातब्बं, मज्झे).

समनन्तरपच्चयादि

२७. गन्थो धम्मो गन्थस्स धम्मस्स समनन्तरपच्चयेन पच्चयो… नव… सहजातपच्चयेन पच्चयो… नव… अञ्ञमञ्ञपच्चयेन पच्चयो… नव, निस्सयपच्चयेन पच्चयो… नव.

उपनिस्सयपच्चयो

२८. गन्थो धम्मो गन्थस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – गन्था गन्थानं उपनिस्सयपच्चयेन पच्चयो… तीणि.

२९. नोगन्थो धम्मो नोगन्थस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो …पे…. पकतूपनिस्सयो – सद्धं उपनिस्साय दानं देति…पे… मानं जप्पेति, दिट्ठिं गण्हाति; सीलं…पे… सेनासनं उपनिस्साय दानं देति…पे… सङ्घं भिन्दति; सद्धा…पे… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

नोगन्थो धम्मो गन्थस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दिट्ठिं गण्हाति; सीलं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स…पे… पत्थनाय उपनिस्सयपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति, सीलं…पे… सेनासनं उपनिस्साय पाणं हनति …पे… सङ्घं भिन्दति, सद्धा…पे… सेनासनं गन्थानं सम्पयुत्तकानञ्च खन्धानं उपनिस्सयपच्चयेन पच्चयो. (३)

गन्थो च नोगन्थो च धम्मा गन्थस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो… तीणि (आरम्मणनयेन कातब्बा).

पुरेजातपच्चयादि

३०. नोगन्थो धम्मो नोगन्थस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नोगन्थानं खन्धानं पुरेजातपच्चयेन पच्चयो. (१)

नोगन्थो धम्मो गन्थस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति, दोमनस्सं उप्पज्जति. वत्थुपुरेजातं – वत्थु गन्थानं पुरेजातपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ गन्था च सम्पयुत्तका च खन्धा उप्पज्जन्ति. वत्थुपुरेजातं – वत्थु गन्थानं सम्पयुत्तकानञ्च खन्धानं पुरेजातपच्चयेन पच्चयो. (३)

पच्छाजातपच्चयेन पच्चयो… तीणि, आसेवनपच्चयेन पच्चयो… नव.

कम्मपच्चयो

३१. नोगन्थो धम्मो नोगन्थस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नोगन्था चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोगन्था चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

नोगन्थो धम्मो गन्थस्स धम्मस्स कम्मपच्चयेन पच्चयो – नोगन्था चेतना सम्पयुत्तकानं गन्थानं कम्मपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स कम्मपच्चयेन पच्चयो – नोगन्था चेतना सम्पयुत्तकानं खन्धानं गन्थानञ्च चित्तसमुट्ठानानञ्च रूपानं कम्मपच्चयेन पच्चयो. (३)

विपाकपच्चयादि

३२. नोगन्थो धम्मो नोगन्थस्स धम्मस्स विपाकपच्चयेन पच्चयो… एकं… आहारपच्चयेन पच्चयो… तीणि… इन्द्रियपच्चयेन पच्चयो… तीणि… झानपच्चयेन पच्चयो… तीणि… मग्गपच्चयेन पच्चयो… नव… सम्पयुत्तपच्चयेन पच्चयो… नव.

विप्पयुत्तपच्चयो

३३. गन्थो धम्मो नोगन्थस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नोगन्थो धम्मो नोगन्थस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

नोगन्थो धम्मो गन्थस्स धम्मस्स विप्पयुत्तपच्चयेन पच्चयो. पुरेजातं – वत्थु गन्थानं विप्पयुत्तपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स विप्पयुत्तपच्चयेन पच्चयो. पुरेजातं – वत्थु गन्थानं सम्पयुत्तकानञ्च खन्धानं विप्पयुत्तपच्चयेन पच्चयो. (३)

गन्थो च नोगन्थो च धम्मा नोगन्थस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

अत्थिपच्चयो

३४. गन्थो धम्मो गन्थस्स धम्मस्स अत्थिपच्चयेन पच्चयो… एकं (पटिच्चसदिसं).

गन्थो धम्मो नोगन्थस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – गन्था सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो. पच्छाजाता – गन्था पुरेजातस्स इमस्स कायस्स अत्थिपच्चयेन पच्चयो. (२)

गन्थो धम्मो गन्थस्स च नोगन्थस्स च धम्मस्स अत्थिपच्चयेन पच्चयो… एकं (पटिच्चसदिसं). (३)

३५. नोगन्थो धम्मो नोगन्थस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नोगन्थो धम्मो गन्थस्स धम्मस्स अत्थिपच्चयेन पच्चयो – सहजातं, पुरेजातं. सहजाता – नोगन्था खन्धा गन्थानं अत्थिपच्चयेन पच्चयो. पुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति, दोमनस्सं उप्पज्जति, वत्थु गन्थानं अत्थिपच्चयेन पच्चयो. (२)

नोगन्थो धम्मो गन्थस्स च नोगन्थस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – नोगन्थो एको खन्धो तिण्णन्नं खन्धानं गन्थानञ्च चित्तसमुट्ठानानञ्च रूपानं अत्थिपच्चयेन पच्चयो…पे…. पुरेजातं – चक्खुं…पे… वत्थुं अस्सादेति अभिनन्दति, तं आरब्भ गन्था च सम्पयुत्तका च खन्धा उप्पज्जन्ति; वत्थु गन्थानं सम्पयुत्तकानञ्च खन्धानं अत्थिपच्चयेन पच्चयो. (३)

३६. गन्थो च नोगन्थो च धम्मा गन्थस्स धम्मस्स अत्थिपच्चयेन पच्चयो – सहजातं, पुरेजातं. सहजातो – सीलब्बतपरामासो कायगन्थो च सम्पयुत्तका च खन्धा अभिज्झाकायगन्थस्स अत्थिपच्चयेन पच्चयो (चक्कं). सहजातो – सीलब्बतपरामासो कायगन्थो च वत्थु च अभिज्झाकायगन्थस्स अत्थिपच्चयेन पच्चयो. (चक्कं). (१)

गन्थो च नोगन्थो च धम्मा नोगन्थस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नोगन्थो एको खन्धो च गन्थो च तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा च…पे…. सहजाता – गन्था च वत्थु च नोगन्थानं खन्धानं अत्थिपच्चयेन पच्चयो. सहजाता – गन्था च महाभूता च चित्तसमुट्ठानानञ्च रूपानं अत्थिपच्चयेन पच्चयो. पच्छाजाता – गन्था च सम्पयुत्तका च खन्धा पुरेजातस्स इमस्स कायस्स अत्थिपच्चयेन पच्चयो. पच्छाजाता – गन्था च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – गन्था च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

गन्थो च नोगन्थो च धम्मा गन्थस्स च नोगन्थस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – नोगन्थो एको खन्धो च सीलब्बतपरामासो कायगन्थो च तिण्णन्नं खन्धानं अभिज्झाकायगन्थस्स च चित्तसमुट्ठानानञ्च रूपानं अत्थिपच्चयेन पच्चयो…पे…. सहजातो – सीलब्बतपरामासो कायगन्थो च वत्थु च अभिज्झाकायगन्थस्स च सम्पयुत्तकानञ्च खन्धानं अत्थिपच्चयेन पच्चयो (चक्कं). (३)