१. विभङ्गवारो

हेतुपच्चयो

११. गन्थं धम्मं पच्चया गन्थो धम्मो उप्पज्जति हेतुपच्चया… तीणि (पटिच्चवारसदिसो).

नोगन्थं धम्मं पच्चया नोगन्थो धम्मो उप्पज्जति हेतुपच्चया – नोगन्थं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा. एकं महाभूतं…पे… वत्थुं पच्चया नोगन्था खन्धा. (१)

नोगन्थं धम्मं पच्चया गन्थो धम्मो उप्पज्जति हेतुपच्चया – नोगन्थे खन्धे पच्चया गन्था, वत्थुं पच्चया गन्था. (२)

नोगन्थं धम्मं पच्चया गन्थो च नोगन्थो च धम्मा उप्पज्जन्ति हेतुपच्चया – नोगन्थं एकं खन्धं पच्चया तयो खन्धा गन्था च चित्तसमुट्ठानञ्च रूपं…पे… द्वे खन्धे…पे… वत्थुं पच्चया गन्था सम्पयुत्तका च खन्धा. (३)

१२. गन्थञ्च नोगन्थञ्च धम्मं पच्चया गन्थो धम्मो उप्पज्जति हेतुपच्चया – सीलब्बतपरामासं कायगन्थञ्च सम्पयुत्तके च खन्धे पच्चया अभिज्झाकायगन्थो (चक्कं). सीलब्बतपरामासं कायगन्थञ्च वत्थुञ्च पच्चया अभिज्झाकायगन्थो (चक्कं). (१)

गन्थञ्च नोगन्थञ्च धम्मं पच्चया नोगन्थो धम्मो उप्पज्जति हेतुपच्चया – नोगन्थं एकं खन्धञ्च गन्थे च पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… गन्थे च वत्थुञ्च पच्चया नोगन्था खन्धा. (२)

गन्थञ्च नोगन्थञ्च धम्मं पच्चया गन्थो च नोगन्थो च धम्मा उप्पज्जन्ति हेतुपच्चया – नोगन्थं एकं खन्धञ्च सीलब्बतपरामासं कायगन्थञ्च पच्चया तयो खन्धा अभिज्झाकायगन्थो च चित्तसमुट्ठानञ्च रूपं…पे… द्वे खन्धे…पे… (चक्कं). सीलब्बतपरामासं कायगन्थञ्च वत्थुञ्च पच्चया अभिज्झाकायगन्थो च सम्पयुत्तका च खन्धा (चक्कं). (३)