१. विभङ्गवारो

हेतुपच्चयो

१०६. सञ्ञोजनो चेव सञ्ञोजनसम्पयुत्तो च धम्मो सञ्ञोजनस्स चेव सञ्ञोजनसम्पयुत्तस्स च धम्मस्स हेतुपच्चयेन पच्चयो – कामरागसञ्ञोजनो दिट्ठिसञ्ञोजनस्स अविज्जासञ्ञोजनस्स हेतुपच्चयेन पच्चयो (चक्कं). (१)

सञ्ञोजनो चेव सञ्ञोजनसम्पयुत्तो च धम्मो सञ्ञोजनसम्पयुत्तस्स चेव नो च सञ्ञोजनस्स धम्मस्स हेतुपच्चयेन पच्चयो – सञ्ञोजना चेव सञ्ञोजनसम्पयुत्ता च हेतू सम्पयुत्तकानं खन्धानं हेतुपच्चयेन पच्चयो. (२)

सञ्ञोजनो चेव सञ्ञोजनसम्पयुत्तो च धम्मो सञ्ञोजनस्स चेव सञ्ञोजनसम्पयुत्तस्स च सञ्ञोजनसम्पयुत्तस्स चेव नो च सञ्ञोजनस्स च धम्मस्स हेतुपच्चयेन पच्चयो – कामरागसञ्ञोजनो दिट्ठिसञ्ञोजनस्स अविज्जासञ्ञोजनस्स सम्पयुत्तकानञ्च खन्धानं हेतुपच्चयेन पच्चयो (चक्कं). (३)

आरम्मणपच्चयो

१०७. सञ्ञोजनो चेव सञ्ञोजनसम्पयुत्तो च धम्मो सञ्ञोजनस्स चेव सञ्ञोजनसम्पयुत्तस्स च धम्मस्स आरम्मणपच्चयेन पच्चयो – सञ्ञोजने आरब्भ सञ्ञोजना उप्पज्जन्ति. (मूलं कातब्बं) सञ्ञोजने आरब्भ सञ्ञोजनसम्पयुत्ता चेव नो च सञ्ञोजना खन्धा उप्पज्जन्ति. (मूलं कातब्बं) सञ्ञोजने आरब्भ सञ्ञोजना च सञ्ञोजनसम्पयुत्तका च खन्धा उप्पज्जन्ति. (१)

सञ्ञोजनसम्पयुत्तो चेव नो च सञ्ञोजनो धम्मो सञ्ञोजनसम्पयुत्तस्स चेव नो च सञ्ञोजनस्स धम्मस्स आरम्मणपच्चयेन पच्चयो – सञ्ञोजनसम्पयुत्ते चेव नो च सञ्ञोजने खन्धे आरब्भ सञ्ञोजनसम्पयुत्ता चेव नो च सञ्ञोजना खन्धा उप्पज्जन्ति. (१)

सञ्ञोजनसम्पयुत्तो चेव नो च सञ्ञोजनो धम्मो सञ्ञोजनस्स चेव सञ्ञोजनसम्पयुत्तस्स च धम्मस्स आरम्मणपच्चयेन पच्चयो – सञ्ञोजनसम्पयुत्ते चेव नो च सञ्ञोजने खन्धे आरब्भ सञ्ञोजना उप्पज्जन्ति. (२)

सञ्ञोजनसम्पयुत्तो चेव नो च सञ्ञोजनो धम्मो सञ्ञोजनस्स चेव सञ्ञोजनसम्पयुत्तस्स च सञ्ञोजनसम्पयुत्तस्स चेव नो च सञ्ञोजनस्स च धम्मस्स आरम्मणपच्चयेन पच्चयो – सञ्ञोजनसम्पयुत्ते चेव नो च सञ्ञोजने खन्धे आरब्भ सञ्ञोजना च सञ्ञोजनसम्पयुत्तका च खन्धा उप्पज्जन्ति. (३)

सञ्ञोजनो चेव सञ्ञोजनसम्पयुत्तो च सञ्ञोजनसम्पयुत्तो चेव नो च सञ्ञोजनो च धम्मा सञ्ञोजनस्स चेव सञ्ञोजनसम्पयुत्तस्स च धम्मस्स आरम्मणपच्चयेन पच्चयो… तीणि.

अधिपतिपच्चयो

१०८. सञ्ञोजनो चेव सञ्ञोजनसम्पयुत्तो च धम्मो सञ्ञोजनस्स चेव सञ्ञोजनसम्पयुत्तस्स च धम्मस्स अधिपतिपच्चयेन पच्चयो – आरम्मणाधिपति… तीणि.

सञ्ञोजनसम्पयुत्तो चेव नो च सञ्ञोजनो धम्मो सञ्ञोजनसम्पयुत्तस्स चेव नो च सञ्ञोजनस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि (इमासु तीसुपि पञ्हासु आरम्मणाधिपतिपि सहजाताधिपतिपि कातब्बा).

सञ्ञोजनो चेव सञ्ञोजनसम्पयुत्तो च सञ्ञोजनसम्पयुत्तो चेव नो च सञ्ञोजनो च धम्मा सञ्ञोजनस्स चेव सञ्ञोजनसम्पयुत्तस्स च धम्मस्स अधिपतिपच्चयेन पच्चयो – आरम्मणाधिपति… तीणि.

अनन्तरपच्चयादि

१०९. सञ्ञोजनो चेव सञ्ञोजनसम्पयुत्तो च धम्मो सञ्ञोजनस्स चेव सञ्ञोजनसम्पयुत्तस्स च धम्मस्स अनन्तरपच्चयेन पच्चयो… नव (निन्नानाकरणं, विभजना नत्थि. आरम्मणसदिसा)… समनन्तरपच्चयेन पच्चयो… नव… सहजातपच्चयेन पच्चयो… नव… अञ्ञमञ्ञपच्चयेन पच्चयो… नव… निस्सयपच्चयेन पच्चयो… नव… उपनिस्सयपच्चयेन पच्चयो… नव (आरम्मणनयेन कातब्बा)… आसेवनपच्चयेन पच्चयो… नव.

कम्मपच्चयादि

११०. सञ्ञोजनसम्पयुत्तो चेव नो च सञ्ञोजनो धम्मो सञ्ञोजनसम्पयुत्तस्स चेव नो च सञ्ञोजनस्स धम्मस्स कम्मपच्चयेन पच्चयो… तीणि… आहारपच्चयेन पच्चयो… तीणि… इन्द्रियपच्चयेन पच्चयो… तीणि… झानपच्चयेन पच्चयो… तीणि… मग्गपच्चयेन पच्चयो… नव … सम्पयुत्तपच्चयेन पच्चयो… नव… अत्थिपच्चयेन पच्चयो … नव… नत्थिपच्चयेन पच्चयो… नव… विगतपच्चयेन पच्चयो… नव… अविगतपच्चयेन पच्चयो… नव.