१. विभङ्गवारो

हेतुपच्चयो

१००. सञ्ञोजनञ्चेव सञ्ञोजनसम्पयुत्तञ्च धम्मं पटिच्च सञ्ञोजनो चेव सञ्ञोजनसम्पयुत्तो च धम्मो उप्पज्जति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं (चक्कं). (१)

सञ्ञोजनञ्चेव सञ्ञोजनसम्पयुत्तञ्च धम्मं पटिच्च सञ्ञोजनसम्पयुत्तो चेव नो च सञ्ञोजनो धम्मो उप्पज्जति हेतुपच्चया – सञ्ञोजने पटिच्च सम्पयुत्तका खन्धा. (२)

सञ्ञोजनञ्चेव सञ्ञोजनसम्पयुत्तञ्च धम्मं पटिच्च सञ्ञोजनो चेव सञ्ञोजनसम्पयुत्तो च सञ्ञोजनसम्पयुत्तो चेव नो च सञ्ञोजनो च धम्मा उप्पज्जन्ति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं सम्पयुत्तका च खन्धा (चक्कं). (३)

१०१. सञ्ञोजनसम्पयुत्तञ्चेव नो च सञ्ञोजनं धम्मं पटिच्च सञ्ञोजनसम्पयुत्तो चेव नो च सञ्ञोजनो धम्मो उप्पज्जति हेतुपच्चया – सञ्ञोजनसम्पयुत्तञ्चेव नो च सञ्ञोजनं एकं खन्धं पटिच्च तयो खन्धा…पे… द्वे खन्धे…पे…. (१)

सञ्ञोजनसम्पयुत्तञ्चेव नो च सञ्ञोजनं धम्मं पटिच्च सञ्ञोजनो चेव सञ्ञोजनसम्पयुत्तो च धम्मो उप्पज्जति हेतुपच्चया – सञ्ञोजनसम्पयुत्ते चेव नो च सञ्ञोजने खन्धे पटिच्च सञ्ञोजना (२)

सञ्ञोजनसम्पयुत्तञ्चेव नो च सञ्ञोजनं धम्मं पटिच्च सञ्ञोजनो चेव सञ्ञोजनसम्पयुत्तो च सञ्ञोजनसम्पयुत्तो चेव नो च सञ्ञोजनो च धम्मा उप्पज्जन्ति हेतुपच्चया – सञ्ञोजनसम्पयुत्तञ्चेव नो च सञ्ञोजनं एकं खन्धं पटिच्च तयो खन्धा सञ्ञोजना च…पे… द्वे खन्धे…पे…. (३)

१०२. सञ्ञोजनञ्चेव सञ्ञोजनसम्पयुत्तञ्च सञ्ञोजनसम्पयुत्तञ्चेव नो च सञ्ञोजनञ्च धम्मं पटिच्च सञ्ञोजनो चेव सञ्ञोजनसम्पयुत्तो च धम्मो उप्पज्जति हेतुपच्चया – कामरागसञ्ञोजनञ्च सम्पयुत्तके च खन्धे पटिच्च दिट्ठिसञ्ञोजनं अविज्जासञ्ञोजनं (चक्कं). (१)

सञ्ञोजनञ्चेव सञ्ञोजनसम्पयुत्तञ्च सञ्ञोजनसम्पयुत्तञ्चेव नो च सञ्ञोजनञ्च धम्मं पटिच्च सञ्ञोजनसम्पयुत्तो चेव नो च सञ्ञोजनो धम्मो उप्पज्जति हेतुपच्चया – सञ्ञोजनसम्पयुत्तञ्चेव नो च सञ्ञोजनं एकं खन्धञ्च सञ्ञोजने च पटिच्च तयो खन्धा…पे… द्वे खन्धे च…पे…. (२)

सञ्ञोजनञ्चेव सञ्ञोजनसम्पयुत्तञ्च सञ्ञोजनसम्पयुत्तञ्चेव नो च सञ्ञोजनञ्च धम्मं पटिच्च सञ्ञोजनो चेव सञ्ञोजनसम्पयुत्तो च सञ्ञोजनसम्पयुत्तो चेव नो च सञ्ञोजनो च धम्मा उप्पज्जन्ति हेतुपच्चया – सञ्ञोजनसम्पयुत्तञ्चेव नो च सञ्ञोजनं एकं खन्धञ्च कामरागसञ्ञोजनञ्च पटिच्च तयो खन्धा दिट्ठिसञ्ञोजनं अविज्जासञ्ञोजनं…पे… द्वे खन्धे च…पे… (चक्कं). (३)