१. विभङ्गवारो

हेतुपच्चयो

९७. सञ्ञोजनञ्चेव सञ्ञोजनियञ्च धम्मं पटिच्च सञ्ञोजनो चेव सञ्ञोजनियो च धम्मा उप्पज्जन्ति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं (चक्कं). (१)

सञ्ञोजनञ्चेव सञ्ञोजनियञ्च धम्मं पटिच्च सञ्ञोजनियो चेव नो च सञ्ञोजनो धम्मो उप्पज्जति हेतुपच्चया – सञ्ञोजने पटिच्च सम्पयुत्तका खन्धा चित्तसमुट्ठानञ्च रूपं. (२)

सञ्ञोजनञ्चेव सञ्ञोजनियञ्च धम्मं पटिच्च सञ्ञोजनो चेव सञ्ञोजनियो च सञ्ञोजनियो चेव नो च सञ्ञोजनो च धम्मा उप्पज्जन्ति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं सम्पयुत्तका खन्धा चित्तसमुट्ठानञ्च रूपं (चक्कं). (३)

९८. सञ्ञोजनियञ्चेव नो च सञ्ञोजनं धम्मं पटिच्च सञ्ञोजनियो चेव नो च सञ्ञोजनो धम्मो उप्पज्जति हेतुपच्चया – सञ्ञोजनियञ्चेव नो च सञ्ञोजनं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव महाभूता). (१)

सञ्ञोजनियञ्चेव नो च सञ्ञोजनं धम्मं पटिच्च सञ्ञोजनो चेव सञ्ञोजनियो च धम्मो उप्पज्जति हेतुपच्चया – सञ्ञोजनिये चेव नो च सञ्ञोजने खन्धे पटिच्च सञ्ञोजना. (२)

सञ्ञोजनियञ्चेव नो च सञ्ञोजनं धम्मं पटिच्च सञ्ञोजनो चेव सञ्ञोजनियो च सञ्ञोजनियो चेव नो च सञ्ञोजनो च धम्मा उप्पज्जन्ति हेतुपच्चया – सञ्ञोजनियञ्चेव नो च सञ्ञोजनं एकं खन्धं पटिच्च तयो खन्धा सञ्ञोजना च चित्तसमुट्ठानञ्च रूपं…पे… द्वे खन्धे…पे…. (३)

९९. सञ्ञोजनञ्चेव सञ्ञोजनियञ्च सञ्ञोजनियञ्चेव नो च सञ्ञोजनं धम्मं पटिच्च सञ्ञोजनो चेव सञ्ञोजनियो च धम्मो उप्पज्जति हेतुपच्चया – कामरागसञ्ञोजनञ्च सम्पयुत्तके च खन्धे पटिच्च दिट्ठिसञ्ञोजनं अविज्जासञ्ञोजनं (चक्कं). (१)

सञ्ञोजनञ्चेव सञ्ञोजनियञ्च सञ्ञोजनियञ्चेव नो च सञ्ञोजनञ्च धम्मं पटिच्च सञ्ञोजनियो चेव नो च सञ्ञोजनो धम्मो उप्पज्जति हेतुपच्चया – सञ्ञोजनियञ्चेव नो च सञ्ञोजनं एकं खन्धञ्च सञ्ञोजने च पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (२)

सञ्ञोजनञ्चेव सञ्ञोजनियञ्च सञ्ञोजनियञ्चेव नो च सञ्ञोजनञ्च धम्मं पटिच्च सञ्ञोजनो चेव सञ्ञोजनियो च सञ्ञोजनियो चेव नो च सञ्ञोजनो च धम्मा उप्पज्जन्ति हेतुपच्चया – सञ्ञोजनियञ्चेव नो च सञ्ञोजनं एकं खन्धञ्च कामरागसञ्ञोजनञ्च पटिच्च तयो खन्धा दिट्ठिसञ्ञोजनं अविज्जासञ्ञोजनं चित्तसमुट्ठानञ्च रूपं…पे… द्वे खन्धे च…पे… (चक्कं बन्धितब्बं). (३)

(सञ्ञोजनगोच्छके पठमदुकसदिसं.)

(एवं इमम्पि दुकं वित्थारेतब्बं, निन्नानाकरणं ठपेत्वा लोकुत्तरं).

सञ्ञोजनसञ्ञोजनियदुकं निट्ठितं.