१. विभङ्गवारो

हेतुपच्चयो

१. सञ्ञोजनं धम्मं पटिच्च सञ्ञोजनो धम्मो उप्पज्जति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं, कामरागसञ्ञोजनं पटिच्च सीलब्बतपरामाससञ्ञोजनं अविज्जासञ्ञोजनं, कामरागसञ्ञोजनं पटिच्च मानसञ्ञोजनं अविज्जासञ्ञोजनं, कामरागसञ्ञोजनं पटिच्च अविज्जासञ्ञोजनं, पटिघसञ्ञोजनं पटिच्च इस्सासञ्ञोजनं अविज्जासञ्ञोजनं, पटिघसञ्ञोजनं पटिच्च मच्छरियसञ्ञोजनं अविज्जासञ्ञोजनं, पटिघसञ्ञोजनं पटिच्च अविज्जासञ्ञोजनं, मानसञ्ञोजनं पटिच्च भवरागसञ्ञोजनं अविज्जासञ्ञोजनं, भवरागसञ्ञोजनं पटिच्च अविज्जासञ्ञोजनं, विचिकिच्छासञ्ञोजनं पटिच्च अविज्जासञ्ञोजनं. (१)

सञ्ञोजनं धम्मं पटिच्च नोसञ्ञोजनो धम्मो उप्पज्जति हेतुपच्चया – सञ्ञोजने पटिच्च सम्पयुत्तका खन्धा चित्तसमुट्ठानञ्च रूपं. (२)

सञ्ञोजनं धम्मं पटिच्च सञ्ञोजनो च नोसञ्ञोजनो च धम्मा उप्पज्जन्ति हेतुपच्चया – कामरागसञ्ञोजनं पटिच्च दिट्ठिसञ्ञोजनं अविज्जासञ्ञोजनं सम्पयुत्तका च खन्धा चित्तसमुट्ठानञ्च रूपं (चक्कं बन्धितब्बं). (३)

२. नोसञ्ञोजनं धम्मं पटिच्च नोसञ्ञोजनो धम्मो उप्पज्जति हेतुपच्चया – नोसञ्ञोजनं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

नोसञ्ञोजनं धम्मं पटिच्च सञ्ञोजनो धम्मो उप्पज्जति हेतुपच्चया – नोसञ्ञोजने खन्धे पटिच्च सञ्ञोजना. (२)

नोसञ्ञोजनं धम्मं पटिच्च सञ्ञोजनो च नोसञ्ञोजनो च धम्मा उप्पज्जन्ति हेतुपच्चया – नोसञ्ञोजनं एकं खन्धं पटिच्च तयो खन्धा सञ्ञोजना च चित्तसमुट्ठानञ्च रूपं…पे… द्वे खन्धे…पे…. (३)

३. सञ्ञोजनञ्च नोसञ्ञोजनञ्च धम्मं पटिच्च सञ्ञोजनो धम्मो उप्पज्जति हेतुपच्चया – कामरागसञ्ञोजनञ्च सम्पयुत्तके च खन्धे पटिच्च दिट्ठिसञ्ञोजनं अविज्जासञ्ञोजनं (चक्कं बन्धितब्बं). (१)

सञ्ञोजनञ्च नोसञ्ञोजनञ्च धम्मं पटिच्च नोसञ्ञोजनो धम्मो उप्पज्जति हेतुपच्चया – नोसञ्ञोजनं एकं खन्धञ्च सञ्ञोजने च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे…. (२)

सञ्ञोजनञ्च नोसञ्ञोजनञ्च धम्मं पटिच्च सञ्ञोजनो च नोसञ्ञोजनो च धम्मा उप्पज्जन्ति हेतुपच्चया – नोसञ्ञोजनं एकं खन्धञ्च कामरागसञ्ञोजनञ्च पटिच्च तयो खन्धा दिट्ठिसञ्ञोजनं अविज्जासञ्ञोजनं चित्तसमुट्ठानञ्च रूपं…पे… (चक्कं बन्धितब्बं). (३)

(आरम्मणपच्चये रूपं नत्थि. अधिपतिपच्चयो हेतुसदिसो, विचिकिच्छासञ्ञोजनं नत्थि.) अनन्तरपच्चया…पे… अविगतपच्चया.