१. विभङ्गवारो

हेतुपच्चयो

४०. सञ्ञोजनसम्पयुत्तं धम्मं पटिच्च सञ्ञोजनसम्पयुत्तो धम्मो उप्पज्जति हेतुपच्चया – सञ्ञोजनसम्पयुत्तं एकं खन्धं पटिच्च तयो खन्धा…पे… द्वे खन्धे…पे…. (१)

सञ्ञोजनसम्पयुत्तं धम्मं पटिच्च सञ्ञोजनविप्पयुत्तो धम्मो उप्पज्जति हेतुपच्चया – सञ्ञोजनसम्पयुत्ते खन्धे पटिच्च चित्तसमुट्ठानं रूपं. (२)

सञ्ञोजनसम्पयुत्तं धम्मं पटिच्च सञ्ञोजनसम्पयुत्तो च सञ्ञोजनविप्पयुत्तो च धम्मा उप्पज्जन्ति हेतुपच्चया – सञ्ञोजनसम्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

४१. सञ्ञोजनविप्पयुत्तं धम्मं पटिच्च सञ्ञोजनविप्पयुत्तो धम्मो उप्पज्जति हेतुपच्चया – सञ्ञोजनविप्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं …पे… द्वे खन्धे…पे… उद्धच्चसहगतं मोहं पटिच्च चित्तसमुट्ठानं रूपं; पटिसन्धिक्खणे…पे… एकं महाभूतं…पे…. (१)

सञ्ञोजनविप्पयुत्तं धम्मं पटिच्च सञ्ञोजनसम्पयुत्तो धम्मो उप्पज्जति हेतुपच्चया – उद्धच्चसहगतं मोहं पटिच्च सम्पयुत्तका खन्धा. (२)

सञ्ञोजनविप्पयुत्तं धम्मं पटिच्च सञ्ञोजनसम्पयुत्तो च सञ्ञोजनविप्पयुत्तो च धम्मा उप्पज्जन्ति हेतुपच्चया – उद्धच्चसहगतं मोहं पटिच्च सम्पयुत्तका खन्धा चित्तसमुट्ठानञ्च रूपं. (३)

४२. सञ्ञोजनसम्पयुत्तञ्च सञ्ञोजनविप्पयुत्तञ्च धम्मं पटिच्च सञ्ञोजनसम्पयुत्तो धम्मो उप्पज्जति हेतुपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे…पे…. (१)

सञ्ञोजनसम्पयुत्तञ्च सञ्ञोजनविप्पयुत्तञ्च धम्मं पटिच्च सञ्ञोजनविप्पयुत्तो धम्मो उप्पज्जति हेतुपच्चया – सञ्ञोजनसम्पयुत्ते खन्धे च महाभूते च पटिच्च चित्तसमुट्ठानं रूपं, उद्धच्चसहगते खन्धे च मोहञ्च पटिच्च चित्तसमुट्ठानं रूपं. (२)

सञ्ञोजनसम्पयुत्तञ्च सञ्ञोजनविप्पयुत्तञ्च धम्मं पटिच्च सञ्ञोजनसम्पयुत्तो च सञ्ञोजनविप्पयुत्तो च धम्मा उप्पज्जन्ति हेतुपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

आरम्मणपच्चयो

४३. सञ्ञोजनसम्पयुत्तं धम्मं पटिच्च सञ्ञोजनसम्पयुत्तो धम्मो उप्पज्जति आरम्मणपच्चया – सञ्ञोजनसम्पयुत्तं एकं खन्धं…पे… द्वे खन्धे…पे…. (१)

सञ्ञोजनसम्पयुत्तं धम्मं पटिच्च सञ्ञोजनविप्पयुत्तो धम्मो उप्पज्जति आरम्मणपच्चया – उद्धच्चसहगते खन्धे पटिच्च उद्धच्चसहगतो मोहो. (२)

सञ्ञोजनसम्पयुत्तं धम्मं पटिच्च सञ्ञोजनसम्पयुत्तो च सञ्ञोजनविप्पयुत्तो च धम्मा उप्पज्जन्ति आरम्मणपच्चया – उद्धच्चसहगतं एकं खन्धं पटिच्च तयो खन्धा मोहो च…पे… द्वे खन्धे…पे…. (३)

४४. सञ्ञोजनविप्पयुत्तं धम्मं पटिच्च सञ्ञोजनविप्पयुत्तो धम्मो उप्पज्जति आरम्मणपच्चया – सञ्ञोजनविप्पयुत्तं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे… वत्थुं पटिच्च खन्धा. (१)

सञ्ञोजनविप्पयुत्तं धम्मं पटिच्च सञ्ञोजनसम्पयुत्तो धम्मो उप्पज्जति आरम्मणपच्चया – उद्धच्चसहगतं मोहं पटिच्च सम्पयुत्तका खन्धा. (२)

सञ्ञोजनसम्पयुत्तञ्च सञ्ञोजनविप्पयुत्तञ्च धम्मं पटिच्च सञ्ञोजनसम्पयुत्तो धम्मो उप्पज्जति आरम्मणपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे…पे…. (१)

अधिपतिपच्चयो

४५. सञ्ञोजनसम्पयुत्तं धम्मं पटिच्च सञ्ञोजनसम्पयुत्तो धम्मो उप्पज्जति अधिपतिपच्चया… तीणि.

सञ्ञोजनविप्पयुत्तं धम्मं पटिच्च सञ्ञोजनविप्पयुत्तो धम्मो उप्पज्जति अधिपतिपच्चया… एकं.

सञ्ञोजनसम्पयुत्तञ्च सञ्ञोजनविप्पयुत्तञ्च धम्मं पटिच्च सञ्ञोजनविप्पयुत्तो धम्मो उप्पज्जति अधिपतिपच्चया – सञ्ञोजनसम्पयुत्तके खन्धे च महाभूते च पटिच्च चित्तसमुट्ठानं रूपं. (१) (संखित्तं.)