१-४. पच्चयानुलोमादि

हेतुपच्चयो

१०. सञ्ञोजनं धम्मं पच्चया सञ्ञोजनो धम्मो उप्पज्जति हेतुपच्चया… तीणि (पटिच्चसदिसं).

नोसञ्ञोजनं धम्मं पच्चया नोसञ्ञोजनो धम्मो उप्पज्जति हेतुपच्चया – नोसञ्ञोजनं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा, एकं महाभूतं…पे… महाभूते पच्चया चित्तसमुट्ठानं रूपं, कटत्तारूपं, उपादारूपं, वत्थुं पच्चया नोसञ्ञोजना खन्धा. (१)

नोसञ्ञोजनं धम्मं पच्चया सञ्ञोजनो धम्मो उप्पज्जति हेतुपच्चया – नोसञ्ञोजने खन्धे पच्चया सञ्ञोजना, वत्थुं पच्चया सञ्ञोजना. (२)

नोसञ्ञोजनं धम्मं पच्चया सञ्ञोजनो च नोसञ्ञोजनो च धम्मा उप्पज्जन्ति हेतुपच्चया – नोसञ्ञोजनं एकं खन्धं पच्चया तयो खन्धा सञ्ञोजनञ्च चित्तसमुट्ठानञ्च रूपं…पे… द्वे खन्धे…पे… वत्थुं पच्चया सञ्ञोजना, महाभूते पच्चया चित्तसमुट्ठानं रूपं, वत्थुं पच्चया सञ्ञोजना सम्पयुत्तका च खन्धा. (३)

११. सञ्ञोजनञ्च नोसञ्ञोजनञ्च धम्मं पच्चया सञ्ञोजनो धम्मो उप्पज्जति हेतुपच्चया – कामरागसञ्ञोजनञ्च सम्पयुत्तके च खन्धे पच्चया दिट्ठिसञ्ञोजनं अविज्जासञ्ञोजनं, कामरागसञ्ञोजनञ्च वत्थुञ्च पच्चया दिट्ठिसञ्ञोजनं अविज्जासञ्ञोजनं (चक्कं) (१)

सञ्ञोजनञ्च नोसञ्ञोजनञ्च धम्मं पच्चया नोसञ्ञोजनो धम्मो उप्पज्जति हेतुपच्चया – नोसञ्ञोजनं एकं खन्धञ्च सञ्ञोजने च पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… (चक्कं). सञ्ञोजने च वत्थुञ्च पच्चया नोसञ्ञोजना खन्धा. (२)

सञ्ञोजनञ्च नोसञ्ञोजनञ्च धम्मं पच्चया सञ्ञोजनो च नोसञ्ञोजनो च धम्मा उप्पज्जन्ति हेतुपच्चया – नोसञ्ञोजनं एकं खन्धञ्च कामरागसञ्ञोजनञ्च पच्चया तयो खन्धा दिट्ठिसञ्ञोजनं अविज्जासञ्ञोजनं चित्तसमुट्ठानञ्च रूपं, द्वे खन्धे…पे… (चक्कं). कामरागसञ्ञोजनञ्च वत्थुञ्च पच्चया दिट्ठिसञ्ञोजनं अविज्जासञ्ञोजनं सम्पयुत्तका च खन्धा (चक्कं. संखित्तं). (३)

१२. हेतुया नव, आरम्मणे नव (सब्बत्थ नव), विपाके एकं…पे… अविगते नव.

१३. नहेतुया चत्तारि (यत्थ यत्थ वत्थु लब्भति, तत्थ तत्थ निन्नेतब्बं), नआरम्मणे तीणि…पे… नोविगते तीणि.