१. विभङ्गवारो

हेतुपच्चयो

१२१. आसवो चेव आसवसम्पयुत्तो च धम्मो आसवस्स चेव आसवसम्पयुत्तस्स च धम्मस्स हेतुपच्चयेन पच्चयो… तीणि.

आसवसम्पयुत्तो चेव नो च आसवो धम्मो आसवसम्पयुत्तस्स चेव नो च आसवस्स धम्मस्स हेतुपच्चयेन पच्चयो – आसवसम्पयुत्ता चेव नो च आसवा हेतू सम्पयुत्तकानं खन्धानं हेतुपच्चयेन पच्चयो. (१)

आरम्मणपच्चयादि

१२२. आसवो चेव आसवसम्पयुत्तो च धम्मो आसवस्स चेव आसवसम्पयुत्तस्स च धम्मस्स आरम्मणपच्चयेन पच्चयो… तीणि.

आसवसम्पयुत्तो चेव नो च आसवो धम्मो आसवसम्पयुत्तस्स चेव नो च आसवस्स धम्मस्स आरम्मणपच्चयेन पच्चयो – आसवसम्पयुत्ते चेव नो च आसवे खन्धे आरब्भ आसवसम्पयुत्ता चेव नो च आसवा खन्धा उप्पज्जन्ति. (१)

आसवसम्पयुत्तो चेव नो च आसवो धम्मो आसवस्स चेव आसवसम्पयुत्तस्स च धम्मस्स आरम्मणपच्चयेन पच्चयो – आसवसम्पयुत्ते चेव नो च आसवे खन्धे आरब्भ आसवा उप्पज्जन्ति. (२)

आसवसम्पयुत्तो चेव नो च आसवो धम्मो आसवस्स चेव आसवसम्पयुत्तस्स च आसवसम्पयुत्तस्स चेव नो च आसवस्स च धम्मस्स आरम्मणपच्चयेन पच्चयो – आसवसम्पयुत्ते चेव नो च आसवे खन्धे आरब्भ आसवा च आसवसम्पयुत्तका च खन्धा उप्पज्जन्ति. (३)

आसवो चेव आसवसम्पयुत्तो च आसवसम्पयुत्तो चेव नो च आसवो च धम्मा आसवस्स चेव आसवसम्पयुत्तस्स च धम्मस्स आरम्मणपच्चयेन पच्चयो … तीणि.

अधिपतिपच्चया… (आरम्मणसदिसा, गरुकारम्मणा) अनन्तरपच्चया… (आरम्मणसदिसायेव, पुरिमा पुरिमाति कातब्बा.) समनन्तरपच्चया… सहजातपच्चया… अञ्ञमञ्ञपच्चया… निस्सयपच्चया… उपनिस्सयपच्चया (आरम्मणसदिसंयेव, विभजना नत्थि… तीणि. उपनिस्सयं सब्बं कातब्बं).

कम्मपच्चयादि

१२३. आसवसम्पयुत्तो चेव नो च आसवो धम्मो आसवसम्पयुत्तस्स चेव नो च आसवस्स धम्मस्स कम्मपच्चयेन पच्चयो… तीणि… आहारपच्चयेन पच्चयो… तीणि… इन्द्रियपच्चयेन पच्चयो… तीणि… झानपच्चयेन पच्चयो… तीणि… मग्गपच्चयेन पच्चयो… नव… सम्पयुत्तपच्चयेन पच्चयो… नव… अत्थिपच्चयेन पच्चयो… नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो… नव.