१. विभङ्गवारो

हेतुपच्चयो

११५. आसवञ्चेव आसवसम्पयुत्तञ्च धम्मं पटिच्च आसवो चेव आसवसम्पयुत्तो च धम्मो उप्पज्जति हेतुपच्चया – कामासवं पटिच्च दिट्ठासवो अविज्जासवो (चक्कं बन्धितब्बं). भवासवं पटिच्च अविज्जासवो (चक्कं बन्धितब्बं). दिट्ठासवं पटिच्च अविज्जासवो. (१)

आसवञ्चेव आसवसम्पयुत्तञ्च धम्मं पटिच्च आसवसम्पयुत्तो चेव नो च आसवो धम्मो उप्पज्जति हेतुपच्चया – आसवे पटिच्च सम्पयुत्तका खन्धा. (२)

आसवञ्चेव आसवसम्पयुत्तञ्च धम्मं पटिच्च आसवो चेव आसवसम्पयुत्तो च आसवसम्पयुत्तो चेव नो च आसवो च धम्मा उप्पज्जन्ति हेतुपच्चया – आसवसम्पयुत्तं कामासवं पटिच्च दिट्ठासवो अविज्जासवो सम्पयुत्तका च खन्धा (सब्बं चक्कं). (३)

११६. आसवसम्पयुत्तञ्चेव नो च आसवं धम्मं पटिच्च आसवसम्पयुत्तो चेव नो च आसवो धम्मो उप्पज्जति हेतुपच्चया – आसवसम्पयुत्तञ्चेव नो च आसवं एकं खन्धं पटिच्च तयो खन्धा…पे… द्वे खन्धे…पे…. (१)

आसवसम्पयुत्तञ्चेव नो च आसवं धम्मं पटिच्च आसवो चेव आसवसम्पयुत्तो च धम्मो उप्पज्जति हेतुपच्चया – आसवसम्पयुत्तञ्चेव नो च आसवे खन्धे पटिच्च आसवा. (२)

आसवसम्पयुत्तञ्चेव नो च आसवं धम्मं पटिच्च आसवो चेव आसवसम्पयुत्तो च आसवसम्पयुत्तो चेव नो च आसवो च धम्मा उप्पज्जन्ति हेतुपच्चया – आसवसम्पयुत्तञ्चेव नो च आसवं एकं खन्धं पटिच्च तयो खन्धा आसवा च…पे… द्वे खन्धे…पे…. (३)

११७. आसवञ्चेव आसवसम्पयुत्तञ्च आसवसम्पयुत्तञ्चेव नो च आसवञ्च धम्मं पटिच्च आसवो चेव आसवसम्पयुत्तो च धम्मो उप्पज्जति हेतुपच्चया – कामासवञ्च सम्पयुत्तके च खन्धे पटिच्च दिट्ठासवो अविज्जासवो (सब्बं चक्कं). (१)

आसवञ्चेव आसवसम्पयुत्तञ्च आसवसम्पयुत्तञ्चेव नो च आसवञ्च धम्मं पटिच्च आसवसम्पयुत्तो चेव नो च आसवो धम्मो उप्पज्जति हेतुपच्चया – आसवसम्पयुत्तञ्चेव नो च आसवं एकं खन्धञ्च आसवे च पटिच्च तयो खन्धा…पे… द्वे खन्धे…पे…. (२)

आसवञ्चेव आसवसम्पयुत्तञ्च आसवसम्पयुत्तञ्चेव नो च आसवञ्च धम्मं पटिच्च आसवो चेव आसवसम्पयुत्तो च आसवसम्पयुत्तो चेव नो च आसवो च धम्मा उप्पज्जन्ति हेतुपच्चया – आसवसम्पयुत्तञ्चेव नो च आसवं एकं खन्धञ्च कामासवञ्च पटिच्च तयो खन्धा दिट्ठासवो अविज्जासवो…पे… द्वे खन्धे…पे…. (३)

(चक्कं. एवं सब्बे पच्चया कातब्बा.)