१. विभङ्गवारो

(पञ्हावारे हेतुपच्चयेपि आरम्मणपच्चयेपि लोकुत्तरं न कातब्बं, सेखा गोत्रभुं पच्चवेक्खन्ति, वोदानं पच्चवेक्खन्तीति कातब्बा. अधिपतिपच्चयम्पि सब्बं जानित्वा कातब्बं.)

अनन्तरपच्चयो

११२. आसवो चेव सासवो च धम्मो आसवस्स चेव सासवस्स च धम्मस्स अनन्तरपच्चयेन पच्चयो – पुरिमा पुरिमा आसवा पच्छिमानं पच्छिमानं आसवानं अनन्तरपच्चयेन पच्चयो. (१)

आसवो चेव सासवो च धम्मो सासवस्स चेव नो च आसवस्स धम्मस्स अनन्तरपच्चयेन पच्चयो – पुरिमा पुरिमा आसवा पच्छिमानं पच्छिमानं सासवञ्चेव नो च आसवानं खन्धानं अनन्तरपच्चयेन पच्चयो; आसवा वुट्ठानस्स अनन्तरपच्चयेन पच्चयो. (२)

आसवो चेव सासवो च धम्मो आसवस्स चेव सासवस्स च सासवस्स चेव नो च आसवस्स च धम्मस्स अनन्तरपच्चयेन पच्चयो – पुरिमा पुरिमा आसवा पच्छिमानं पच्छिमानं आसवानं सम्पयुत्तकानञ्च खन्धानं अनन्तरपच्चयेन पच्चयो. (३)

११३. सासवो चेव नो च आसवो धम्मो सासवस्स चेव नो च आसवस्स धम्मस्स अनन्तरपच्चयेन पच्चयो – पुरिमा पुरिमा सासवा चेव नो च आसवा खन्धा पच्छिमानं पच्छिमानं सासवानञ्चेव नो च आसवानं खन्धानं अनन्तरपच्चयेन पच्चयो; अनुलोमं गोत्रभुस्स, अनुलोमं वोदानस्स, आवज्जना सासवानञ्चेव नो च आसवानं खन्धानं अनन्तरपच्चयेन पच्चयो. (१)

सासवो चेव नो च आसवो धम्मो आसवस्स चेव सासवस्स च धम्मस्स अनन्तरपच्चयेन पच्चयो – पुरिमा पुरिमा सासवा चेव नो च आसवा खन्धा पच्छिमानं पच्छिमानं आसवानं अनन्तरपच्चयेन पच्चयो; आवज्जना आसवानं अनन्तरपच्चयेन पच्चयो. (२)

सासवो चेव नो च आसवो धम्मो आसवस्स चेव सासवस्स च सासवस्स चेव नो च आसवस्स च धम्मस्स अनन्तरपच्चयेन पच्चयो – पुरिमा पुरिमा सासवा चेव नो च आसवा खन्धा पच्छिमानं पच्छिमानं आसवानं सम्पयुत्तकानञ्च खन्धानं अनन्तरपच्चयेन पच्चयो; आवज्जना आसवानं सम्पयुत्तकानञ्च खन्धानं अनन्तरपच्चयेन पच्चयो. (३)

११४. आसवो चेव सासवो च सासवो चेव नो च आसवो च धम्मा आसवस्स चेव सासवस्स च धम्मस्स अनन्तरपच्चयेन पच्चयो – पुरिमा पुरिमा आसवा च सम्पयुत्तका च खन्धा पच्छिमानं पच्छिमानं आसवानं अनन्तरपच्चयेन पच्चयो. (१)

आसवो चेव सासवो च सासवो चेव नो च आसवो च धम्मा सासवस्स चेव नो च आसवस्स धम्मस्स अनन्तरपच्चयेन पच्चयो – पुरिमा पुरिमा आसवा च सम्पयुत्तका च खन्धा पच्छिमानं पच्छिमानं सासवानञ्चेव नो च आसवानं खन्धानं अनन्तरपच्चयेन पच्चयो; आसवा च सम्पयुत्तका च खन्धा वुट्ठानस्स अनन्तरपच्चयेन पच्चयो. (२)

आसवो चेव सासवो च सासवो चेव नो च आसवो च धम्मा आसवस्स चेव सासवस्स च सासवस्स चेव नो च आसवस्स च धम्मस्स अनन्तरपच्चयेन पच्चयो – पुरिमा पुरिमा आसवा च सम्पयुत्तका च खन्धा पच्छिमानं पच्छिमानं आसवानं सम्पयुत्तकानञ्च खन्धानं अनन्तरपच्चयेन पच्चयो (एवं सब्बं वित्थारेतब्बं). (३)

(आसवदुकेपि अनन्तरं इमिना सदिसं कातब्बं. आवज्जनापि वुट्ठानम्पि एवं समुद्दिट्ठं संखित्तं. सब्बं परिपुण्णं. आसवदुकसदिसं कातब्बं, निन्नानं.)

आसवसासवदुकं निट्ठितं.