१. विभङ्गवारो

नहेतुपच्चयो

५. नोआसवं धम्मं पटिच्च नोआसवो धम्मो उप्पज्जति नहेतुपच्चया – अहेतुकं नोआसवं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… (याव असञ्ञसत्ता). (१)

नोआसवं धम्मं पटिच्च आसवो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (२)

नआरम्मणपच्चयो

६. आसवं धम्मं पटिच्च नोआसवो धम्मो उप्पज्जति नआरम्मणपच्चया – आसवे पटिच्च चित्तसमुट्ठानं रूपं. (१)

नोआसवं धम्मं पटिच्च नोआसवो धम्मो उप्पज्जति नआरम्मणपच्चया – नोआसवे खन्धे पटिच्च चित्तसमुट्ठानं रूपं; पटिसन्धिक्खणे…पे… खन्धे पटिच्च वत्थु, एकं महाभूतं…पे… (याव असञ्ञसत्ता). (१)

आसवञ्च नोआसवञ्च धम्मं पटिच्च नोआसवो धम्मो उप्पज्जति नआरम्मणपच्चया – आसवे च सम्पयुत्तके च खन्धे पटिच्च चित्तसमुट्ठानं रूपं (संखित्तं). (१)