१. विभङ्गवारो

हेतुपच्चयो

१०९. आसवञ्चेव सासवञ्च धम्मं पटिच्च आसवो चेव सासवो च धम्मो उप्पज्जति हेतुपच्चया – कामासवं पटिच्च दिट्ठासवो अविज्जासवो (चक्कं बन्धितब्बं) भवासवं पटिच्च अविज्जासवो (चक्कं बन्धितब्बं) दिट्ठासवं पटिच्च अविज्जासवो. (१)

आसवञ्चेव सासवञ्च धम्मं पटिच्च सासवो चेव नो च आसवो धम्मो उप्पज्जति हेतुपच्चया – आसवे पटिच्च सम्पयुत्तका खन्धा चित्तसमुट्ठानञ्च रूपं. (२)

आसवञ्चेव सासवञ्च धम्मं पटिच्च आसवो चेव सासवो च सासवो चेव नो च आसवो च धम्मा उप्पज्जन्ति हेतुपच्चया – कामासवं पटिच्च दिट्ठासवो अविज्जासवो सम्पयुत्तका खन्धा चित्तसमुट्ठानञ्च रूपं, भवासवं (चक्कं बन्धितब्बं). (३)

११०. सासवञ्चेव नो च आसवं धम्मं पटिच्च सासवो चेव नो च आसवो धम्मो उप्पज्जति हेतुपच्चया – सासवञ्चेव नो च आसवं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे…. (१)

सासवञ्चेव नो च आसवं धम्मं पटिच्च आसवो चेव सासवो च धम्मो उप्पज्जति हेतुपच्चया – सासवे चेव नो च आसवे खन्धे पटिच्च आसवा. (२)

सासवञ्चेव नो च आसवं धम्मं पटिच्च आसवो चेव सासवो च सासवो चेव नो च आसवो च धम्मा उप्पज्जन्ति हेतुपच्चया – सासवञ्चेव नो च आसवं एकं खन्धं पटिच्च तयो खन्धा आसवा च चित्तसमुट्ठानञ्च रूपं…पे… द्वे खन्धे…पे…. (३)

१११. आसवञ्चेव सासवञ्च सासवञ्चेव नो च आसवञ्च धम्मं पटिच्च आसवो चेव सासवो च धम्मो उप्पज्जति हेतुपच्चया – कामासवञ्च सम्पयुत्तके च खन्धे पटिच्च दिट्ठासवो अविज्जासवो (एवं चक्कं बन्धितब्बं). (१)

आसवञ्चेव सासवञ्च सासवञ्चेव नो च आसवञ्च धम्मं पटिच्च सासवो चेव नो च आसवो धम्मो उप्पज्जति हेतुपच्चया – सासवञ्चेव नो च आसवं एकं खन्धञ्च आसवे च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे…. (२)

आसवञ्चेव सासवञ्च सासवञ्चेव नो च आसवञ्च धम्मं पटिच्च आसवो चेव सासवो च सासवो चेव नो च आसवो च धम्मा उप्पज्जन्ति हेतुपच्चया – सासवञ्चेव नो च आसवं एकं खन्धञ्च कामासवञ्च पटिच्च तयो खन्धा दिट्ठासवो अविज्जासवो चित्तसमुट्ठानञ्च रूपं…पे… द्वे खन्धे च…पे… (चक्कं. संखित्तं). (३)