१. विभङ्गवारो

हेतुपच्चयो

६६. आसवसम्पयुत्तं धम्मं पच्चया आसवसम्पयुत्तो धम्मो उप्पज्जति हेतुपच्चया… तीणि (पटिच्चवारसदिसो).

आसवविप्पयुत्तं धम्मं पच्चया आसवविप्पयुत्तो धम्मो उप्पज्जति हेतुपच्चया – आसवविप्पयुत्तं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… दोमनस्ससहगतं विचिकिच्छासहगतं उद्धच्चसहगतं मोहं पच्चया चित्तसमुट्ठानं रूपं; पटिसन्धिक्खणे…पे… खन्धे पच्चया वत्थु, वत्थुं पच्चया खन्धा, एकं महाभूतं…पे… महाभूते पच्चया चित्तसमुट्ठानं रूपं, कटत्तारूपं, उपादारूपं. वत्थुं पच्चया आसवविप्पयुत्ता खन्धा, वत्थुं पच्चया दोमनस्ससहगतो मोहो. (१)

आसवविप्पयुत्तं धम्मं पच्चया आसवसम्पयुत्तो धम्मो उप्पज्जति हेतुपच्चया – वत्थुं पच्चया आसवसम्पयुत्तका खन्धा, दोमनस्ससहगतं विचिकिच्छासहगतं उद्धच्चसहगतं मोहं पच्चया सम्पयुत्तका खन्धा. (२)

आसवविप्पयुत्तं धम्मं पच्चया आसवसम्पयुत्तो च आसवविप्पयुत्तो च धम्मा उप्पज्जन्ति हेतुपच्चया – वत्थुं पच्चया आसवसम्पयुत्तका खन्धा, महाभूते पच्चया चित्तसमुट्ठानं रूपं, दोमनस्ससहगतं विचिकिच्छासहगतं उद्धच्चसहगतं मोहं पच्चया सम्पयुत्तका खन्धा चित्तसमुट्ठानञ्च रूपं, वत्थुं पच्चया दोमनस्ससहगता खन्धा च मोहो च. (३)

६७. आसवसम्पयुत्तञ्च आसवविप्पयुत्तञ्च धम्मं पच्चया आसवसम्पयुत्तो धम्मो उप्पज्जति हेतुपच्चया – आसवसम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… दोमनस्ससहगतं विचिकिच्छासहगतं उद्धच्चसहगतं एकं खन्धञ्च मोहञ्च पच्चया तयो खन्धा…पे… द्वे खन्धे च…पे…. (१)

आसवसम्पयुत्तञ्च आसवविप्पयुत्तञ्च धम्मं पच्चया आसवविप्पयुत्तो धम्मो उप्पज्जति हेतुपच्चया – आसवसम्पयुत्ते खन्धे च महाभूते च पच्चया चित्तसमुट्ठानं रूपं, दोमनस्ससहगते विचिकिच्छासहगते उद्धच्चसहगते खन्धे च मोहञ्च पच्चया चित्तसमुट्ठानं रूपं, दोमनस्ससहगते खन्धे च वत्थुञ्च पच्चया दोमनस्ससहगतो मोहो. (२)

आसवसम्पयुत्तञ्च आसवविप्पयुत्तञ्च धम्मं पच्चया आसवसम्पयुत्तो च आसवविप्पयुत्तो च धम्मा उप्पज्जन्ति हेतुपच्चया – आसवसम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… आसवसम्पयुत्ते खन्धे च महाभूते च पच्चया चित्तसमुट्ठानं रूपं, दोमनस्ससहगतं विचिकिच्छासहगतं उद्धच्चसहगतं एकं खन्धञ्च मोहञ्च पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… दोमनस्ससहगतं एकं खन्धञ्च वत्थुञ्च पच्चया तयो खन्धा मोहो च…पे… द्वे खन्धे…पे…. (३)

आरम्मणपच्चयादि

६८. आसवसम्पयुत्तं धम्मं पच्चया आसवसम्पयुत्तो धम्मो उप्पज्जति आरम्मणपच्चया… तीणि (पटिच्चवारसदिसा).

आसवविप्पयुत्तं धम्मं पच्चया आसवविप्पयुत्तो धम्मो उप्पज्जति आरम्मणपच्चया – आसवविप्पयुत्तं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे… वत्थुं पच्चया खन्धा, चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया आसवविप्पयुत्ता खन्धा, वत्थुं पच्चया दोमनस्ससहगतो विचिकिच्छासहगतो उद्धच्चसहगतो मोहो. (१)

आसवविप्पयुत्तं धम्मं पच्चया आसवसम्पयुत्तो धम्मो उप्पज्जति आरम्मणपच्चया – वत्थुं पच्चया आसवसम्पयुत्तका खन्धा, दोमनस्ससहगतं विचिकिच्छासहगतं उद्धच्चसहगतं मोहं पच्चया सम्पयुत्तका खन्धा. (२)

आसवविप्पयुत्तं धम्मं पच्चया आसवसम्पयुत्तो च आसवविप्पयुत्तो च धम्मा उप्पज्जन्ति आरम्मणपच्चया – वत्थुं पच्चया दोमनस्ससहगता विचिकिच्छासहगता उद्धच्चसहगता खन्धा मोहो च. (३)

६९. आसवसम्पयुत्तञ्च आसवविप्पयुत्तञ्च धम्मं पच्चया आसवसम्पयुत्तो धम्मो उप्पज्जति आरम्मणपच्चया – आसवसम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

आसवसम्पयुत्तञ्च आसवविप्पयुत्तञ्च धम्मं पच्चया आसवविप्पयुत्तो धम्मो उप्पज्जति आरम्मणपच्चया – दोमनस्ससहगते विचिकिच्छासहगते उद्धच्चसहगते खन्धे च वत्थुञ्च पच्चया दोमनस्ससहगतो विचिकिच्छासहगतो उद्धच्चसहगतो मोहो. (२)

आसवसम्पयुत्तञ्च आसवविप्पयुत्तञ्च धम्मं पच्चया आसवसम्पयुत्तो च आसवविप्पयुत्तो च धम्मा उप्पज्जन्ति आरम्मणपच्चया – दोमनस्ससहगतं विचिकिच्छासहगतं उद्धच्चसहगतं एकं खन्धञ्च वत्थुञ्च पच्चया तयो खन्धा मोहो च…पे… द्वे खन्धे…पे… अधिपतिपच्चया… अनन्तरपच्चया…पे… अविगतपच्चया. (३)