१. विभङ्गवारो

नहेतुपच्चयो

५६. आसवसम्पयुत्तं धम्मं पटिच्च आसवविप्पयुत्तो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

आसवविप्पयुत्तं धम्मं पटिच्च आसवविप्पयुत्तो धम्मो उप्पज्जति नहेतुपच्चया – अहेतुकं आसवविप्पयुत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव आसञ्ञसत्ता). (१)

नआरम्मणपच्चयो

५७. आसवसम्पयुत्तं धम्मं पटिच्च आसवविप्पयुत्तो धम्मो उप्पज्जति नआरम्मणपच्चया – आसवसम्पयुत्ते खन्धे पटिच्च चित्तसमुट्ठानं रूपं. (१)

आसवविप्पयुत्तं धम्मं पटिच्च आसवविप्पयुत्तो धम्मो उप्पज्जति नआरम्मणपच्चया – आसवविप्पयुत्ते खन्धे पटिच्च चित्तसमुट्ठानं रूपं, दोमनस्ससहगतं विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं; पटिसन्धिक्खणे…पे… खन्धे पटिच्च वत्थु, एकं महाभूतं…पे… (याव असञ्ञसत्ता). (१)

आसवसम्पयुत्तञ्च आसवविप्पयुत्तञ्च धम्मं पटिच्च आसवविप्पयुत्तो धम्मो उप्पज्जति नआरम्मणपच्चया – आसवसम्पयुत्ते खन्धे च महाभूते च पटिच्च चित्तसमुट्ठानं रूपं, दोमनस्ससहगते विचिकिच्छासहगते उद्धच्चसहगते खन्धे च मोहञ्च पटिच्च चित्तसमुट्ठानं रूपं. (१)

नअधिपतिपच्चयो

५८. आसवसम्पयुत्तं धम्मं पटिच्च आसवसम्पयुत्तो धम्मो उप्पज्जति नअधिपतिपच्चया (संखित्तं).

नपुरेजातपच्चयादि

५९. आसवसम्पयुत्तं धम्मं पटिच्च आसवसम्पयुत्तो धम्मो उप्पज्जति नपुरेजातपच्चया – अरूपे आसवसम्पयुत्तं एकं खन्धं पटिच्च तयो खन्धा…पे… द्वे खन्धे…पे…. (१)

आसवसम्पयुत्तं धम्मं पटिच्च आसवविप्पयुत्तो धम्मो उप्पज्जति नपुरेजातपच्चया – अरूपे विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो, आसवसम्पयुत्ते खन्धे पटिच्च चित्तसमुट्ठानं रूपं. (२)

आसवसम्पयुत्तं धम्मं पटिच्च आसवसम्पयुत्तो च आसवविप्पयुत्तो च धम्मा उप्पज्जन्ति नपुरेजातपच्चया – अरूपे विचिकिच्छासहगतं उद्धच्चसहगतं एकं खन्धं पटिच्च तयो खन्धा मोहो च…पे… द्वे खन्धे…पे…. (३)

६०. आसवविप्पयुत्तं धम्मं पटिच्च आसवविप्पयुत्तो धम्मो उप्पज्जति नपुरेजातपच्चया – अरूपे आसवविप्पयुत्तं एकं खन्धं पटिच्च तयो खन्धा…पे… द्वे खन्धे…पे… आसवविप्पयुत्ते खन्धे पटिच्च चित्तसमुट्ठानं रूपं, दोमनस्ससहगतं विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

आसवविप्पयुत्तं धम्मं पटिच्च आसवसम्पयुत्तो धम्मो उप्पज्जति नपुरेजातपच्चया – अरूपे विचिकिच्छासहगतं उद्धच्चसहगतं मोहं पटिच्च सम्पयुत्तका खन्धा. (२)

६१. आसवसम्पयुत्तञ्च आसवविप्पयुत्तञ्च धम्मं पटिच्च आसवसम्पयुत्तो धम्मो उप्पज्जति नपुरेजातपच्चया – अरूपे विचिकिच्छासहगतं उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे च…पे…. (१)

आसवसम्पयुत्तञ्च आसवविप्पयुत्तञ्च धम्मं पटिच्च आसवविप्पयुत्तो धम्मो उप्पज्जति नपुरेजातपच्चया – आसवसम्पयुत्ते खन्धे च महाभूते च पटिच्च चित्तसमुट्ठानं रूपं, दोमनस्ससहगते विचिकिच्छासहगते उद्धच्चसहगते खन्धे च मोहञ्च पटिच्च चित्तसमुट्ठानं रूपं. (२)

(नपच्छाजातपच्चया नव, नआसेवनपच्चया नव.)

नकम्मपच्चयादि

६२. आसवसम्पयुत्तं धम्मं पटिच्च आसवसम्पयुत्तो धम्मो उप्पज्जति नकम्मपच्चया – आसवसम्पयुत्ते खन्धे पटिच्च सम्पयुत्तका चेतना. (१)

आसवविप्पयुत्तं धम्मं पटिच्च आसवविप्पयुत्तो धम्मो उप्पज्जति नकम्मपच्चया – आसवविप्पयुत्ते खन्धे पटिच्च विप्पयुत्तका चेतना. (१)

आसवविप्पयुत्तं धम्मं पटिच्च आसवसम्पयुत्तो धम्मो उप्पज्जति नकम्मपच्चया – दोमनस्ससहगतं विचिकिच्छासहगतं उद्धच्चसहगतं मोहं पटिच्च सम्पयुत्तका चेतना. (२)

आसवसम्पयुत्तञ्च आसवविप्पयुत्तञ्च धम्मं पटिच्च आसवसम्पयुत्तो धम्मो उप्पज्जति नकम्मपच्चया – दोमनस्ससहगते विचिकिच्छासहगते उद्धच्चसहगते खन्धे च मोहञ्च पटिच्च सम्पयुत्तका चेतना… नविपाकपच्चया… नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया… नविप्पयुत्तपच्चया… नोनत्थिपच्चया… नोविगतपच्चया.