१. पटिच्चवारो

हेतुपच्चयो

४७. सासवं धम्मं पटिच्च सासवो धम्मो उप्पज्जति हेतुपच्चया – सासवं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

अनासवं धम्मं पटिच्च अनासवो धम्मो उप्पज्जति हेतुपच्चया – अनासवं एकं खन्धं पटिच्च तयो खन्धा…पे… द्वे खन्धे…पे…. (१)

अनासवं धम्मं पटिच्च सासवो धम्मो उप्पज्जति हेतुपच्चया – अनासवे खन्धे पटिच्च चित्तसमुट्ठानं रूपं. (२)

अनासवं धम्मं पटिच्च सासवो च अनासवो च धम्मा उप्पज्जन्ति हेतुपच्चया – अनासवं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

सासवञ्च अनासवञ्च धम्मं पटिच्च सासवो धम्मो उप्पज्जति हेतुपच्चया – अनासवे खन्धे च महाभूते च पटिच्च चित्तसमुट्ठानं रूपं. (१)

(यथा चूळन्तरदुके लोकियदुकं एवं कातब्बं निन्नानाकरणं.)

सासवदुकं निट्ठितं.