१. विभङ्गवारो

नहेतुपच्चयो

१३. नोआसवं धम्मं पच्चया नोआसवो धम्मो उप्पज्जति नहेतुपच्चया – अहेतुकं नोआसवं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं… वत्थुं पच्चया अहेतुका नोआसवा खन्धा. (१)

नोआसवं धम्मं पच्चया आसवो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (२)