१. विभङ्गवारो

हेतुपच्चयो

१०. आसवं धम्मं पच्चया आसवो धम्मो उप्पज्जति हेतुपच्चया (आसवमूलकं तीणि, पटिच्चसदिसा).

नोआसवं धम्मं पच्चया नोआसवो धम्मो उप्पज्जति हेतुपच्चया – नोआसवं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा, महाभूते पच्चया चित्तसमुट्ठानं रूपं कटत्तारूपं उपादारूपं, वत्थुं पच्चया नोआसवा खन्धा. (१)

नोआसवं धम्मं पच्चया आसवो धम्मो उप्पज्जति हेतुपच्चया – नोआसवे खन्धे पच्चया आसवा, वत्थुं पच्चया आसवा. (२)

नोआसवं धम्मं पच्चया आसवो च नोआसवो च धम्मा उप्पज्जन्ति हेतुपच्चया – नोआसवं एकं खन्धं पच्चया तयो खन्धा आसवा च चित्तसमुट्ठानञ्च रूपं…पे… द्वे खन्धे…पे… वत्थुं पच्चया आसवा सम्पयुत्तका च खन्धा. (३)

११. आसवञ्च नोआसवञ्च धम्मं पच्चया आसवो धम्मो उप्पज्जति हेतुपच्चया – कामासवञ्च सम्पयुत्तके च खन्धे पच्चया दिट्ठासवो अविज्जासवो (चक्कं). कामासवञ्च वत्थुञ्च पच्चया दिट्ठासवो अविज्जासवो (चक्कं). (१)

आसवञ्च नोआसवञ्च धम्मं पच्चया नोआसवो धम्मो उप्पज्जति हेतुपच्चया – नोआसवं एकं खन्धञ्च आसवे च पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… आसवञ्च वत्थुञ्च पच्चया नोआसवा खन्धा. (२)

आसवञ्च नोआसवञ्च धम्मं पच्चया आसवो च नोआसवो च धम्मा उप्पज्जन्ति हेतुपच्चया – नोआसवं एकं खन्धञ्च कामासवञ्च पच्चया तयो खन्धा दिट्ठासवो अविज्जासवो चित्तसमुट्ठानञ्च रूपं…पे… द्वे खन्धे…पे… (चक्कं). कामासवञ्च वत्थुञ्च पच्चया दिट्ठासवो अविज्जासवो सम्पयुत्तका च खन्धा (चक्कं. संखित्तं). (३)