१-४. पच्चयानुलोमादि

हेतुपच्चयो

११६. उपादानविप्पयुत्तं उपादानियं धम्मं पटिच्च उपादानविप्पयुत्तो उपादानियो धम्मो उप्पज्जति हेतुपच्चया – उपादानविप्पयुत्तं उपादानियं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

उपादानविप्पयुत्तं अनुपादानियं धम्मं पटिच्च उपादानविप्पयुत्तो अनुपादानियो धम्मो उप्पज्जति हेतुपच्चया – उपादानविप्पयुत्तं अनुपादानियं एकं खन्धं पटिच्च तयो खन्धा…पे… द्वे खन्धे…पे…. (१)

उपादानविप्पयुत्तं अनुपादानियं धम्मं पटिच्च उपादानविप्पयुत्तो उपादानियो धम्मो उप्पज्जति हेतुपच्चया – उपादानविप्पयुत्ते अनुपादानिये खन्धे पटिच्च चित्तसमुट्ठानं रूपं. (२)

उपादानविप्पयुत्तं अनुपादानियं धम्मं पटिच्च उपादानविप्पयुत्तो उपादानियो च उपादानविप्पयुत्तो अनुपादानियो च धम्मा उप्पज्जन्ति हेतुपच्चया – उपादानविप्पयुत्तं अनुपादानियं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

उपादानविप्पयुत्तं उपादानियञ्च उपादानविप्पयुत्तं अनुपादानियञ्च धम्मं पटिच्च उपादानविप्पयुत्तो उपादानियो धम्मो उप्पज्जति हेतुपच्चया – उपादानविप्पयुत्ते अनुपादानिये खन्धे च महाभूते च पटिच्च चित्तसमुट्ठानं रूपं. (१)

हेतुया पञ्च, आरम्मणे द्वे…पे… अविगते पञ्च.

(इमं दुकं चूळन्तरदुके लोकियदुकसदिसं, निन्नानाकरणं.)

उपादानविप्पयुत्तउपादानियदुकं निट्ठितं.

उपादानगोच्छकं निट्ठितं.

ततियो भागो निट्ठितो.