२. सङ्ख्यावारो

सुद्धं

१११. हेतुया नव, आरम्मणे नव, अधिपतिया नव, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, आसेवने नव, कम्मे तीणि, आहारे तीणि, इन्द्रिये तीणि, झाने तीणि, मग्गे नव, सम्पयुत्ते नव, अत्थिया नव, नत्थिया नव, विगते नव, अविगते नव.

पच्चनीयुद्धारो

११२. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. (१)

उपादानो चेव उपादानसम्पयुत्तो च धम्मो उपादानसम्पयुत्तस्स चेव नो च उपादानस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. (२)

उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च उपादानसम्पयुत्तस्स चेव नो च उपादानस्स च धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो (एवं नवपि कातब्बा, एकेकस्स मूले तीणि तीणि पञ्हा).