१. विभङ्गवारो

हेतुपच्चयो

१०२. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स हेतुपच्चयेन पच्चयो – उपादाना चेव उपादानसम्पयुत्ता च हेतू सम्पयुत्तकानं उपादानानं हेतुपच्चयेन पच्चयो. (मूलं पुच्छितब्बं) उपादाना चेव उपादानसम्पयुत्ता च हेतू सम्पयुत्तकानं खन्धानं हेतुपच्चयेन पच्चयो. (मूलं पुच्छितब्बं) उपादाना चेव उपादानसम्पयुत्ता च हेतू सम्पयुत्तकानं खन्धानं उपादानानञ्च हेतुपच्चयेन पच्चयो. (३)

१०३. उपादानसम्पयुत्तो चेव नो च उपादानो धम्मो उपादानसम्पयुत्तस्स चेव नो च उपादानस्स धम्मस्स हेतुपच्चयेन पच्चयो – उपादानसम्पयुत्ता चेव नो च उपादाना हेतू सम्पयुत्तकानं खन्धानं हेतुपच्चयेन पच्चयो. (मूलं पुच्छितब्बं) उपादानसम्पयुत्ता चेव नो च उपादाना हेतू सम्पयुत्तकानं उपादानानं हेतुपच्चयेन पच्चयो. (मूलं पुच्छितब्बं) उपादानसम्पयुत्ता चेव नो च उपादाना हेतू सम्पयुत्तकानं खन्धानं उपादानानञ्च हेतुपच्चयेन पच्चयो. (३)

१०४. उपादानो चेव उपादानसम्पयुत्तो च उपादानसम्पयुत्तो चेव नो च उपादानो च धम्मा उपादानस्स चेव उपादानसम्पयुत्तस्स च धम्मस्स हेतुपच्चयेन पच्चयो – उपादाना चेव उपादानसम्पयुत्ता च उपादानसम्पयुत्ता चेव नो च उपादाना च हेतू सम्पयुत्तकानं उपादानानं हेतुपच्चयेन पच्चयो. (मूलं पुच्छितब्बं) उपादाना चेव उपादानसम्पयुत्ता च उपादानसम्पयुत्ता चेव नो च उपादाना च हेतू सम्पयुत्तकानं खन्धानं हेतुपच्चयेन पच्चयो. (मूलं पुच्छितब्बं) उपादाना चेव उपादानसम्पयुत्ता च उपादानसम्पयुत्ता चेव नो च उपादाना च हेतू सम्पयुत्तकानं खन्धानं उपादानानञ्च हेतुपच्चयेन पच्चयो. (३)

आरम्मणपच्चयो

१०५. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स आरम्मणपच्चयेन पच्चयो – उपादाने आरब्भ उपादाना उप्पज्जन्ति. (मूलं पुच्छितब्बं) उपादाने आरब्भ उपादानसम्पयुत्ता चेव नो च उपादाना खन्धा उप्पज्जन्ति. (मूलं पुच्छितब्बं) उपादाने आरब्भ उपादाना च सम्पयुत्तका च खन्धा उप्पज्जन्ति. (३)

उपादानसम्पयुत्तो चेव नो च उपादानो धम्मो उपादानसम्पयुत्तस्स चेव नो च उपादानस्स धम्मस्स आरम्मणपच्चयेन पच्चयो – उपादानसम्पयुत्ते चेव नो च उपादाने खन्धे आरब्भ उपादानसम्पयुत्ता चेव नो च उपादाना खन्धा उप्पज्जन्ति (तीणिपि कातब्बा, घटने तीणिपि कातब्बा).

अधिपतिपच्चयो

१०६. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स अधिपतिपच्चयेन पच्चयो… तीणि. (३)

उपादानसम्पयुत्तो चेव नो च उपादानो धम्मो उपादानसम्पयुत्तस्स चेव नो च उपादानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति (तीणिपि, तीसुपि द्वेपि अधिपति कातब्बा, घटनाधिपतिपि तीणि).

अनन्तरपच्चयो

१०७. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स अनन्तरपच्चयेन पच्चयो – पुरिमा पुरिमा उपादाना चेव उपादानसम्पयुत्ता च खन्धा पच्छिमानं पच्छिमानं उपादानानं अनन्तरपच्चयेन पच्चयो (एवं नवपि पञ्हा कातब्बा, आवज्जनापि वुट्ठानम्पि नत्थि).

समनन्तरपच्चयादि

१०८. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स समनन्तरपच्चयेन पच्चयो… नव… सहजातपच्चयेन पच्चयो… नव… अञ्ञमञ्ञपच्चयेन पच्चयो… नव… निस्सयपच्चयेन पच्चयो… नव.

उपनिस्सयपच्चयो

१०९. उपादानो चेव उपादानसम्पयुत्तो च धम्मो उपादानस्स चेव उपादानसम्पयुत्तस्स च धम्मस्स उपनिस्सयपच्चयेन पच्चयो…पे… तीणि.

उपादानसम्पयुत्तो चेव नो च उपादानो धम्मो उपादानसम्पयुत्तस्स चेव नो च उपादानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – उपादानसम्पयुत्ता चेव नो च उपादाना खन्धा उपादानसम्पयुत्तकानञ्चेव नो च उपादानानं खन्धानं उपनिस्सयपच्चयेन पच्चयो (तीणि घटनुपनिस्सयेपि तीणि)… आसेवनपच्चयेन पच्चयो… नव.

कम्मपच्चयादि

११०. उपादानसम्पयुत्तो चेव नो च उपादानो धम्मो उपादानसम्पयुत्तस्स चेव नो च उपादानस्स धम्मस्स कम्मपच्चयेन पच्चयो… तीणि… आहारपच्चयेन पच्चयो… तीणि… इन्द्रियपच्चयेन पच्चयो… तीणि… झानपच्चयेन पच्चयो… तीणि… मग्गपच्चयेन पच्चयो… नव… सम्पयुत्तपच्चयेन पच्चयो… नव… अत्थिपच्चयेन पच्चयो… नव… नत्थिपच्चयेन पच्चयो… नव… विगतपच्चयेन पच्चयो… नव… अविगतपच्चयेन पच्चयो… नव.