१. विभङ्गवारो

नहेतुपच्चयो

६. नोउपादानं धम्मं पटिच्च नोउपादानो धम्मो उप्पज्जति नहेतुपच्चया – अहेतुकं नोउपादानं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयादि

७. उपादानं धम्मं पटिच्च नोउपादानो धम्मो उप्पज्जति नआरम्मणपच्चया – उपादाने पटिच्च चित्तसमुट्ठानं रूपं. (१)

नोउपादानं धम्मं पटिच्च नोउपादानो धम्मो उप्पज्जति नआरम्मणपच्चया – नोउपादाने खन्धे पटिच्च चित्तसमुट्ठानं रूपं; पटिसन्धिक्खणे नोउपादाने खन्धे पटिच्च कटत्तारूपं, खन्धे पटिच्च वत्थु, एकं महाभूतं…पे… (याव असञ्ञसत्ता). (१)

उपादानञ्च नोउपादानं च धम्मं पटिच्च नोउपादानो धम्मो उप्पज्जति नआरम्मणपच्चया – उपादाने च सम्पयुत्तके च खन्धे पटिच्च चित्तसमुट्ठानं रूपं, उपादाने च महाभूते च पटिच्च चित्तसमुट्ठानं रूपं. (१)

नअधिपतिपच्चया… नअनन्तरपच्चया…पे… नउपनिस्सयपच्चया.

नपुरेजातपच्चयो

८. उपादानं धम्मं पटिच्च उपादानो धम्मो उप्पज्जति नपुरेजातपच्चया – अरूपे अत्तवादुपादानं पटिच्च कामुपादानं, कामुपादानं पटिच्च अत्तवादुपादानं. (१)

उपादानं धम्मं पटिच्च नोउपादानो धम्मो उप्पज्जति नपुरेजातपच्चया – अरूपे उपादाने पटिच्च सम्पयुत्तका खन्धा, उपादाने पटिच्च चित्तसमुट्ठानं रूपं (संखित्तं, नवपि पञ्हा अरूपे द्वे उपादाना).