१. विभङ्गवारो

हेतुपच्चयो

९५. उपादानञ्चेव उपादानियञ्च धम्मं पटिच्च उपादानो चेव उपादानियो च धम्मो उप्पज्जति हेतुपच्चया – दिट्ठुपादानं पटिच्च कामुपादानं, कामुपादानं पटिच्च दिट्ठुपादानं (चक्कं). (१)

उपादानञ्चेव उपादानियञ्च धम्मं पटिच्च उपादानियो चेव नो च उपादानो धम्मो उप्पज्जति हेतुपच्चया – उपादाने पटिच्च सम्पयुत्तका खन्धा चित्तसमुट्ठानञ्च रूपं. (१)

उपादानञ्चेव उपादानियञ्च धम्मं पटिच्च उपादानो चेव उपादानियो च उपादानियो चेव नो च उपादानो च धम्मा उप्पज्जन्ति हेतुपच्चया – दिट्ठुपादानं पटिच्च कामुपादानं सम्पयुत्तका च खन्धा चित्तसमुट्ठानानञ्च रूपं (चक्कं). (३)

९६. उपादानियञ्चेव नो च उपादानं धम्मं पटिच्च उपादानियो चेव नो च उपादानो धम्मो उप्पज्जति हेतुपच्चया – उपादानियञ्चेव नो च उपादानं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता). (१)

उपादानियञ्चेव नो च उपादानं धम्मं पटिच्च उपादानो चेव उपादानियो च धम्मो उप्पज्जति हेतुपच्चया – उपादानिये चेव नो च उपादाने खन्धे पटिच्च उपादाना. (२)

उपादानियञ्चेव नो च उपादानं धम्मं पटिच्च उपादानो चेव उपादानियो च उपादानियो चेव नो च उपादानो च धम्मा उप्पज्जन्ति हेतुपच्चया – उपादानियञ्चेव नो च उपादानं एकं खन्धं पटिच्च तयो खन्धा उपादाना च चित्तसमुट्ठानञ्च रूपं…पे… द्वे खन्धे…पे…. (३)

९७. उपादानञ्चेव उपादानियञ्च उपादानियञ्चेव नो च उपादानञ्च धम्मं पटिच्च उपादानो चेव उपादानियो च धम्मो उप्पज्जति हेतुपच्चया – दिट्ठुपादानञ्च सम्पयुत्तके च खन्धे पटिच्च कामुपादानं (चक्कं). (१)

उपादानञ्चेव उपादानियञ्च उपादानियञ्चेव नो च उपादानञ्च धम्मं पटिच्च उपादानियो चेव नो च उपादानो धम्मो उप्पज्जति हेतुपच्चया – उपादानियञ्चेव नो च उपादानं एकं खन्धञ्च उपादाने च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… उपादाने च महाभूते च पटिच्च चित्तसमुट्ठानं रूपं. (२)

उपादानञ्चेव उपादानियञ्च उपादानियञ्चेव नो च उपादानञ्च धम्मं पटिच्च उपादानो चेव उपादानियो च उपादानियो चेव नो च उपादानो च धम्मा उप्पज्जन्ति हेतुपच्चया – उपादानियञ्चेव नो च उपादानं एकं खन्धञ्च दिट्ठुपादानञ्च पटिच्च तयो खन्धा कामुपादानञ्च चित्तसमुट्ठानञ्च रूपं…पे… द्वे खन्धे च…पे… (चक्कं). (३)