१. विभङ्गवारो

हेतुपच्चयो

५७. उपादानसम्पयुत्तं धम्मं पच्चया उपादानसम्पयुत्तो धम्मो उप्पज्जति हेतुपच्चया… तीणि (पटिच्चसदिसं).

उपादानविप्पयुत्तं धम्मं पच्चया उपादानविप्पयुत्तो धम्मो उप्पज्जति हेतुपच्चया – उपादानविप्पयुत्तं एकं खन्धं पच्चया…पे… (याव अज्झत्तिका महाभूता) वत्थुं पच्चया उपादानविप्पयुत्ता खन्धा, वत्थुं पच्चया दिट्ठिगतविप्पयुत्तो लोभो. (१)

उपादानविप्पयुत्तं धम्मं पच्चया उपादानसम्पयुत्तो धम्मो उप्पज्जति हेतुपच्चया – वत्थुं पच्चया उपादानसम्पयुत्ता खन्धा, दिट्ठिगतविप्पयुत्तं लोभं पच्चया सम्पयुत्तका खन्धा. (२)

उपादानविप्पयुत्तं धम्मं पच्चया उपादानसम्पयुत्तो च उपादानविप्पयुत्तो च धम्मा उप्पज्जन्ति हेतुपच्चया – वत्थुं पच्चया उपादानसम्पयुत्तका खन्धा, महाभूते पच्चया चित्तसमुट्ठानं रूपं; दिट्ठिगतविप्पयुत्तं लोभं पच्चया सम्पयुत्तका खन्धा चित्तसमुट्ठानञ्च रूपं, वत्थुं पच्चया दिट्ठिगतविप्पयुत्तलोभसहगता खन्धा च लोभो च. (३)

५८. उपादानसम्पयुत्तञ्च उपादानविप्पयुत्तञ्च धम्मं पच्चया उपादानसम्पयुत्तो धम्मो उप्पज्जति हेतुपच्चया – उपादानसम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… दिट्ठिगतविप्पयुत्तलोभसहगतं एकं खन्धञ्च लोभञ्च पच्चया तयो खन्धा…पे… द्वे खन्धे च…पे…. (१)

उपादानसम्पयुत्तञ्च उपादानविप्पयुत्तञ्च धम्मं पच्चया उपादानविप्पयुत्तो धम्मो उप्पज्जति हेतुपच्चया – उपादानसम्पयुत्ते खन्धे च महाभूते च पच्चया चित्तसमुट्ठानं रूपं, दिट्ठिगतविप्पयुत्तलोभसहगते खन्धे च लोभञ्च पच्चया चित्तसमुट्ठानं रूपं, दिट्ठिगतविप्पयुत्तलोभसहगते खन्धे च वत्थुञ्च पच्चया लोभो. (२)

उपादानसम्पयुत्तञ्च उपादानविप्पयुत्तञ्च धम्मं पच्चया उपादानसम्पयुत्तो च उपादानविप्पयुत्तो च धम्मा उप्पज्जन्ति हेतुपच्चया – उपादानसम्पयुत्तं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… उपादानसम्पयुत्ते खन्धे च महाभूते च पच्चया चित्तसमुट्ठानं रूपं; दिट्ठिगतविप्पयुत्तलोभसहगतं एकं खन्धञ्च वत्थुञ्च पच्चया तयो खन्धा लोभो च…पे… द्वे खन्धे च…पे…. (३) (संखित्तं. आरम्मणपच्चयम्हि पञ्च विञ्ञाणा कातब्बा.)