१. विभङ्गवारो

हेतुपच्चयो

१. उपादानं धम्मं पटिच्च उपादानो धम्मो उप्पज्जति हेतुपच्चया – दिट्ठुपादानं पटिच्च कामुपादानं, कामुपादानं पटिच्च दिट्ठुपादानं, सीलब्बतुपादानं पटिच्च कामुपादानं, कामुपादानं पटिच्च सीलब्बतुपादानं, अत्तवादुपादानं पटिच्च कामुपादानं, कामुपादानं पटिच्च अत्तवादुपादानं. (१)

उपादानं धम्मं पटिच्च नोउपादानो धम्मो उप्पज्जति हेतुपच्चया – उपादाने पटिच्च सम्पयुत्तका खन्धा चित्तसमुट्ठानञ्च रूपं. (२)

उपादानं धम्मं पटिच्च उपादानो च नोउपादानो च धम्मा उप्पज्जन्ति हेतुपच्चया – दिट्ठुपादानं पटिच्च कामुपादानं सम्पयुत्तका च खन्धा चित्तसमुट्ठानञ्च रूपं, कामुपादानं…पे… (सब्बं चक्कं कातब्बं). (३)

२. नोउपादानं धम्मं पटिच्च नोउपादानो धम्मो उप्पज्जति हेतुपच्चया – नोउपादानं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे नोउपादानं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

नोउपादानं धम्मं पटिच्च उपादानो धम्मो उप्पज्जति हेतुपच्चया – नोउपादाने खन्धे पटिच्च उपादाना. (२)

नोउपादानं धम्मं पटिच्च उपादानो च नोउपादानो च धम्मा उप्पज्जन्ति हेतुपच्चया – नोउपादानं एकं खन्धं पटिच्च तयो खन्धा उपादाना च चित्तसमुट्ठानञ्च रूपं…पे… द्वे खन्धे पटिच्च द्वे खन्धा उपादाना च चित्तसमुट्ठानञ्च रूपं. (३)

३. उपादानञ्च नोउपादानञ्च धम्मं पटिच्च उपादानो धम्मो उप्पज्जति हेतुपच्चया – दिट्ठुपादानञ्च सम्पयुत्तके च खन्धे पटिच्च कामुपादानं (सब्बे चक्का कातब्बा). (१)

उपादानञ्च नोउपादानञ्च धम्मं पटिच्च नोउपादानो धम्मो उप्पज्जति हेतुपच्चया – नोउपादानं एकं खन्धञ्च उपादानञ्च पटिच्च तयो खन्धा चित्तसमुट्ठानञ्च रूपं, द्वे खन्धे च…पे… उपादानञ्च महाभूते च पटिच्च चित्तसमुट्ठानं रूपं. (२)

उपादानञ्च नोउपादानञ्च धम्मं पटिच्च उपादानो च नोउपादानो च धम्मा उप्पज्जन्ति हेतुपच्चया – नोउपादानं एकं खन्धञ्च दिट्ठुपादानञ्च पटिच्च तयो खन्धा कामुपादानञ्च चित्तसमुट्ठानं रूपं, द्वे खन्धे च…पे… (चक्कं कातब्बं). (३)

आरम्मणपच्चयो

४. उपादानं धम्मं पटिच्च उपादानो धम्मो उप्पज्जति आरम्मणपच्चया (नवपि पञ्हा कातब्बा, रूपं छड्डेतब्बं).