१. विभङ्गवारो

हेतुपच्चयो

१७. उपादानो धम्मो उपादानस्स धम्मस्स हेतुपच्चयेन पच्चयो – उपादाना हेतू सम्पयुत्तकानं उपादानानं हेतुपच्चयेन पच्चयो. (मूलं कातब्बं) उपादाना हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (मूलं कातब्बं) उपादाना हेतू सम्पयुत्तकानं खन्धानं उपादानानञ्च चित्तसमुट्ठानानं रूपानं हेतुपच्चयेन पच्चयो. (३)

१८. नोउपादानो धम्मो नोउपादानस्स धम्मस्स हेतुपच्चयेन पच्चयो – नोउपादाना हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

नोउपादानो धम्मो उपादानस्स धम्मस्स हेतुपच्चयेन पच्चयो – नोउपादाना हेतू सम्पयुत्तकानं उपादानानं हेतुपच्चयेन पच्चयो. (मूलं कातब्बं) नोउपादाना हेतू सम्पयुत्तकानं खन्धानं उपादानानञ्च चित्तसमुट्ठानानं रूपानं हेतुपच्चयेन पच्चयो. (३)

१९. उपादानो च नोउपादानो च धम्मा उपादानस्स धम्मस्स हेतुपच्चयेन पच्चयो – उपादाना च नोउपादाना च हेतू सम्पयुत्तकानं उपादानानं हेतुपच्चयेन पच्चयो. (मूलं कातब्बं) उपादाना च नोउपादाना च हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (मूलं कातब्बं) उपादाना च नोउपादाना च हेतू सम्पयुत्तकानं खन्धानं उपादानानञ्च चित्तसमुट्ठानानं रूपानं हेतुपच्चयेन पच्चयो. (३)

आरम्मणपच्चयो

२०. उपादानो धम्मो उपादानस्स धम्मस्स आरम्मणपच्चयेन पच्चयो – उपादाने आरब्भ उपादाना उप्पज्जन्ति… तीणि (आरब्भ कातब्बा).

नोउपादानो धम्मो नोउपादानस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति; विचिकिच्छा…पे… उद्धच्चं…पे… दोमनस्सं उप्पज्जति; पुब्बे सुचिण्णानि…पे… झाना वुट्ठहित्वा झानं पच्चवेक्खति, अरिया मग्गा वुट्ठहित्वा मग्गं पच्चवेक्खन्ति, फलं…पे… निब्बानं पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. अरिया नोउपादाने पहीने किलेसे …पे… विक्खम्भिते किलेसे पच्चवेक्खन्ति, पुब्बे समुदाचिण्णे…पे… चक्खुं…पे… वत्थुं नोउपादाने खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नोउपादानचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नोउपादाना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोउपादानो धम्मो उपादानस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति; पुब्बे सुचिण्णानि…पे… झाना…पे… चक्खुं…पे… वत्थुं नोउपादाने खन्धे अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति. (२)

नोउपादानो धम्मो उपादानस्स च नोउपादानस्स च धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा…पे… पुब्बे सुचिण्णानि …पे… झाना वुट्ठहित्वा झानं…पे… चक्खुं…पे… वत्थुं नोउपादाने खन्धे अस्सादेति अभिनन्दति, तं आरब्भ उपादाना च सम्पयुत्तका च खन्धा उप्पज्जन्ति. (३)

उपादानो च नोउपादानो च धम्मा उपादानस्स धम्मस्स आरम्मणपच्चयेन पच्चयो… तीणि (आरब्भ कातब्बा).

अधिपतिपच्चयो

२१. उपादानो धम्मो उपादानस्स धम्मस्स अधिपतिपच्चयेन पच्चयो. आरम्मणाधिपति – उपादाने गरुं कत्वा उपादाना उप्पज्जन्ति… तीणि (आरम्मणाधिपतियेव).

२२. नोउपादानो धम्मो नोउपादानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं…पे… पुब्बे…पे… झाना वुट्ठहित्वा झानं गरुं कत्वा पच्चवेक्खति, अस्सादेति अभिनन्दति, अरिया मग्गा वुट्ठहित्वा मग्गं गरुं कत्वा पच्चवेक्खन्ति…पे… फलस्स अधिपतिपच्चयेन पच्चयो; चक्खुं…पे… वत्थुं नोउपादाने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोउपादानाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नोउपादानो धम्मो उपादानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति; पुब्बे…पे… झाना…पे… चक्खुं…पे… वत्थुं नोउपादाने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोउपादानाधिपति सम्पयुत्तकानं उपादानानं अधिपतिपच्चयेन पच्चयो. (२)

नोउपादानो धम्मो उपादानस्स च नोउपादानस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झानं…पे… चक्खुं…पे… वत्थुं नोउपादाने खन्धे गरुं कत्वा अस्सादेति अभिनन्दति, तं गरुं कत्वा उपादाना च सम्पयुत्तका च खन्धा उप्पज्जन्ति. सहजाताधिपति – नोउपादानाधिपति सम्पयुत्तकानं खन्धानं उपादानानञ्च चित्तसमुट्ठानानं रूपानं अधिपतिपच्चयेन पच्चयो. (३)

उपादानो च नोउपादानो च धम्मा उपादानस्स धम्मस्स अधिपतिपच्चयेन पच्चयो… तीणि… आरम्मणाधिपति… तीणि (आरब्भ कातब्बा, आरम्मणाधिपतियेव).

अनन्तरपच्चयादि

२३. उपादानो धम्मो उपादानस्स धम्मस्स अनन्तरपच्चयेन पच्चयो – पुरिमा पुरिमा उपादाना पच्छिमानं पच्छिमानं उपादानानं अनन्तरपच्चयेन पच्चयो. (मूलं कातब्बं) पुरिमा पुरिमा उपादाना पच्छिमानं पच्छिमानं नोउपादानानं खन्धानं अनन्तरपच्चयेन पच्चयो; उपादानं वुट्ठानस्स अनन्तरपच्चयेन पच्चयो. (मूलं कातब्बं) पुरिमा पुरिमा उपादाना पच्छिमानं पच्छिमानं उपादानानं सम्पयुत्तकानञ्च खन्धानं अनन्तरपच्चयेन पच्चयो. (३)

२४. नोउपादानो धम्मो नोउपादानस्स धम्मस्स अनन्तरपच्चयेन पच्चयो – पुरिमा पुरिमा नोउपादाना खन्धा पच्छिमानं पच्छिमानं नोउपादानानं खन्धानं अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

नोउपादानो धम्मो उपादानस्स धम्मस्स अनन्तरपच्चयेन पच्चयो – पुरिमा पुरिमा नोउपादाना खन्धा पच्छिमानं पच्छिमानं उपादानानं खन्धानं अनन्तरपच्चयेन पच्चयो; आवज्जना उपादानानं अनन्तरपच्चयेन पच्चयो. (२)

नोउपादानो धम्मो उपादानस्स च नोउपादानस्स च धम्मस्स अनन्तरपच्चयेन पच्चयो – पुरिमा पुरिमा नोउपादाना खन्धा पच्छिमानं पच्छिमानं उपादानानं सम्पयुत्तकानञ्च खन्धानं अनन्तरपच्चयेन पच्चयो; आवज्जना उपादानानं सम्पयुत्तकानञ्च खन्धानं अनन्तरपच्चयेन पच्चयो. (३)

२५. उपादानो च नोउपादानो च धम्मा उपादानस्स धम्मस्स अनन्तरपच्चयेन पच्चयो – पुरिमा पुरिमा उपादाना च सम्पयुत्तका च खन्धा पच्छिमानं पच्छिमानं उपादानानं अनन्तरपच्चयेन पच्चयो. (मूलं कातब्बं) पुरिमा पुरिमा उपादाना च सम्पयुत्तका च खन्धा पच्छिमानं पच्छिमानं नोउपादानानं खन्धानं अनन्तरपच्चयेन पच्चयो; उपादाना च सम्पयुत्तका च खन्धा वुट्ठानस्स अनन्तरपच्चयेन पच्चयो. (मूलं कातब्बं) पुरिमा पुरिमा उपादाना च सम्पयुत्तका च खन्धा पच्छिमानं पच्छिमानं उपादानानं सम्पयुत्तकानञ्च खन्धानं अनन्तरपच्चयेन पच्चयो. (३)

समनन्तरपच्चयेन पच्चयो… सहजातपच्चयेन पच्चयो (पटिच्चसदिसं)… अञ्ञमञ्ञपच्चयेन पच्चयो (पटिच्चसदिसं)… निस्सयपच्चयेन पच्चयो (पच्चयसदिसं).

उपनिस्सयपच्चयो

२६. उपादानो धम्मो उपादानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो …पे…. पकतूपनिस्सयो – उपादाना उपादानानं उपनिस्सयपच्चयेन पच्चयो… तीणि.

२७. नोउपादानो धम्मो नोउपादानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति; सीलं…पे… पञ्ञं… रागं…पे… पत्थनं… कायिकं सुखं…पे… सेनासनं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति; पाणं हनति…पे… सङ्घं भिन्दति, सद्धा…पे… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

नोउपादानो धम्मो उपादानस्स धम्मस्स उपनिस्सयपच्चयेन पच्चयो. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… सेनासनं उपनिस्साय अदिन्नं…पे… मुसा…पे… पिसुणं…पे… सम्फं…पे… सन्धिं…पे… निल्लोपं…पे… एकागारिकं…पे… परिपन्थे…पे… परदारं…पे… गामघातं…पे… निगमघातं करोति; सद्धा…पे… सेनासनं उपादानानं उपनिस्सयपच्चयेन पच्चयो. (मूलं कातब्बं) सद्धं उपनिस्साय मानं जप्पेति, दिट्ठिं गण्हाति; सीलं…पे… सेनासनं उपनिस्साय अदिन्नं आदियति, मुसा…पे… पिसुणं…पे… सम्फं…पे… सन्धिं…पे… निल्लोपं…पे… एकागारिकं…पे… परिपन्थे…पे… परदारं…पे… गामघातं…पे… निगमघातं करोति; सद्धा…पे… सेनासनं उपादानानं सम्पयुत्तकानञ्च खन्धानं उपनिस्सयपच्चयेन पच्चयो. (३)

उपादानो च नोउपादानो च धम्मा उपादानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो… तीणि.

पुरेजातपच्चयो

२८. नोउपादानो धम्मो नोउपादानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नोउपादानानं खन्धानं पुरेजातपच्चयेन पच्चयो. (१)

नोउपादानो धम्मो उपादानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति. वत्थुपुरेजातं – वत्थु उपादानानं पुरेजातपच्चयेन पच्चयो. (२)

नोउपादानो धम्मो उपादानस्स च नोउपादानस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ उपादाना च सम्पयुत्तका च खन्धा उप्पज्जन्ति. वत्थुपुरेजातं – वत्थु उपादानानं सम्पयुत्तकानञ्च खन्धानं पुरेजातपच्चयेन पच्चयो. (३)

पच्छाजातासेवनपच्चया

२९. उपादानो धम्मो नोउपादानस्स धम्मस्स पच्छाजातपच्चयेन पच्चयो (संखित्तं). (१)

नोउपादानो धम्मो नोउपादानस्स धम्मस्स पच्छाजातपच्चयेन पच्चयो (संखित्तं). (१)

उपादानो च नोउपादानो च धम्मा नोउपादानस्स धम्मस्स पच्छाजातपच्चयेन पच्चयो (संखित्तं). (१) …आसेवनपच्चयेन पच्चयो.

कम्मपच्चयो

३०. नोउपादानो धम्मो नोउपादानस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नोउपादाना चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोउपादाना चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

नोउपादानो धम्मो उपादानस्स धम्मस्स कम्मपच्चयेन पच्चयो – नोउपादाना चेतना सम्पयुत्तकानं उपादानानं कम्मपच्चयेन पच्चयो. (२)

नोउपादानो धम्मो उपादानस्स च नोउपादानस्स च धम्मस्स कम्मपच्चयेन पच्चयो – नोउपादाना चेतना सम्पयुत्तकानं खन्धानं उपादानानञ्च चित्तसमुट्ठानानं रूपानं कम्मपच्चयेन पच्चयो. (३)

विपाकपच्चयादि

३१. नोउपादानो धम्मो नोउपादानस्स धम्मस्स विपाकपच्चयेन पच्चयो – विपाको नोउपादानो एको खन्धो…पे… एकं.

नोउपादानो धम्मो नोउपादानस्स धम्मस्स आहारपच्चयेन पच्चयो… तीणि (एकोयेव कबळीकारो आहारो)… इन्द्रियपच्चयेन पच्चयो… तीणि (रूपजीवितिन्द्रियं एकंयेव)… झानपच्चयेन पच्चयो… तीणि.

उपादानो धम्मो उपादानस्स धम्मस्स मग्गपच्चयेन पच्चयो – उपादानानि मग्गङ्गानि सम्पयुत्तकानं उपादानानं मग्गपच्चयेन पच्चयो (इमिना कारणेन नव पञ्हा कातब्बा)… सम्पयुत्तपच्चयेन पच्चयो… नव.

विप्पयुत्तपच्चयो

३२. उपादानो धम्मो नोउपादानस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – उपादाना चित्तसमुट्ठानानं रूपानं विप्पयुत्तपच्चयेन पच्चयो. पच्छाजातं – पच्छाजाता उपादाना पुरेजातस्स इमस्स कायस्स विप्पयुत्तपच्चयेन पच्चयो. (१)

नोउपादानो धम्मो नोउपादानस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

नोउपादानो धम्मो उपादानस्स धम्मस्स विप्पयुत्तपच्चयेन पच्चयो. पुरेजातं – वत्थु उपादानानं विप्पयुत्तपच्चयेन पच्चयो. (२)

नोउपादानो धम्मो उपादानस्स च नोउपादानस्स च धम्मस्स विप्पयुत्तपच्चयेन पच्चयो. पुरेजातं – वत्थु उपादानानं सम्पयुत्तकानञ्च खन्धानं विप्पयुत्तपच्चयेन पच्चयो. (३)

३३. उपादानो च नोउपादानो च धम्मा नोउपादानस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – उपादाना च सम्पयुत्तका च खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – उपादाना च सम्पयुत्तका च खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयो

३४. उपादानो धम्मो उपादानस्स धम्मस्स अत्थिपच्चयेन पच्चयो – दिट्ठुपादानं कामुपादानस्स अत्थिपच्चयेन पच्चयो (चक्कं). (१)

उपादानो धम्मो नोउपादानस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – उपादाना सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो. पच्छाजाता – उपादाना पुरेजातस्स इमस्स कायस्स अत्थिपच्चयेन पच्चयो. (२)

उपादानो धम्मो उपादानस्स च नोउपादानस्स च धम्मस्स अत्थिपच्चयेन पच्चयो (संखित्तं, पटिच्चसदिसं). (३)

३५. नोउपादानो धम्मो नोउपादानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं, वित्थारेतब्बं). (१)

नोउपादानो धम्मो उपादानस्स धम्मस्स अत्थिपच्चयेन पच्चयो – सहजातं, पुरेजातं. सहजातं (सहजातसदिसं). पुरेजातं (पुरेजातसदिसं). (२)

नोउपादानो धम्मो उपादानस्स च नोउपादानस्स च धम्मस्स अत्थिपच्चयेन पच्चयो – सहजातं, पुरेजातं (संखित्तं, सहजातसदिसं सहजातं विभजितब्बं, पुरेजातसदिसं पुरेजातं). (३)

३६. उपादानो च नोउपादानो च धम्मा उपादानस्स धम्मस्स अत्थिपच्चयेन पच्चयो – सहजातं, पुरेजातं. सहजातं – दिट्ठुपादानञ्च सम्पयुत्तका च खन्धा कामुपादानस्स अत्थिपच्चयेन पच्चयो (चक्कं). सहजातं – दिट्ठुपादानञ्च वत्थु च कामुपादानस्स अत्थिपच्चयेन पच्चयो (चक्कं). (१)

उपादानो च नोउपादानो च धम्मा नोउपादानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नोउपादानो एको खन्धो च उपादाना च तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा च…पे…. सहजाता – उपादाना च महाभूता च चित्तसमुट्ठानानं रूपानं अत्थिपच्चयेन पच्चयो. सहजाता – उपादाना च वत्थु च नोउपादानानं खन्धानं अत्थिपच्चयेन पच्चयो. पच्छाजाता – उपादाना च सम्पयुत्तका च खन्धा पुरेजातस्स इमस्स कायस्स अत्थिपच्चयेन पच्चयो. पच्छाजाता – उपादाना च सम्पयुत्तका च खन्धा कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – उपादाना च सम्पयुत्तका च खन्धा रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

उपादानो च नोउपादानो च धम्मा उपादानस्स च नोउपादानस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – नोउपादानो एको खन्धो च दिट्ठुपादानञ्च तिण्णन्नं खन्धानं कामुपादानस्स च चित्तसमुट्ठानानं रूपानं अत्थिपच्चयेन पच्चयो…पे… द्वे खन्धा च…पे… (चक्कं). सहजातं – दिट्ठुपादानञ्च वत्थु च कामुपादानस्स सम्पयुत्तकानञ्च खन्धानं अत्थिपच्चयेन पच्चयो (चक्कं). (३)