१. विभङ्गवारो

हेतुपच्चयो

१३६. हेतु चेव सहेतुको च धम्मो हेतुस्स चेव सहेतुकस्स च धम्मस्स हेतुपच्चयेन पच्चयो – अलोभो अदोसस्स अमोहस्स हेतुपच्चयेन पच्चयो (यथा पटिच्चवारसदिसं). (१)

हेतु चेव सहेतुको च धम्मो सहेतुकस्स चेव न च हेतुस्स धम्मस्स हेतुपच्चयेन पच्चयो – हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (२)

हेतु चेव सहेतुको च धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स हेतुपच्चयेन पच्चयो – अलोभो अदोसस्स अमोहस्स सम्पयुत्तकानञ्च खन्धानं हेतुपच्चयेन पच्चयो (वित्थारेतब्बं). (३)

आरम्मणपच्चयो

१३७. हेतु चेव सहेतुको च धम्मो हेतुस्स चेव सहेतुकस्स च धम्मस्स आरम्मणपच्चयेन पच्चयो – हेतुं आरब्भ हेतू उप्पज्जन्ति. (१)

हेतु चेव सहेतुको च धम्मो सहेतुकस्स चेव न च हेतुस्स धम्मस्स आरम्मणपच्चयेन पच्चयो – हेतुं आरब्भ सहेतुका चेव न च हेतू खन्धा उप्पज्जन्ति. (२)

हेतु चेव सहेतुको च धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स आरम्मणपच्चयेन पच्चयो – हेतुं आरब्भ हेतू च सम्पयुत्तका च खन्धा उप्पज्जन्ति. (३)

सहेतुको चेव न च हेतु धम्मो सहेतुकस्स चेव न च हेतुस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति. झाना वुट्ठहित्वा…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति. पहीने किलेसे…पे… विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. सहेतुके चेव न च हेतू खन्धे अनिच्चतो…पे… दोमनस्सं उप्पज्जति. चेतोपरियञाणेन सहेतुका चेव न च हेतुचित्तसमङ्गिस्स चित्तं जानाति; आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… सहेतुका चेव न च हेतू खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स आरम्मणपच्चयेन पच्चयो. (१)

सहेतुको चेव न च हेतु धम्मो हेतुस्स चेव सहेतुकस्स च धम्मस्स आरम्मणपच्चयेन पच्चयो – दानं दत्वा… (यथा पठमगमनं एवं निन्नानं). (२)

सहेतुको चेव न च हेतु धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स आरम्मणपच्चयेन पच्चयो – दानं दत्वा… (यथा पठमगमनं एवं निन्नानं). (३)

१३८. हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च धम्मस्स आरम्मणपच्चयेन पच्चयो – हेतुञ्च सम्पयुत्तके च खन्धे आरब्भ हेतू उप्पज्जन्ति. (१)

हेतु चेव सहेतुको च सहेतुको चेव न च हेतु च धम्मा सहेतुकस्स चेव न च हेतुस्स धम्मस्स आरम्मणपच्चयेन पच्चयो – हेतुञ्च सम्पयुत्तके च खन्धे आरब्भ सहेतुका चेव न च हेतू खन्धा उप्पज्जन्ति. (२)

हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च सहेतुकस्स चेव न च हेतुस्स च धम्मस्स आरम्मणपच्चयेन पच्चयो – हेतुञ्च सम्पयुत्तके च खन्धे आरब्भ हेतू च सम्पयुत्तका च खन्धा उप्पज्जन्ति. (३)

अधिपतिपच्चयो

१३९. हेतु चेव सहेतुको च धम्मो हेतुस्स चेव सहेतुकस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – हेतुं गरुं कत्वा हेतू उप्पज्जन्ति. सहजाताधिपति – हेतु चेव सहेतुकाधिपति सम्पयुत्तकानं हेतूनं अधिपतिपच्चयेन पच्चयो. (१)

हेतु चेव सहेतुको च धम्मो सहेतुकस्स चेव न च हेतुस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – हेतुं गरुं कत्वा सहेतुका चेव न च हेतू खन्धा उप्पज्जन्ति. सहजाताधिपति – हेतु चेव सहेतुकाधिपति सम्पयुत्तकानं खन्धानं अधिपतिपच्चयेन पच्चयो. (२)

हेतु चेव सहेतुको च धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – हेतुं गरुं कत्वा हेतू च सम्पयुत्तका च खन्धा उप्पज्जन्ति. सहजाताधिपति – हेतु चेव सहेतुकाधिपति सम्पयुत्तकानं खन्धानं हेतूनञ्च अधिपतिपच्चयेन पच्चयो. (३)

१४०. सहेतुको चेव न च हेतु धम्मो सहेतुकस्स चेव न च हेतुस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि…पे… झाना वुट्ठहित्वा झानं गरुं कत्वा पच्चवेक्खति, अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति, सहेतुके चेव न च हेतू खन्धे गरुं कत्वा अस्सादेति अभिनन्दति; तं गरुं कत्वा रागो उप्पज्जति, दिट्ठि उप्पज्जति. सहजाताधिपति – सहेतुको चेव न च हेतु अधिपति सम्पयुत्तकानं खन्धानं अधिपतिपच्चयेन पच्चयो. (१)

सहेतुको चेव न च हेतु धम्मो हेतुस्स चेव सहेतुकस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा… (पठमगमनंयेव). सहजाताधिपति – सहेतुको चेव न च हेतु अधिपति सम्पयुत्तकानं हेतूनं अधिपतिपच्चयेन पच्चयो. (२)

सहेतुको चेव न च हेतु धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा… (पठमगमनंयेव). सहजाताधिपति – सहेतुको चेव न च हेतु अधिपति सम्पयुत्तकानं खन्धानं हेतूनञ्च अधिपतिपच्चयेन पच्चयो. (३)

१४१. हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च धम्मस्स अधिपतिपच्चयेन पच्चयो. आरम्मणाधिपति – हेतू च सम्पयुत्तके च खन्धे गरुं कत्वा हेतू उप्पज्जन्ति. (१)

हेतु चेव सहेतुको च सहेतुको चेव न च हेतु च धम्मा सहेतुकस्स चेव न च हेतुस्स धम्मस्स अधिपतिपच्चयेन पच्चयो. आरम्मणाधिपति – हेतुञ्च सम्पयुत्तके च खन्धे गरुं कत्वा सहेतुका चेव न च हेतू खन्धा उप्पज्जन्ति. (२)

हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अधिपतिपच्चयेन पच्चयो. आरम्मणाधिपति – हेतुञ्च सम्पयुत्तके च खन्धे गरुं कत्वा हेतू च सम्पयुत्तका च खन्धा उप्पज्जन्ति. (३)

अनन्तरपच्चयो

१४२. हेतु चेव सहेतुको च धम्मो हेतुस्स चेव सहेतुकस्स च धम्मस्स अनन्तरपच्चयेन पच्चयो – पुरिमा पुरिमा हेतू पच्छिमानं पच्छिमानं हेतूनं अनन्तरपच्चयेन पच्चयो. (१)

हेतु चेव सहेतुको च धम्मो सहेतुकस्स चेव न च हेतुस्स धम्मस्स अनन्तरपच्चयेन पच्चयो – पुरिमा पुरिमा हेतू पच्छिमानं पच्छिमानं सहेतुकानञ्चेव न च हेतूनं खन्धानं अनन्तरपच्चयेन पच्चयो. (२)

हेतु चेव सहेतुको च धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अनन्तरपच्चयेन पच्चयो – पुरिमा पुरिमा हेतू पच्छिमानं पच्छिमानं हेतूनं सम्पयुत्तकानञ्च खन्धानं अनन्तरपच्चयेन पच्चयो. (३)

१४३. सहेतुको चेव न च हेतु धम्मो सहेतुकस्स चेव न च हेतुस्स धम्मस्स अनन्तरपच्चयेन पच्चयो – पुरिमा पुरिमा सहेतुका चेव न च हेतू खन्धा पच्छिमानं पच्छिमानं सहेतुकानञ्चेव न च हेतूनं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स…पे… निरोधा वुट्ठहन्तस्स, नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (१)

सहेतुको चेव न च हेतु धम्मो हेतुस्स चेव सहेतुकस्स च धम्मस्स अनन्तरपच्चयेन पच्चयो – पुरिमा पुरिमा सहेतुका चेव न च हेतू खन्धा पच्छिमानं पच्छिमानं हेतूनं अनन्तरपच्चयेन पच्चयो; अनुलोमं गोत्रभुस्स… (संखित्तं). (२)

सहेतुको चेव न च हेतु धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अनन्तरपच्चयेन पच्चयो – पुरिमा पुरिमा सहेतुका चेव न च हेतू खन्धा पच्छिमानं पच्छिमानं हेतूनं सम्पयुत्तकानञ्च खन्धानं अनन्तरपच्चयेन पच्चयो; अनुलोमं गोत्रभुस्स…पे…. (३)

(सहेतुको चेव न च हेतुमूलकं तीणिपि एकसदिसा.)

१४४. हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च धम्मस्स अनन्तरपच्चयेन पच्चयो – पुरिमा पुरिमा हेतू च सम्पयुत्तका च खन्धा पच्छिमानं पच्छिमानं हेतूनं अनन्तरपच्चयेन पच्चयो. (१)

हेतु चेव सहेतुको च सहेतुको चेव न च हेतु च धम्मा सहेतुकस्स चेव न च हेतुस्स धम्मस्स अनन्तरपच्चयेन पच्चयो – पुरिमा पुरिमा हेतू च सम्पयुत्तका च खन्धा पच्छिमानं पच्छिमानं सहेतुकानञ्चेव न च हेतूनं खन्धानं अनन्तरपच्चयेन पच्चयो.(२)

हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च सहेतुकस्स चेव न च हेतुस्स च धम्मस्स अनन्तरपच्चयेन पच्चयो – पुरिमा पुरिमा हेतू च सम्पयुत्तका च खन्धा पच्छिमानं पच्छिमानं हेतूनं सम्पयुत्तकानञ्च खन्धानं अनन्तरपच्चयेन पच्चयो. (३)

सहजातपच्चयादि

१४५. हेतु चेव सहेतुको च धम्मो हेतुस्स चेव सहेतुकस्स च धम्मस्स सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो (तीणिपि पच्चया पटिच्चवारे हेतुसदिसा).

उपनिस्सयपच्चयो

१४६. हेतु चेव सहेतुको च धम्मो हेतुस्स चेव सहेतुकस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – हेतू हेतूनं उपनिस्सयपच्चयेन पच्चयो. (मूलं कातब्बं) हेतू सहेतुकानञ्चेव न च हेतूनं खन्धानं उपनिस्सयपच्चयेन पच्चयो. (मूलं कातब्बं) हेतू हेतूनं सम्पयुत्तकानञ्च खन्धानं उपनिस्सयपच्चयेन पच्चयो (इमेसं द्विन्नम्पि पञ्हानं मूलानि पुच्छितब्बानि).

सहेतुको चेव न च हेतु धम्मो सहेतुकस्स चेव न च हेतुस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति, सीलं…पे… पत्थनं उपनिस्साय दानं देति…पे… सङ्घं भिन्दति; सद्धा…पे… पत्थना सद्धाय…पे… पत्थनाय मग्गस्स फलसमापत्तिया उपनिस्सयपच्चयेन पच्चयो. (१)

(सहेतुको चेव न च हेतुमूलके इमिनाकारेन वित्थारेतब्बा अवसेसा द्वे पञ्हा.)

हेतु चेव सहेतुको च सहेतुको चेव न च हेतु च धम्मा हेतुस्स चेव सहेतुकस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – हेतू च सम्पयुत्तका च खन्धा हेतूनं उपनिस्सयपच्चयेन पच्चयो. (द्वे मूलानि पुच्छितब्बानि) हेतू च सम्पयुत्तका च खन्धा सहेतुकानञ्चेव न च हेतूनं खन्धानं उपनिस्सयपच्चयेन पच्चयो. (मूलं पुच्छितब्बं) हेतू च सम्पयुत्तका च खन्धा हेतूनं सम्पयुत्तकानञ्च खन्धानं उपनिस्सयपच्चयेन पच्चयो. (१)

आसेवनपच्चयो

१४७. हेतु चेव सहेतुको च धम्मो हेतुस्स चेव सहेतुकस्स च धम्मस्स आसेवनपच्चयेन पच्चयो (अनन्तरसदिसं).

कम्मपच्चयो

१४८. सहेतुको चेव न च हेतु धम्मो सहेतुकस्स चेव न च हेतुस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – सहेतुका चेव न च हेतू चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे…पे…. नानाक्खणिका – सहेतुका चेव न च हेतू चेतना विपाकानं सहेतुकानञ्चेव न च हेतूनं खन्धानं कम्मपच्चयेन पच्चयो. (१)

सहेतुको चेव न च हेतु धम्मो हेतुस्स चेव सहेतुकस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – सहेतुका चेव न च हेतू चेतना सम्पयुत्तकानं हेतूनं कम्मपच्चयेन पच्चयो; पटिसन्धिक्खणे…पे…. नानाक्खणिका – सहेतुका चेव न च हेतू चेतना विपाकानं हेतूनं कम्मपच्चयेन पच्चयो. (२)

सहेतुको चेव न च हेतु धम्मो हेतुस्स चेव सहेतुकस्स च सहेतुकस्स चेव न च हेतुस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – सहेतुका चेव न च हेतू चेतना सम्पयुत्तकानं खन्धानं हेतूनञ्च कम्मपच्चयेन पच्चयो; पटिसन्धिक्खणे…पे…. नानाक्खणिका – सहेतुका चेव न च हेतू चेतना विपाकानं खन्धानं हेतूनञ्च कम्मपच्चयेन पच्चयो. (३)

विपाकपच्चयो

१४९. हेतु चेव सहेतुको च धम्मो हेतुस्स चेव सहेतुकस्स च धम्मस्स विपाकपच्चयेन पच्चयो – विपाको अलोभो अदोसस्स अमोहस्स च विपाकपच्चयेन पच्चयो (चक्कं); पटिसन्धिक्खणे अलोभो (यथा हेतुपच्चया एवं वित्थारेतब्बं, नवपि विपाकन्ति नियामेतब्बं).

आहारपच्चयादि

१५०. सहेतुको चेव न च हेतु धम्मो सहेतुकस्स चेव न च हेतुस्स धम्मस्स आहारपच्चयेन पच्चयो… तीणि.

हेतु चेव सहेतुको च धम्मो हेतुस्स चेव सहेतुकस्स च धम्मस्स इन्द्रियपच्चयेन पच्चयो (इन्द्रियन्ति नियामेतब्बं, नवपि परिपुण्णं).

सहेतुको चेव न च हेतु धम्मो सहेतुकस्स चेव न च हेतुस्स धम्मस्स झानपच्चयेन पच्चयो… तीणि.

हेतु चेव सहेतुको च धम्मो हेतुस्स चेव सहेतुकस्स च धम्मस्स मग्गपच्चयेन पच्चयो … सम्पयुत्तपच्चयेन पच्चयो… अत्थिपच्चयेन पच्चयो… नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.