१. विभङ्गवारो

नअधिपतिपच्चयादि

१३१. हेतुञ्चेव सहेतुकञ्च धम्मं पटिच्च हेतु चेव सहेतुको च धम्मो उप्पज्जति नअधिपतिपच्चया – अलोभं पटिच्च अदोसो अमोहो (चक्कं); पटिसन्धिक्खणे…पे… (परिपुण्णं नव), नपुरेजाते नव, नपच्छाजाते नव, नआसेवने नव.

नकम्मपच्चयादि

१३२. हेतुञ्चेव सहेतुकञ्च धम्मं पटिच्च सहेतुको चेव न च हेतु धम्मो उप्पज्जति नकम्मपच्चया – हेतुं पटिच्च सम्पयुत्तका चेतना. (१)

सहेतुकञ्चेव न च हेतुं धम्मं पटिच्च सहेतुको चेव न च हेतु धम्मो उप्पज्जति नकम्मपच्चया – सहेतुके चेव न च हेतू खन्धे पटिच्च सम्पयुत्तका चेतना; पटिसन्धिक्खणे…पे….

हेतुञ्चेव सहेतुकञ्च सहेतुकञ्चेव न च हेतुञ्च धम्मं पटिच्च सहेतुको चेव न च हेतु धम्मो उप्पज्जति नकम्मपच्चया – हेतुञ्च सम्पयुत्तके च खन्धे पटिच्च सम्पयुत्तका चेतना… नविपाकपच्चया… नविप्पयुत्तपच्चया.