१. विभङ्गवारो

हेतुपच्चयो

१२७. हेतुञ्चेव सहेतुकञ्च धम्मं पटिच्च हेतु चेव सहेतुको च धम्मो उप्पज्जति हेतुपच्चया – अलोभं पटिच्च अदोसो अमोहो (चक्कं). लोभं पटिच्च मोहो (चक्कं); पटिसन्धिक्खणे अलोभं पटिच्च अदोसो अमोहो (चक्कं). (१)

हेतुञ्चेव सहेतुकञ्च धम्मं पटिच्च सहेतुको चेव न च हेतु धम्मो उप्पज्जति हेतुपच्चया – हेतुं पटिच्च सम्पयुत्तका खन्धा; पटिसन्धिक्खणे…पे…. (२)

हेतुञ्चेव सहेतुकञ्च धम्मं पटिच्च हेतु चेव सहेतुको च सहेतुको चेव न च हेतु च धम्मा उप्पज्जन्ति हेतुपच्चया – अलोभं पटिच्च अदोसो अमोहो सम्पयुत्तका च खन्धा (चक्कं). लोभं पटिच्च मोहो सम्पयुत्तका च खन्धा (चक्कं); पटिसन्धिक्खणे…पे…. (३)

१२८. सहेतुकञ्चेव न च हेतुं धम्मं पटिच्च सहेतुको चेव न च हेतु धम्मो उप्पज्जति हेतुपच्चया – सहेतुकञ्चेव न च हेतुं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे….(१)

सहेतुकञ्चेव न च हेतुं धम्मं पटिच्च हेतु चेव सहेतुको च धम्मो उप्पज्जति हेतुपच्चया – सहेतुके चेव न च हेतू खन्धे पटिच्च हेतू; पटिसन्धिक्खणे…पे…. (२)

सहेतुकञ्चेव न च हेतुं धम्मं पटिच्च हेतु चेव सहेतुको च सहेतुको चेव न च हेतु च धम्मा उप्पज्जन्ति हेतुपच्चया – सहेतुकञ्चेव न च हेतुं एकं खन्धं पटिच्च तयो खन्धा हेतु च…पे… द्वे खन्धे…पे… पटिसन्धिक्खणे…पे…. (३)

१२९. हेतुञ्चेव सहेतुकञ्च सहेतुकञ्चेव न च हेतुञ्च धम्मं पटिच्च हेतु चेव सहेतुको च धम्मो उप्पज्जति हेतुपच्चया – अलोभञ्च सम्पयुत्तके च खन्धे पटिच्च अदोसो अमोहो (चक्कं). लोभञ्च सम्पयुत्तके च खन्धे पटिच्च मोहो (चक्कं); पटिसन्धिक्खणे…पे…. (१)

हेतुञ्चेव सहेतुकञ्च सहेतुकञ्चेव न च हेतुञ्च धम्मं पटिच्च सहेतुको चेव न च हेतु धम्मो उप्पज्जति हेतुपच्चया – सहेतुकञ्चेव न च हेतुं एकं खन्धञ्च हेतुञ्च पटिच्च तयो खन्धा…पे… द्वे खन्धे…पे… पटिसन्धिक्खणे…पे…. (२)

हेतुञ्चेव सहेतुकञ्च सहेतुकञ्चेव न च हेतुञ्च धम्मं पटिच्च हेतु चेव सहेतुको च सहेतुको चेव न च हेतु च धम्मा उप्पज्जन्ति हेतुपच्चया – सहेतुकञ्चेव न च हेतुं एकं खन्धञ्च अलोभञ्च पटिच्च तयो खन्धा अदोसो अमोहो च…पे… द्वे खन्धे…पे… पटिसन्धिक्खणे…पे…. (३)

(संखित्तं. एवं वित्थारेतब्बं.)